Sawmus 135 - Uhokri Gahegbetawni Nukune akak Sawmus

Avat adahan kabayhaki

¹ Kabayhanay Kiyavwiye Uhokri! Kabayhanay giw, yis Kiyavwiye Uhokri gibukvigyenevwi,

² yis ku pariye kehnevwi gibetki ay givineku, ay ariku uwohkigawiy givin.

³ Kabayhanay Kiyavwiye Uhokri awaku ig kibeyne. Paknay adahan kabeyhene giw awaku ig ka gabaysima.

⁴ Mmanawa ig kaniye amekene Jakó adahan ig humaw gidahan. Ig kaniye madikte izhaewyenevwi adahan igkis humaw gidahan gihiyegavu.

⁵ Nah hiyakni ku Kiyavwiye Uhokri ig ka gikiytanisima. Ig avitmin madikte ku karit hiyeg kawohkigahaw.

⁶ Ig Kiyavwiye Uhokri ka gidatnisima adahan ig keh ku pariye ig kehkere, aynte inurik hawata ay amadga wayk, aynte parahwokwa hawata ay awenumavrik.

⁷ Ig kannikasa ukuhne aytontak aranwatak amaksemni waxri. Ig keh ugugune uguhwa adahan muwok wayk. Ig kannikasa kamaygviye ariwntak nikankewkeg.

⁸ Minikwak ig umahkisave madikte egutyevwi ikamkaytivyene aynte avit Ejitumnaw, hiyeg gikamkayhkis payak akak puwikne akamkayuvwi.

⁹ Ayge ig kehe barewyevwi annut adahan hiyapkisne git Faraó payak gikakkis gihiyegavu.

¹⁰ Ayteke ig pisenwe gikakkis ka aynsima hiyegviyenevwi payak gikakkis ikivaratviyenevwi detyevwi.

¹¹ Ig umahkise amekene Seoh, ku pariye amohewyenevwi gikivarakis. Ig umahkise amekene Ogi, ku pariye kumadukene aynte Basahmnaw. Hawata ig umahkisave madikte ikivaratviyenevwi ku pariye misekwenevwi avit Kanaahmnaw.

¹² Ig ike neras ikivaratviyenevwi giwaxigkis ta gitkis gihiyegavu izhaewyenevwi adahan in humaw giwaxigkis.

¹³ Kiyavwiye, madikte hiyeg hiyakpinek ku pisnewa Kiyavwiye Uhokri adahan avanenekwa. Madikte usuh kiyepinek adahan avanenekwa, usuh gikakkis ukamkayuvwi payak gikakkis ukamkayuvwi gihiwhivwikis akiw.

¹⁴ Kiyavwiye Uhokri, pis kaviksa pihiyegavu. Pis amnihgikisnek akak madikte pabay.

¹⁵ Igkisme giwohkigavukis nawenyevwi hiyegviyene igkis kehka akak karukri seyno hawata akak karukri wahano, igkis kehka gavitkis awaykemni.

¹⁶ Kadahan gibiykis, heneme igkis ka awna; kadahan giwtyakkis, heneme igkis ka hiyap.

¹⁷ Kadahan gitaybikis, heneme igkis ka timap; igkis kawnata ik adahan kahikanaw.

¹⁸ Neras ku pariye gibetketnikis hawata ku pariye gikiytetnikis, igkis misekwebdinek hawata kewa ignesbe ahehpakti bataka ka hiyak ariknawnama.

¹⁹ Kabayhanay Kiyavwiye Uhokri, yis gihiyegavu izhaewyenevwi. Yis Uhokri gimuwvegavu, kabayhanay Kiyavwiye Uhokri.

²⁰ Yis gayavetnivwi muwvegviyenevwi, kabayhanay Kiyavwiye Uhokri. Madikte yis ku pariye ihpenevwi giwn, kabayhanigbay.

²¹ Kabayhanay Kiyavwiye Uhokri avit giwaxig Siyawh, avit paytwempu Jerusalém, ku kiney ig misakwa. Kabayhanay Kiyavwiye Uhokri!