Sawmus 143 - Uhokri Gahegbetawni Nukune akak Sawmus

Nah kamaxwa pivitit, Kiyavwiye

¹ Kiyavwiye Uhokri, timapnaba nuviryepkawni. Timapnaba ku pariye nayapni pit! Kaytwanaba nuwnuh, mmanawa pis inyewa waditye.

² Ka ba sarayhpenuma, nah pibuk, mmanawa yuma pahavwinema waditye pivetun.

³ Nuvetunya haraksevun. Ig matekevun. Ig paraksevun ariku parakseket misanapnene, ayge nah kewa nerasbe ku pariye miyaravyenenwa minikweknene.

⁴ Inneki keh nah yuma nawaygi akiw. Nuyakni ka aynsima wakaymni.

⁵ Ka sam. Nah kiye barewyevwi hawkri ku pariye mpiyatinene. Hawata nah kiyemina madikte ku pariye pikehni. Nah kawnata miyeh pidatnivyene.

⁶ Pimkanit nah tarak nuwakuh akak piriyepkawka; kewa waxribe arabyuvye un, nah arabyu piharit avititak nuyakni.

⁷ Kiyavwiye Uhokri, kaytwanaba nuwnuh kibehtenwa, mmanawa nah kuwis biyukse madikte nukamaxwan! Ka ba ayamwa nuwhu kahadbe nah ka humewvima kewa nerasbe ku pariye muhukwiye gibetitkis miyaravye.

⁸ Nah kamaxwa pivitit awaku hawkanawa nah timap awnaka amin pamnihra. Nuviryepkawni wagah pimkanit; uya akka nutuh ahin ku pariye amawka nah wew nivigku!

⁹ Kiyavwiye Uhokri, wiwhnanuba giwkis nuvetunyavu, mmanawa pivititnewa nah uti ayamwaki!

¹⁰ Pisnewa nuwohkiga; uya kannuhun keh ku pariye pimawkan. Numawkan pitip humaw kibeyne nukakuh. Hawata adahan ig huwithan avigku ahin inyewatnene.

¹¹ Kiyavwiye, avuriwnanuba ku samah pikaksan nutuh. Hawata awaku pis waditye, uya wiwhun ariw kiyimwiki.

¹² Uya pisenwa gihawkankis nuvetunyavu, awaku ku samah pis batek nukakuh; pisenwa gikakkis madikte ku pariye nuharaksetnivwi, mmanawa nah pibuk.