Sawmus 142 - Uhokri Gahegbetawni Nukune akak Sawmus

Piriyepkawka adahan ayavasawka

¹ Nah kabiman git Kiyavwiye Uhokri adahan amnihswene. Nah ayap git adahan ig parak abet nuhawkan.

² Madikte arikna nah kamiyavak git hawata nah kinetihwa git amin nuhawkan.

³ Ku aysaw nah bawki, ig hiyak ku pariye amawka nah keh. Avigku ahin ku kiw nah wew nuvetunyavu ahegbeta pahayku tey adahan nukamaxwitni.

⁴ Nah iveg han kihehavrikut, nah ka hiyap pahavwinema hiyeg ayta hiyakun. Yuma pahavwinema adahan numaptenten, yuma pahavwinema adahan navuriwten.

⁵ Kiyavwiye, nah kabiman adahan amnihswene pit. Kiyavwiye Uhokri, pisnewa numaptenten. Pisnewa madikte ku pariye numawkan amadga inin.

⁶ Uya timap namnihswan, mmanawa nah ka hiyak ku pariye nah keh akiw. Uya amnih wiwhun giwkis nuvetunyavu, mmanawa igkis ka aynsima datte mpiyan.

⁷ Uya amnih wiwhun ariw inin nuhiyvan mbeyne, nahme kabayhapnek abet givahdukawnikis pihiyegavu awaku pis ka pabaysima nukakuh.