Sawmus 24 - Uhokri Gahegbetawni Nukune akak Sawmus

Ukivarawiy ka gikiytanisima

¹ Inin hawkri akak madikte ku pariye ay niriku in gidahan Kiyavwiye Uhokri Dehetniye. Waxri akak madikte ku pariye aymuhwenevwi ay nivit in gidahanwata.

² Ig Kiyavwiye Uhokri yakise waxri ahakwatak un, ayteke nikwe ig kawetuhe un kahadbe in ka mpiya avitmin waxri akiw.

³ Pariye kis adahan wagah avitit Kiyavwiye Uhokri Dehetniye giwaxig? Pariye ik adahan misakwa ayge ariku givin barewvitye?

⁴ Ignewa ner ku pariye giwewni waditnene, hawata gikehni barewbetnene akak gihiyekemni, ku pariye ka kiyatha bataka, gikaksan kawnata kinisakama.

⁵ Ku pahavwi ikewne hene, ig Kiyavwiye Uhokri Dehetniye ikinek kabayka git, ig amnihginek hawata ig hiyavginek barewvit abetnewa ku aysaw ig hiyeknenek gikakkis gihiyegavu.

⁶ Henebaki giwskawnikis hiyeg ku pariye mpiksewnevwi aydha Kiyavwiye Uhokri, ku pariye aharitnevwi misakwa gimun Jakó giwohkiga.

⁷ Wokanay lapot kabayntiwa. Wokanay lapot minikweknene, nikwe igme ukivarawiy ig paraknek atere akak madikte gikiytani.

⁸ Pariyeki ner Ikivarat kane gikiytanisima? Ig Kiyavwiye Uhokri Dehetniye, ku pariye kane gidatnisima. Ig Kiyavwiye Uhokri ku pariye detye adahan kavetunsene givetunyavu.

⁹ Ya, wokanay lapot gidahan, wokanay lapot minikweknene, nikwe igme ukivarawiy ig paraknek atere akak madikte gikiytani.

¹⁰ Pariyeki ner ikivarat kane gikiytanisima? Ig Kiyavwiye Uhokri, kane-gidatnisima; ig Ikivarat adahan kiyatka.