Sawmus 17 - Uhokri Gahegbetawni Nukune akak Sawmus

Uya amnih wadithebdih nuhawkan

¹ Kiyavwiye Uhokri, timapnaba nayapni kabayka pit, timapnaba namnihswan pit! Ataybiswanaba arit nuviryepkawni, mmanawa nuwnuh in barewbet. Yuma ariknawnama mbeyviye hiyakemniki nibet.

² Uya amnih wadithebdih nuhawkan. Mmanawa pis hiyak ku pariye nukehni kabay hawata ku pariye kane kabay.

³ Pis hiyak ku pariye abet nuhiyekemni. Tiyegem pis ivegbetin. Henewa, pis ivegbete nuhiyekemni kabayntiwa. Kibeyne, pis ka uti pahatnama nutaraksan gikak ner nuvetunya. Nah kuwis ahegbete nuhiyekemni adahan nah ka awna pahatnama iwit mbaynema.

⁴ Nah kawnata keh pahaynema mbayka gikak. Mmanawa nah mpiksaw ihpa piwn. Inneki keh nah ka wew akak ignes hiyeg arewhavye gihiyekemnikis.

⁵ Avanenekwa numawkan nah wewkere akak pidahanenwa pihiyekemni. Ku nah waywe nikak, nah ka taraksati.

⁶ Kiyavwiye Uhokri, nah piriyepkewne pit, mmanawa nah hiyak ku pis kaytwa nuwnuh. Uya ataybiswa numkanit ku avim inin. Uya timap nuviryepkawni.

⁷ Uya akka nutuh pamnihra barewye, mmanawa pisnewa mpitha hiyeg ku pariye amnihswenevwi pit gavitkis givetunyavukis.

⁸ Uya mpithan ariw mbeyne hawata ku samah wis mpithamni wowtyak anag ariw iget. Uya kavigsan ke takarakbe eg ayam gukamkayh anavi guhanpi.

⁹ Mpithan giwkis hiyeg mbayavye ku pariye ahegbet adahan pisenwevye akak nuhawkan. Igkis nuvetunyavu ay kiyaran nukakuh adahan nukamaxwitni.

¹⁰ Igkis ka amnih pahavwinema hiyeg. Gitkis igkis datte ariw madikte.

¹¹ Igkis ivegve nudukwen muwapuw he igkis utevun. Igkis kiyaran nukakuh kuri. Igkis wahap ku aysaw danuh ahawkanavrik adahan igkis nuwmepten.

¹² Igkis kewa kawokwinebe kadasene giwin. Igkis ahegbet adahan nusigkebdihpitni.

¹³ Kiyavwiye, kannikawnaba adahan pis kavetunsa neras nuvetunyavu adahan pis pisenwa gikakkis akak piwana pebkaknano guyaw. Uya amnih wiwhun giwakutakkis.

¹⁴ Kiyavwiye, akak ini pidatni uya keh nah isahptaw giwkis; henewa, keh nah isahptaw giwkis neras amadgayavu inin ku pariye kuwis kadahan madikte kabayka ku pariye gimawkankis. Katiwnisa gitkis akak ini mbeyne ku pariye pis bayehe gidahankis. Hawata katiwnisa gikamkaykis gitaraksankis gitkis, hawata gihiwhivwikis gitaraksankis akiw.

¹⁵ Nahme hiyapinek, mmanawa pis hiyavun nah kibeyne piwtrik; hawata, ku aysaw nah wadisnek amun nawenyewa nuvituh, nah bateknek ka aynsima awaku ku samah nah kuwis ay pivetun, pisme ay nukakuh.