Sawmus 14 - Uhokri Gahegbetawni Nukune akak Sawmus

Hiyeg kane hiyak hawkri

¹ Hiyeg ku pariye awna: “Uhokri yuma ay amadga hawkri.” Ignes ka hiyak hawkri. Akebi neras hiyeg igkis puvavye. Madikte ku pariye gikehnikis ayge nibet taraksakinenwa. Yuma pahavwinema gaytakkis keh ku pariye waditnene avigkut hiyakemniki kibeyne.

² Igme Kiyavwiye Uhokri Dehetniye ig iveg inuriktak gimkanitkis madikte hiyegviyenevwi adahan hiyepne ba ay pahavwiwatma ku pariye hiyekemniye hiyeg. Ig hiyepne ba ay pahavwiwatma ku pariye batekye gikak.

³ Heneme igkis madikte taraksevyekuye gihiyekemnikis ariw ku pariye kibeynewatnene hiyakemniki. Igkis hennep taraksevyekuye abet ku pariye gikehnikis. Yuma pahavwinema ku pariye kehne kabayka. Yumahwatbaki pahavwinema.

⁴ Ig Kiyavwiye Uhokri Dehetniye ayap: “Mmah madikte neras hiyeg ka pukuhpa pahatnama nuhiyekemni? Mmah madikte igkis ka kannuhwekere amin nuhiyekemni? Mmahkama igkis wew he kehnenenwa mbayka gikakkis nuhiyegavu ke wotbe in waditnabe. Igkis ka ayap hiyakemniki nutuh.”

⁵ Heneme aysawnemenek igkis segkebdinek akak madikte gavisnikis, mmanawa ig Kiyavwiye Uhokri ay gikakkis hiyeg wadityevwi.

⁶ Hiyeg mbayavye igkis battukaw mpithabdi gihawkankis hiyeg madiptavye kahadbe ignes ka uti kabayka. Heneme ig Kiyavwiye Uhokri Dehetniye ig ahegbet adahan gimaptentenkis gihiyegavu ariw madikte mbeyne.

⁷ Kiyavwiye Uhokri, usuh wahap ku wamnihten aytanek avititak Jerusalém adahan wamnihten usuh pihiyegavu izhaewyenevwi. Avim ini ku aysaw pis kehnek ini kabayka danuh wotuh, usuh pihiyegavu bateknek ka aynsima.