Sawmus 148 - Uhokri Gahegbetawni Nukune akak Sawmus

Kabayhanay Kiyavwiye Uhokri, pahakte hawkri

¹ Kabayhanay Kiyavwiye Uhokri! Yis inurikyenevwi, kabayhanay Kiyavwiye Uhokri ayge inurik!

² Kabayhanay Kiyavwiye, madikte yis giwatnivwi ahj, madikte yis gisuwtatavu inurikyenevwi.

³ Kamuw akak kayg, kabayhanay Kiyavwiye! Madikte yis warukmebdi kabutniyevwi, kabayhanigbay hawata.

⁴ Amawka inurik ku pariye pi inutenene kabayhig hawata akak madikte un ku pariye aygenene.

⁵ Amawka madikte kabeyhenekuye Kiyavwiye giw, mmanawa ignewa humawasevgikis madikte akak giwnnenwa.

⁶ Ig ibekhevgikis amun mpuse giwetrikis adahan igkisme misakwa avanenekwa ayge; ka ik adahan igkis ayguhwa ariwntak ini giwetrikis akiw.

⁷ Yis amadgayavu wayk, kabayhanay Kiyavwiye Uhokri ay amadga inin: yis impiyenevwi nopsadminene ahakwayavu un payak gikakkis madikte ku pariye aygenevwi amihawni parahwokwa.

⁸ Kabayhanay Kiyavwiye, ugugune akak muwok tiphawnene, huweg akak ukuhne hawata akak kamaygviye, madikte yis ariknebdi ku pariye ihpenevwi giwn!

⁹ Kabayhanay Kiyavwiye, yis waxribdi akak waxri imuwadnene, ahavwi akak ahakubdi ku pariye kewyovwi!

¹⁰ Kabayhanay Kiyavwiye, madikte yis puwiknebdi huwivrenevwi akak kahayotnavye. Kabayhanay Kiyavwiye, yis kuhivraviyene ku pariye amarapnene akak yis puwiknebdi ku pariye kawapnene!

¹¹ Kabayhanay Kiyavwiye Uhokri, yis ikivaratviyenevwi hawata madikte hiyegviyenevwi, kumaduknevwi yikak yis madikte ku pariye wewikisnevwi ihiyegat.

¹² Kabayhanay Kiyavwiye, yis takwaviye gukakkis himanoviyo, kiyavwiyegben payak gikakkis bakimnayh!

¹³ Amawka madikte kabeyhenekuye Kiyavwiye giw, mmanawa ignewa pi kiyatte giwkis madikte nawenyevwi uhokrivyene! Gikiytani in avitmin madikte ku pariye ay amadga inin hawkri hawata aynte inurik.

¹⁴ Ignewa wagahkis gidahan gihiyegavu gikiytanikis kahadbe igkisme kabayhig. Kibeyne, wixwiy gihiyegavu izhaewyenevwi, wixwiy ka uvigawiysima git. Kabayhanay Kiyavwiye Uhokri!