Sawmus 22 - Uhokri Gahegbetawni Nukune akak Sawmus

Kiyavwiye, mmahki pis ikiswen?

¹ Kiyavwiye nuwohkiga, nuwohkiga, mmahki pis ikiswen? Mmahki pis piyawakad nuwhu? Mmahki pis ka timap ku aysaw nah amnihswene pit?

² Nuwohkiga, puwivak nah kanumpi, pisme ka kaytwa nuwnuh. Nah kanumpi tiyegem, heneme nuhiyekemni ka karisahwa.

³ Mmahki hene? Nah hiyak ku pisnewa barewvitye. Pis ka pidatnisima adahan pis namnihten. Pis avitmin madikte. Pis bat amadga pevwi kiyatyo. Ayge pis amevene pihiyegavu gavankis kabayhaki.

⁴ Minikwak igkis wahawkrivwi kamaxwa pivitit. Pisme amnihgikis akak pidatni.

⁵ Igkis amnihswa pit, pisme wiwhgikis ariw mbeyne. Igkis iveg pivitit, pisme ka kinisgikis.

⁶ Nahme ay pivetun kuri nah ka ariknawnama ta pit. Nah yuma nukiytani aynesnima givetunkis hiyeg. Nah yuma aynesnima nawaygi gitivutkis. Madikte igkis mahivwihun. Igkis amiyhevun.

⁷ Madikte hiyeg ku pariye hiyavun igkis miyathan. Igkis tarak ginenkis numkanit igkis sasah gitewkis.

⁸ Igkis awna: “Ku pis inyewa kamaxwa givitit Kiyavwiye Uhokri, mmahki nikwe ig ka amnihpi kuri? Ku ig batek pikak, mmahki ig ka ayavap?”

⁹ Heneme nah hiyak ku pis avanenekwa ay nukakuh. Pisnewa keh nah amadga wayk. Ku samah nah bakimnite pis avuriwhun.

¹⁰ Ku samah abetnewa nah amadga wayk nah ekkepka piwakurit. Ku samah nah amadga wayk pisnewa nuwohkiga.

¹¹ Ka ba ikiswenuma, Kiyavwiye. Mmanawa nah ay kiyaran akak mbeyevye mbayka. Yumahbaki pahavwinema adahan nayavetni.

¹² Nah kiyaran gikakkis ka aynsima nuvetunyavu. In ke wotbe nah aynte giyegbikisbe nopsadmin pakadmin kane gidatnikisima. Igkis ahegbet adahan nuwmepten.

¹³ Igkis kewa kawokwinebe mativwevye. Igkis sakara gibiykis numkanit.

¹⁴ Nahme yuma nudatni aynesnima akiw. Nah madikte kigiswip. Nah ke unbe dimuka waykborit. Nah wakaymine nah.

¹⁵ Nukuvi aravwip kewa wayk tabutebnevyebe. Inme nunenuh madikte makeke amadgat nutomabiy. Pis ikiswen nah harit waykbo kewa miyareyebe.

¹⁶ Igkisme pahabu arewhavyempu ayta tivuhpekevun. Igkis aytwe numkanit kewa pahabu pewrube kiyaran nukakuh. Igkis turuhbete nuwakuh payak akak nukugku.

¹⁷ Madikte nuvita kahayak. Nuvetunyavu misakwa ivegbet numkanit. Igkis bateke ginaktinkis awaku igkis matekevun.

¹⁸ Igkis ibekheke amin nukawihni. Igkis arehwe akak tip adahan hiyepne ku pariye kabunuganenwa igi darihpiye nusimsa.

¹⁹ Kiyavwiye Uhokri, ka ba ikiswenuma. Pisnewa ikene nutuh nudatni. Ba ayta kibehtenwa adahan pis amnihun.

²⁰ Uya amnihun mpithan ariw giyakwokkis. Ka ba isaksa neras mbayavye gihiyekemnikis kene peruwbe umehpenuma.

²¹ Uya amnihun mpithan ariw gaybukis neras kene puwiknebe axtigi. Mmanawa ka hiya nahma mpithamnihwa giwkis neras kene pakadminbe.

²² Kibeyne, Kiyavwiye. Nah hiyak ku pis kuwis timap namnihswan pit. Nikwe nah kinetihwanek amin pabay gitkis nukebyuvwi. Nah kabayhapnek ayge gibetkis pihiyegavu.

²³ Nah awnanek: “Kabayhanay Kiyavwiye Uhokri Dehetniye madikte yis ku pariye kiyathenevwi Uhokri! Madikte yis ku pariye mpiksewnevwi giharit Kiyavwiye Uhokri hawata ke amekene Jakóbe, kabayhanigbay! Yis gihiyegavu izhaewyenevwi, kabayhanigbay kiyesad!

²⁴ Kabayhanigbay, mmanawa ig ka miyeh hiyeg abetnene mbeyne. Ig hiyap madikte gikayhawni. Ig ka wages giduhya gimkanit. Kawa! Ig ahegbet adahan timepne gamnihswan git.”

²⁵ Henewatbaki, nuwohkiga. Nah kabayhapnek ayge gibetkis madikte pihiyegavu adahan ku pariye pikehavan nudahan. Ayge gibetkis madikte hiyeg ku pariye kiyathenevwi pis, nah kehnek ku pariye nukaksan ta pit.

²⁶ Igkisme madiptavye ayta axnek kabihribdave. Igkis ku pariye giharitne Kiyavwiye Uhokri igkis kabayhignek. Igkis bateke giminkisnek adahan avanenekwa!

²⁷ Aysawnemenek madikte hiyegviyenevwi amadga hawkri kiyenek Kiyavwiye Uhokri igkis wagesnek gihiyekemnikis gimkanit. Avim ini igkis madikte paberetusawnek gitivut adahan kawohkigahewne git.

²⁸ Mmanawa ignewa Kiyavwiye ig ikivarat adahan avanenekwa. Ignewa kumaduka madikte hiyegviyenevwi amadga hawkri.

²⁹ Madikte neras ku pariye kane dehwenema amadga inin igkis madikte kiyathignek. Madikte hiyeg ku pariye kuwewanek miyarap igkis madikte paberetusawnek gitivut ner ku pariye kane kavigsa givit ariw miyaka.

³⁰ Madikte ukamkayuvwiy gikakkis uhiwhivwiy igkis kiyathanek Kiyavwiye Uhokri adahan avanenekwa, mmanawa usuh kinetihwanek takunipti gitkis amin ku pariye gikehavan udahan.

³¹ Igkisme neras ku pariye kotenene amadga wayk, aysawnemek igkis hawata timapnek arak gabay gamnihra ku samah ig Uhokri ka gamnihrasima gikakkis gihiyegavu.