Sawmus 23 - Uhokri Gahegbetawni Nukune akak Sawmus

Uhokri kavigsan ke wotbe nah givigbe muwtoh

¹ Kibeyne, ig Kiyavwiye Uhokri nukavriwten kabayntiwa kewa pahavwi hiyegbe avuriwne muwtoh. Nahme kewa givigbe muwtoh. Nikwe yuma ariknawnama muwekne nutuh.

² Ig keh nuhiyekemni karisaw ke wotbe ig mayaksanbe aynte abet pamatka mtibetnene ku kiney barewye iwetrit. Ig huwithan ke wotbe arimkatbe pahatra parewni ku kiney yumanene amiyan.

³ Ig iki nawaygi abet nuhiyekemni. Ig huwithan avigku kibeyne ahin waditye, mmanawa ignewa waditka akivara.

⁴ Hiyawa nah wew abetiw amisnavye ku kiney miyaka ayge, heneme nah ka avis aynesnima. Mmanawa pis ay nukakuh. Nah hiyakni ku pis ka pannusima adahan mpithan. Pis kadahan pisuga adahan pisenwa gikakkis nuvetunyavu. Pis kadahan pahga adahan ekkene nutuh ku kit nah wew. Innewa ikene nuboka.

⁵ Hiyawa nuvetunyavu kiyaran nukakuh, heneme ka sam. Pisme ahegbeta nudahan kibeyne iwetrit adahan nah axne ka kiyimanema. Nah ka avis abohri ariknawnama, mmanawa nah kadahan nukavriwten. Ku samah muwtohvutne manava givig gihepka akak tivigu adahan mpithene yu bat atere, hawata adahan miyasene gibuskna, pis hawata pis keh nah ka kiyimanema akak ariknawnama. Pis iki nutuh ka aynsima kabayka. Nah kabahte ka ik adahan amavin akiw. Nah kivun akak batekka kewa pahamku tomawribe kivunanobe akak higapka, dimubdi awaku eg kivunpi mpiynevevye.

⁶ Kibeyne, Kiyavwiye, nah hiyak ku ini pabay akak ini pamnihra in avuriwhunnek ku samah nayivwi ay amadga inin. Ayteke, aysawnemenek, nah misakwanek ay pimun akiw adahan avanenekwa.