Sawmus 146 - Uhokri Gahegbetawni Nukune akak Sawmus

Kabayhanay Kiyavwiye Uhokri amnihkevutne

¹ Kabayhanay Kiyavwiye Uhokri! Numawkan madikte nuhiyekemni kabayhap, Kiyavwiye!

² Nah kabayhapnek ku samah naymuhwan ayivwi. Nah paknek adahan kabeyhene nuwohkiga ku aysaw nah kote miyate.

³ Ka yi muwaka iki yikamaxwan givititkis ikivaratviyene ihtikekne. Ine givititkis awaykemni, mmanawa igkis ka dehwevyema. Hawata igkis ka ik adahan amnih ariknawnama.

⁴ Ku aysaw igkis miyarap, igkis diyuhe waykekut. Abetwata ini hawkri madikte gihiyekemnikis sabuke.

⁵ Ka aynsima kabayka gidahan pahavwi ku pariye amevene kabayka giwntak Jakó giwohkiga, igi ku pariye iki gikamaxwan givitit Kiyavwiye Uhokri,

⁶ ku pariye en akivara, waxri akak parahwokwa akivara, akak madikte ku pariye misekwenevwi nivit! Ig Kiyavwiye avanenekwa keh ku pariye gikaksan.

⁷ Ig giminatakkis neras ku pariye amepkarempu. Hawata ig iki axka gitkis ku pariye mativwevyevwi. Ig Kiyavwiye Uhokri keh kamaxkarempu isahptaw.

⁸ Hawata ig keh motavye hiyap. Ig Kiyavwiye wagahkis gawaygikis neras ku pariye tuguhavye gihiyekemnikis hawata ig batek gikakkis hiyeg ku pariye wadityevwi.

⁹ Ig Kiyavwiye mpitha nawwotunyevwi ku pariye misakwa avit uwaxig. Ig amnih madankunovwi gikakkis migenavye, heneme ig keh hiyeg mbayavye gahegbetawnikis ka kawih.

¹⁰ Ig Kiyavwiye ikivaratnek adahan avanenekwa. Jerusalém, piwohkiga kumadukanek yuma nimaksemni. Kabayhanay Kiyavwiye Uhokri!