Sawmus 25 - Uhokri Gahegbetawni Nukune akak Sawmus

Pisnewa nuwiwhten ariw mbeyne

¹ Kiyavwiye Uhokri, nah ivegvap akak piriyepkawka.

² Nuwohkiga, nah kamaxwa pivitit. Ka ba isaksa nuvetunyavu marekevunma ku samah nah biyuk gitivutkis. Ka ba isaksa igkis batek giminkis awaku ku samah nah hahwa.

³ Neras ku pariye kamaxwenevwi pivitit igkis ka hiyaptinek maraki hene awaku igkis ka hahwatinek. Heneme neras ku pariye kavetunsap yuma kavatrene, igkisnewa marekepkanek.

⁴ Kiyavwiye Uhokri, uya kannuhun amin pihiyekemni! Keh nah hiyakni kabayntiwa.

⁵ Uya kannuhun huwithan avigku pihiyekemni inyewatnene, mmanawa pisnewa nuwohkiga, pisnewa namnihten. Nah kamaxwene pivitit avanenekwa. Ka pahaytima nah ka kamaxwama pivitit.

⁶ Kiyavwiye Uhokri, kiyenanuba akak pabay akak pamnihra ku pariye avanenekwa ay nukakuh minikwak.

⁷ Ka ba kiye nutaraksan ku pariye nah keh minikwak ku samah nah takweyete avim ini ku aysaw nah ka wewkere pikak. Kiyavwiye Uhokri, kiyenanuba akak pibetki akak pabay.

⁸ Ig Kiyavwiye Uhokri waditye. Ig kibeyne. Inneki keh ig akka gihina gitkis hiyeg taraksavye adahan igkis wew nivigku.

⁹ Ig huwitha hiyeg tuwatavye avigku gihina waditye. Ig kannuhgikis amin gihiyekemni.

¹⁰ Ig ka kinisakti. Ig ka gamnihrasima. Ig huwitha madikte hiyeg ku pariye ihpenevwi gahegbetawni akak gikumadukan.

¹¹ Kiyavwiye Uhokri, kehnaba ku samah pikaksan nutuh. Hiyawa nuvathawni ka aynsima, heneme uya bayahminan ariw madikte.

¹² Neras ku pariye kane taraksekere gikak Kiyavwiye Uhokri, igwa akkanek ahin gitkis adahan igkisme hiyak ku samahpa igkis wewnek.

¹³ Avanenekwa igkis utinek kabayka. Inme waxri ku pariye ikaksepka gitkis in misakwanek gidahankis gikamkayuvwikis. In ka xuwahka giwkis.

¹⁴ Ig Kiyavwiye Uhokri Dehetniye darihwak gikakkis neras ku pariye kane taraksekere gikak. Ig akka gitkis madikte gihiyekemni adahan ku samah igkis misakwa pasamrak pawtak gikak.

¹⁵ Inneki keh nah ivegnenekwa givitit Kiyavwiye Uhokri, mmanawa ignewa nuwiwhten ariw mbeyne.

¹⁶ Kiyavwiye, uya iveg numkanit. Amnihnanuba, mmanawa nah pahapo ay abet kiyimwiki!

¹⁷ Kariswahsanaba nuyakni ariw inin mbeyne kiyimwiki. Wiwhnanuba ariw madikte.

¹⁸ Hiyapnaba nudahan nuwakemni. Ivegnaba arimkat nuhiyvan mbeyne. Bayahminan ariw madikte nutaraksan.

¹⁹ Iveg ku samah nah kadahan ka aynsima nuvetunyavu. Iveg ku samah igkis amiyhan akak gidagonikis.

²⁰ Kiyavwiye, mpithanuba giwkis! Mpithan ariw mbeyne! Amnihnan! Uya ka isaksa nah marakwa nuvituh, mmanawa pisnewa numapten.

²¹ Uya iki nawaygi adahan nah wew wadit pikak, adahan nah keh kabaykanenwa kahadbe mbayka ka hiya nusamanak. Mmanawa nah kamaxwa pivitit.

²² Kiyavwiye Uhokri, amnihnaba pihiyegavu izhaewyenevwi, wiwhnigkis ariw madikte matekbetka!