Sawmus 149 - Uhokri Gahegbetawni Nukune akak Sawmus

Kabayhanay Kiyavwiye Uhokri akak nukune avatman

¹ Kabayhnay Kiyavwiye Uhokri! Paknay git Kiyavwiye nukune avatman. Kabayhanay Kiyavwiye Uhokri abetnewa givahdukawnikis gihiyegavu kamaxwenevwi.

² Bateknay yimin, hiyegviyenevwi izhaewyenevwi, gidahan ner ku pariye yihumten. Misakwanay bateke yimin, hiyegviyenevwi avitya Jerusalém, awaku yis kakivara.

³ Kabayhanay giw akak kayka, hawata abetimpi ini ku samah yis kabeyhene giw, tesnay sabbug akak hebek.

⁴ Mmanawa ig Kiyavwiye bateke gimin gikakkis gihiyegavu; ig kiyathasa tuwatasewnevwi akak isahptawka.

⁵ Hiyawa gihiyegavu kamaxwenevwi givitit batekyekuye giminkis akak ini gisahptawnikis. Ayge amadga gilitakis hiyawa igkis peknekuyes akak gibetkikis.

⁶ Adahan igkis kabayha Kiyavwiye Uhokri akak avat inuriktak, ayme giwakukis giwanakis pebkaknano guyawi.

⁷ Akak ini gavankis akak egu giwanakis, igkis matakanek givetunyavukis hawata igkis hiyapkisnek gitkis hiyegviyenevwi ku pariye kane kumadukasewkere git Kiyavwiye Uhokri.

⁸ Igkis kamaxavenek gikivaravukis, igkis wanakminevgikis akak xen kehka akak sivari kane awinisima.

⁹ Igkis hiyak gikakkis avigkutavrik ku samah Kiyavwiye Uhokri ikakse gidahankis amadga gannasan. Henewatbaki ig Kiyavwiye Uhokri ikinek gihiyegavu gikiytanikis. Kabayhanay Kiyavwiye Uhokri!