Sawmus 145 - Uhokri Gahegbetawni Nukune akak Sawmus

Kabayhanay Kiyavwiye Uhokri takunipti

¹ Nuwohkiga, nukivara, nah kinetihwanek amin pikiytani adahan avanenekwa. Nah kabayhapnek takunipti.

² Mpuse hewkevye nah kabayhapnek hawata nah kibenhapnek adahan avanenekwa.

³ Ig Kiyavwiye Uhokri ka gikiytanisima. Ig kis adahan ig kabayhaka kihaw. Pariyeki hiyeg ik adahan pukuhpa ku samah ini gikiytani?

⁴ Kiyavwiye, mpuse igti kinetihwanek amin pabay gitkis gikamkayuvwikis. Madikte hiyeg kabayhapnek amin ku samah pis ka pannusima.

⁵ Igkis awnanek amin ku samah piw ka nikiytanisima. Nahme ivegminenekwa nuhiyekemni amin ini pannivwi kane nibewisima ku pariye pikehavn.

⁶ Igkis awnanek amin pikehni akak pidatni, nahme kaytwanek giwnkis: “Henewa, ig ka gikiytanisima.”

⁷ Igkis awnanek amin ku samah pis ka pabaysima. Igkis paksapnek akak avat amin ku samah pisnewa kibeyne.

⁸ Henewatbaki! Ig Kiyavwiye Uhokri ignewa kibeyne, ig ka gamnihrasima; ig ka dagawnaw pahayenema adahan, ig ahegbetnenekwa adahan wamnihten.

⁹ Ig Kiyavwiye kibeyne gikakkis madikte hiyeg. Ig avuriw akak gavigsaki madikte ku pariye gikehavanviyene.

¹⁰ Kiyavwiye Uhokri, madikte ku pariye pikehavanviyene kabayhapnek. Igkis pihiyegavu kamaxwenvwi pivitit igkis kabayhapnek takunipti.

¹¹ Igkis madikte kinetihwanek amin ku samah pikumadukan ka nikiytanisima. Igkis akkanek gitkis hiyeg ku samah pis ka pidatnisima.

¹² Kahadbe madikte hiyegviyenevwi hiyaknek ini pannu kane nidatnisima mmanawa pis kumadukigkis kabayntiwa akak madikte pikiytani.

¹³ Pikumadukan in yuma akavuska, yumahwata amaksemni. In dahwa adahan avanenekwa. In ka matiswati. Pis ukivara adahan avanenekwa. Ig Kiyavwiye Uhokri avanenekwa keh ku pariye gikaksan wot. Ig ka gamnihrasima gikakkis madikte ku pariye gikehavanvu.

¹⁴ Ig amnih gihiyegavu ku pariye abet matekbetka. Ig diyuhkis gawaygikis neras ku pariye tuguhavye gihiyekemnikis.

¹⁵ Madikte ku pariye ivegnenevwi amadga hawkri ivegbet givitit. Igme iki gimanakis ahawkanavriknawa gimawkankis.

¹⁶ Akak madikte gabay ig woka giwak ig keh ku samah umawkanwiy wixwiy ku pariye aynenevwi amadga hawkri.

¹⁷ Madikte ku pariye ig Kiyavwiye Uhokri keh in wadit. Ig ka gabaysima.

¹⁸ Ig kennesa gihumwakis madikte ku pariye amnihswenevwi git, neras ku pariye amnihswenevwi git avititakwa giyaknikis.

¹⁹ Gitkis madikte ku pariye ihpenevwi giwn ig iki ku pariye gimawkankis. Ig timap gamnihswankis hawata ig amnihgikis.

²⁰ Ig Kiyavwiye Uhokri avuriw madikte ku pariye batekyevwi gikak. Heneme ig pisenwanek gihawkankis madikte hiyeg mbayavye.

²¹ Nah avanenekwa kabayhanek Kiyavwiye. Numawkan madikte hiyeg kabayhanek Kiyavwiye Uhokri Barewvitye adahan avanenekwa!