Sawmus 27 - Uhokri Gahegbetawni Nukune akak Sawmus

Kiyavwiye, nah hiyepkere pihepka

¹ Ig Kiyavwiye Uhokri Dehetniye ignewa uguh nuhiyekemni, ignewa namnihten; kabohriki nah avis? Ig bisiksan ariw mbeyne. Ku aysaw ig ay nukakuh nah ka avis gibohri pahavwinema hiyeg.

² Ku aysaw nuvetunyavu mbayavye igkis ayta sigis numinuh adahan pisenwevye nukakuh, igkisnewa tayuhbetkisnek, igkis tuguhe.

³ Hiyawa ka aynsima hiyegviyene ayta kiyaraniwhpen, heneme nah ka avis aynesnima. Hiyawa nah aynte abet kerka gitivutkis nuvetunyavu, nah nudukwenewa kamaxwenene givitit Kiyavwiye Uhokri.

⁴ Nah pahatwowa nayapni git Kiyavwiye Uhokri Dehetniye, in ku pariye nah aharit ininewa: numawkan ig isaksan nah misakwa ay gimun takunipti ku samah nayivwi adahan nah hiyepne gibewi, nah ikatuswene git.

⁵ Ku aysaw nah abet kiyimwikinek, ka sam. Ig amavunnek arikut givin. Ig bayahunnek ariku giwskeki. In ke wotbe ig nukeptenbenek aynte avitmin pahow tip imuwadnano ku kiney nuvetunyavu ka hiya nusamanak atere.

⁶ Hene nah matakanek nuvetunyavu ku pariye ay nanwa kiyaran nukakuh. Akak kabimanka madikte nubetki, nah kakanhawnek git Kiyavwiye ayge ariku givin. Nah paknek avat git. Nah kabayhignek kiyesad.

⁷ Kiyavwiye Uhokri, timapnanuba ku aysaw nah kanumpi! Akkanaba pamnihra nutuh hawata kaytwanaba nuwnuh.

⁸ Piswa awna nutuh: “Ba ayta kennesa nutuh. Ivegva nuhepka.” Nahme kaytwa piwn: “Kiyavwiye, nah aterenek ta pivetunat adahan nah hiyepne pihepka.”

⁹ Ka ba ayamwa nuwhu. Ka ba dagawnaw nutuh; ka ba tukuhun nah pibuk. Kiyavwiye Uhokri, namnihten, pisnewa nayavetni; ka ba ikiswenuma, ka ba maytwevunma.

¹⁰ Kibeyne. Hiyawa niguh gukak nnaguh tukuhpen, igme Kiyavwiye Uhokri avuriwhunnek.

¹¹ Kiyavwiye Uhokri, uya kannuhun adahan nah keh ku samah pimawkan. Huwithanuba avigku pihina waditye, mmanawa nuvetunyavu igkis ka aynsima.

¹² Ka ba ikevunma giwakuritkis neras nuvetunyavu. Igkis awna wasaymkanenwa numinuh. Igkis puwimahun akak garewhankis.

¹³ Ka sam. Nah hiyak ku nah dahwanek adahan nah hiyepne Kiyavwiye Uhokri gabay gikakkis gihiyegavu amadgaya inin.

¹⁴ Nukebyuvwi, kamaxwanabay kabayntiwa givitit Kiyavwiye Uhokri. Kibokahwanabay. Iwinabay yawaygi giwntak. Ka ba yi dunih yikamaxwan givititak Kiyavwiye Uhokri.