Sawmus 138 - Uhokri Gahegbetawni Nukune akak Sawmus

Piriyepkawka adahan kabayhaki

¹ Kiyavwiye Uhokri, nah kabayhap akak madikte nuyakni. Hawata nah pak avat adahan kabeyhene piw giwtrikkis madikte uhokrivyenevwi.

² Awaku ku samah pamnihra akak pabay, nah paberetusaw nuhepka han avetunat pivin barewvitye. Nah kabayha piw. Mmanawa pis ekke ku piw akak pikumadukan in avitmin madikte arikna.

³ Ku aysaw nah kanumpep, pisme kaytwe nuwnuh, hawata akak pidatni, pis wagahkise nawaygi.

⁴ Kiyavwiye Uhokri, madikte ikivaratviyenevwi amadgayavu wayk igkis kabayhapnek ku aysaw igkis timapnek arak pikaksan.

⁵ Igkis paknek amin arikna ku pariye pis, Kiyavwiye, kehe, mmanawa pikiytani in ka aynsima.

⁶ Pis aynte inurik, heneme akak ini pis avuriw neras tuwatasewnevwi. Igkisme kawantiyavye pis ka avuriwgikis.

⁷ Ku aysaw nah abet mbeyne, pisme iki nutuh piw. Mmanawa pis in mpithan ariw nuvetunyavu gidagonikis. Pis amnihun gavit pidatni.

⁸ Pis kehnek madikte ku pariye pikaksan nutuh. Kiyavwiye, pamnihra dahwa adahan avanenekwa. Ka ba tukuhpima inin annivwit ku pariye pis kavuse.