Sawmus 147 - Uhokri Gahegbetawni Nukune akak Sawmus

Kabayhanay Kiyavwiye Uhokri kane gidatnisima

¹ Kabayhanay Kiyavwiye Uhokri! In kabay adahan wis pak avat adahan kabeyhene uwohkigawiy. In barewe hawata in wadit adahan wis kabayhig.

² Ig Kiyavwiye Uhokri kannikasene Jerusalém akiw. Ig iwavavevye gihiyegavu akiw, ku pariye kamaxavepka avitit nawenyewa waxri.

³ Ig makniwa ku pariye kuwisnene mabimnebdi gihiyekemnikis. Hawata ig piyih gibuskanakis.

⁴ Ig gannivwi ahegbete aysaw akebi warukmebdi amawka humaw amadga hawkri. Hawata ig kanumgikis akak mpuse giwkis.

⁵ Uhokri, uwohkigawiy, ig ka nesima. Ig ka gidatnisima. Ka ik adahan wis aheh gihiyekemni.

⁶ Ig Kiyavwiye Uhokri kannikasa hiyeg tuwatasewnevwi, heneme ig tikisbeta waykborit hiyeg mbayavye.

⁷ Paknay avatman adahan kabeyhene Kiyavwiye Uhokri. Tesnay akak hebek adahan kabeyhene uwohkigawiy.

⁸ Ignewa awasava en akak ukuhne adahan waykisne muwok avitit waxri hawata adahan hiyankisne pamatka avit waxribdi imuwadminene.

⁹ Ig iki puwikneviyene gimanakis hawata ig ikap kuhivraviyano gukamkaykis ku aysaw egkis kabiman.

¹⁰ Ku pariye aydha Kiyavwiye Uhokri kawki kawayma detyevwi ine kawnata suwtatma kibokayevwi,

¹¹ Heneme, neras hiyeg ku pariye kiyathenevwi giw hawata kamaxwenevwi avitit gamnihra, nerasnewa gaydhetni.

¹² Kabayhanay Kiyavwiye, yis jerusalemyenevwi! Kabayhanay Kiyavwiye Uhokri, yis siyawhyenevwi!

¹³ Mmanawa ig iki adatni paytwempu avinum hawata ig iki kabayka givitkis hiyeg ku pariye misekwenevwi ayge.

¹⁴ Ig avuriw pasamraki giyegbikis hiyegviyenevwi ku pariye misekwenevwi akigbimna giwaxigkis. Hawata ig ikap hiyegviyenevwi akak fahin pi kabaytenene.

¹⁵ Ig Kiyavwiye awna pahat iwit, in danuh kibehtenwa muwapuw ku kit gimawkan.

¹⁶ Ig keh huweg tuguh kuhogbad kewa mawrube. Hawata ig keh sariyan tuguh kewa hewbe.

¹⁷ Ig awahkis muwok kiseviye tiphawnene; yuma pahavwinema hiyeg ik adahan amava akeswih ku pariye ig awahkis.

¹⁸ Ayteke ig he awnevi, madikte mehwa akiw. Ig keh mayg uvuvuka akiw. Un sigis akiw.

¹⁹ Ig Kiyavwiye akka giwsavan gitkis Jakó gihiwhivwi hawata ig iki gikumadukan gitkis madikte izhaewyenevwi.

²⁰ Ig ka keh hene gikakkis pahabunema nawenyevwi nawwotunyevwi; ignes nawenyevwi nawwotunyevwi ka hiyak gikumadukan. Kabayhanay Kiyavwiye Uhokri!