Sawmus 28 - Uhokri Gahegbetawni Nukune akak Sawmus

Uya mpithan giwkis hiyeg mbayavye gihiyekemnikis

¹ Kiyavwiye Uhokri, nayemwekri, ku avim inin nah kanumpi. Timapnaba namnihswan pit. Ka ba mataybisawnama nuwhu. Ku pis ka kaytwanek nuwnuh, ka baki nah aymuhwakere ay amadga inin hawkri akiw, pi kabayte nah miya.

² Timapnanuba ku aysaw nah tarak nuwakuh arimkanit pivin barewvitye nah kabiman adahan amnihswene pit.

³ Uya amnih mpithan giwkis hiyeg mbayavye gihiyekemnikis. Ka ba pisenwepma nukakuh payak gikakkis ku pariye kehnevwi mbeyne. Hawata, ka ba isaksa nah kinikiswa gitkis hiyeg ku pariye kinista giyakikis hiyeg akak barewye iwit, bawa gihiyekemnikis mbeyevye.

⁴ Hiyapkis mbeyne gitkis ignes hiyeg avatra maditke mbayka ku pariye gikehavankis. Iki gitkis mbayavye ku pariye kis gidahankis.

⁵ Igkis ka hiyekere amin ku pariye Kiyavwiye Uhokri Dehetniye gikehavan akak gidatni; inneki keh ig hiyapkisnek gitkis nivatra. Ig pisenwanek gikakkis adahan avanenekwa.

⁶ Kibeyne gidahan Kiyavwiye Uhokri Dehetniye, mmanawa ig timep namnihswan git.

⁷ Ig Kiyavwiye Uhokri ignewa nudatni, ignewa numaptenten ariw mbeyne; nah kamaxwa givitit avititak nuyakni. Ig Kiyavwiye Uhokri ignewa ayavan; inneki keh nah ka nubetkisima hawata nah paksig akak avat adahan kabeyhene giw!

⁸ Ig Kiyavwiye Uhokri Dehetniye ignewa gidatnikis gihiyegavu. Ignewa gamnihten hawata gibiskegki ikivarat ku pariye gikanyan.

⁹ Kiyavwiye Uhokri, amnihnaba pihiyegavu hawata ikinaba kabayka gitkis neras ku pariye pidahanviyenevwi! Humawnaba gikavriwtenkis. Avuriwnigkisba adahan avanenekwa!