Sawmus 139 - Uhokri Gahegbetawni Nukune akak Sawmus

Uhokri ay nukakuh takunipti avanenekwa

¹ Kiyavwiye Uhokri, pis hiyak madikte ku pariye ay abet nuhiyekemni. Pivegi paduk ta avitit nuyakni adahan hiyepne madikte ku pariye ay abet nuhiyekemni.

² Pis hiyap madikte ku pariye nukehni. Pis hiyap ku aysaw nah batahkiswa. Pis hiyap ku aysaw nah kannikaw. Hiyawa nah piyawakad piw, heneme pis hiyak ku pariye ay abet nuhiyekemni.

³ Pis hiyak ku kit nah wew. Pis hiyak ku kiney nah himak. Pis hiyak madikte nukehni.

⁴ Avit nah awna, ayipa pis kuwis hiyak ku pariye nah awnakere, Kiyavwiye.

⁵ Pis muwapuw nanwa. Pisnewa ay navitkig. Piswata ay nuharavrik. Pis sarayh piwak nuvitit.

⁶ Pis wakaymnisan mpiynevevye, ku samah pis hiyakun kabayntiwa. Nah ka ik adahan nah pukuhpin.

⁷ Kitkama nah uti iwetrit ku kiney pitip ka hiyavun? Kitkama nah bisik piw?

⁸ Hiyawa nah wagehe inurikute, aygewata pis. Hiyawa nah haritmin aynte amun miyaravye giwetrikis, aygewata pis.

⁹ Hiyawa nah amere tahan ku kitak kamuw pes, hiyawa nah misakwa aynte pakwa parahwokwa,

¹⁰ aygewata pis adahan nuhwitenten akak piwak, adahan nukamaxten ay piwaku.

¹¹ Hiyawa nah pukuhpaw, nah awna: “Inin amisnavye ayamun giw Kiyavwiye Uhokri. Kuwewanek inin puwivaka wageswe tiyegem adahan mpithene nah giw Kiyavwiye Uhokri.” Bawa ka henema in humaw.

¹² Amisnavye pit in ka amisnavyema. Tiyegem kabutenne pit hawata ke puwivakbe. Kabutniki akak amisnavye in hehpekuye ta pit.

¹³ Mmanawa pisnewa ku pariye kehe nuvituh pahavwite. Pisnewa humawasevun avim ini ku aysaw nah aynete gutunrik nnaguh.

¹⁴ Nah kabayhap awaku ku samah pis ka pikiytanisima. Madikte pannu in barewyekuye. Ini nah kuwis hiyak abet nuhiyekemni.

¹⁵ Minikwak pis hiyapni ku aysaw nuvituh humaw, ku aysaw nah hamehbetaki pawtak aynte gutunrik nnaguh, ayge nah aymuhwe yuma hiyeg ahiyekten mmahpa naymuhweven.

¹⁶ Avit nuvituh humaw pahavwite hiyeg, ayipa pis hiyavun. Avit nah amadga wayk, ayipa pis kuwis hiyak ku samah nayivwi ay. In ke wotbe pis kuwis tamekwinbe ayvekuye amadga pikagtan.

¹⁷ Kiyavwiye, nah ka aynsima batek ku samah pis avanenekwa ivegminenene pihiyekemni numinuh. Nah ka ik adahan nah pukuhni aysawvut.

¹⁸ Awaku in ka aynsima. In ke wotbe nah pukuhnebe kayh, nahme ka hiya nivukuhka madiktema. Hiyawa nah pukuhni ku samah numawkan, heneme in ka madikti.

¹⁹ Kiyavwiye, ka aynsima nah aharit adahan pis pisenwa gikakkis hiyeg mbayavye gihiyekemnikis. Hawata adahan neras umehekevutnevwi ayguhwa aytakihan nuwntak.

²⁰ Mmanawa igkis suguh pihiyekemni abetvi hiyeg. Igkis mbayha piw.

²¹ Kiyavwiye Uhokri, nah ka batek aynesnima gikakkis neras hiyeg ku pariye kane batek pikak! Nah ka amava gihiyekemnikis neras ku pariye suguhnap.

²² Nah ka batek gikakkis aynesnima. Avititakwa nuyakni nah ka batek gikakkis. Mmanawa ku pariye hiyeg pivetunyavu hawata igkis nuvetunyavuwata.

²³ Kiyavwiye Uhokri, ivegbetanaba nuhiyekemni ba in kabay pit! Uya hikekun adahan hiyepne ba nuhiyekemni inyewatma avigkutavrik ku samah pimawkan.

²⁴ Iwasanaba nudahan nuhiyekemni ba mbeyevye hiyakemniki ayge nibet ku pariye ik adahan keh nah miniw piw. Hawata uya amnih huwithan avigkuw ini kibeyne hiyakemniki ku pariye kane madikti.