Sawmus 132 - Uhokri Gahegbetawni Nukune akak Sawmus

Davi gikaksan git Uhokri, Uhokrime gikaksan git Davi

¹ Kiyavwiye Uhokri, kiyenaba Davi, hawata madikte gihiyvan mbeyne.

² Kiyenaba ku pariye gikaksan pit, pis Jakó giwohkiga detye. Ig kanumwa adahan givit

³ ku ig diyuhnek givinekut, ig mayaknek

⁴ ig dukugisnek hawata ig himaknek

⁵ nekwa ig utinek pahayku iwetrit adahan Kiyavwiye Uhokri giwskeki. Hennewatbaki ig utepniwa ini iwetrit, ig kannikase paha payt ayge pidahan, pis Jakó giwohkiga detye.

⁶ Mmanawa aynte avit Belém, usuh time arak egu kiyes ku pariye abeyheki Uhokri gahegbetawni ku eg kuwis diyuhkiswika wotuh, nikwe usuh utevgu ayge amadga amatap kewye Jearih.

⁷ Usuh hiyapni hene, usuh awna: “Kibeyne, uyay waxwig atere givinekut Kiyavwiye Uhokri! Kahadbe wixwiy kiyathig atere avetun gevwi kiyatyo.”

⁸ Kiyavwiye, ba ayta arimkanit pivin, payak akak egu kiyes adahan pahegbetawni, ku pariye areketni pidatni. Umawkan pis misakwa ayge adahan avanenekwa!

⁹ Amawka pimuwvegavu ayge keh avanenekwa ku pariye wadit. Ayge nikwe pihiyegavu kamaxwenevwi pivitit igkis batekyekuyesnek.

¹⁰ Kiyavwiye Uhokri, pis hawata ikakse pahat annut git pibuk Davi. Nikwe, ka ba miniw ariw piwn git ner ikivarat ku pariye pis kaniye.

¹¹ Inakni pikaksan git Davi, in inyewa. Pis ka diyuhkiswanek butte niw. Pis awna git: “Nah kehnek pahavwi gaytakkis pikamkayuvwi humawnek ikivarat. Ig kumadukanek butte piw.

¹² Ku igkis pikamkayuvwi tiviknene kamaxwenene avitit nahegbetawni, ku igkis ihpenene nukumadukan ku pariye nah ike yit, nikwe hawata gikamkayuvwikis akiwka akiw igkis humawnek ikivarat.”

¹³ Kibeyne, ig Kiyavwiye Uhokri kaniye inin waxri Siyawh. Igwa muwaka giwskeki ayge. Ig awna:

¹⁴ “Ay avit Jerusalém nah misakwanek adahan avanenekwa. Aytaki kuri nah muwaka kumaduka.

¹⁵ Nah kehnek yuma muwekne gitkis Jerusalémyenevwi. Nah ikinek ka aynsima axka gitkis madiptavye aynenevwi.

¹⁶ Nah saraynek kabayka avitit madikte gimuwvegavukis gikehnikis gidahankis. Igkisme Jerusalémyenevwi igkis paknek, igkis batekyekuyesnek giminkis.

¹⁷ Aysawnemenek ay avit Jerusalém nah kannikasanek pahavwi Davi gihiwhi. Igme humawnek detye ikivarat. Hawata akiw gihiwhivwi ner ikivarat kaniyka, ignes hawata humawnek detyevwinenwa hiyeg.

¹⁸ Nah marekenek givetunyavu. Igme misakwa kumadukenenek gihiyegavu akak madikte gikiytani.”