Sawmus 137 - Uhokri Gahegbetawni Nukune akak Sawmus

Kadniki aharit uwaxig

¹ Akigbimna warik aynte Babilônia usuh ubetki bat, usuh tihene, ku aysaw usuh kiye Jerusalém.

² Usuh mawihave wagigni hebek ta avewit ah ku pariye ayge.

³ Nerasme ku pariye uwepten atere kewa kamaxkavube igkis keh usuh pak avat. Igkis awna: “Paknay udahan avatman siyawhyene.”

⁴ Heneme, aynte avit waxri nawwotunye, mmahpaki ik adahan usuh pak pahat avat gidahan Kiyavwiye Uhokri?

⁵ Jerusalém, ku nah miyehpepnek, amawka ka takunima akiw nah agigha hebek.

⁶ Amawka ka takunima akiw nah pak avat, ku nah ka kiyepi, ku nah ka ivegmina nuhiyekemni amin ku samah pisnewa batekka kane aynsima adahan naymuhwan.

⁷ Kiyavwiye Uhokri, kiyenaba ku pariye edohyenevwi gikehnikis ariwntak ku samah Jerusalém matekepka gavitkis suwtat babilonyenevwi. Kiyenaba ku samah igkis awna: “Mehbetepnay Jerusalém danuhte waykborit!”

⁸ Pisme paytwempu Babilônia, pis mehbetepkanek! Ka aynsima kabaykanek gidahankis hiyeg ku pariye kehpiye hene pikak ku samah pis kehe ukakuh.

⁹ Neras ku pariye kamaxavevyenek pikamkayuvwi hawata batakwasevyenek igkis ta avitit tip.