Sawmus 16 - Uhokri Gahegbetawni Nukune akak Sawmus

Madikte naymuhwan ay piwaku

¹ Kiyavwiye Uhokri, avuriwnanuba, mmanawa pisnewa nukavriwten.

² Nah awna git Kiyavwiye Uhokri: “Pisnewa nuwohkiga. Wake ka pisma ay nukakuh, yumakam ariknawnama kabayka nudahan.”

³ Nah ka aynsima batek adahan darihwak gikakkis pihiyegavu barewvityevwi. Igkis kibeynevwinenwa hiyeg.

⁴ Ignesme ku pariye wewnevwi gikakkis nawenyevwi giwohkigakis, igkiswa ewk ka aynsima mbeyne gitkis. Nahme ka kumadukasawnek gitkis giwohkigakis, nah kawnata kiyathanek giwohkigakis.

⁵ Kiyavwiye Uhokri, pisnewa madikte nudahan. Kibeyne, naymuhwan in ay madikte piwaku, pis avuriw madikte nudahan.

⁶ Ini nuwetri ku pariye pis ike nutuh, in kibeyne iwetrit. Henewa, madikte naymuhwan ay piwaku.

⁷ Nah kabayha Kiyavwiye Uhokri, mmanawa ignewa iki nutuh nuhiyekemni. Msanpi nah himeke. Hewke nikwe nah kuwis hiyak ku pariye adahan nah keh.

⁸ Nah hiyak ku ig Kiyavwiye Uhokri avanenekwa ay nukakuh. Kibeyne, ig kennesa ay numunuh niyewka. Nikwe yuma ariknawnama tuguhkisne nukamaxwan.

⁹ Inneki keh nuyakni bateke. Mataytak nah awna batekkanenwa. Ku nah miya, ka sam. Nah iveg givitit Kiyavwiye Uhokri ku ig kanikasan akiw.

¹⁰ Nah awna: “Kibeyne, Kiyavwiye. Pis ka ikis nanmavuh aynte amun miyaravye giwetrikis. Pis ka isaksan nah pikamkayh barewvitye adahan nuvituh madivwip.

¹¹ Mmanawa pis keh nah aymuhwa adahan avanenekwa. Kuwewanek pis keh nah batek nunaktin akiw awaku ku samah nah ay pimun. Ayge pis ikinek kabayka inyewatnene nutuh adahan avanenekwa.”