Sawmus 130 - Uhokri Gahegbetawni Nukune akak Sawmus

Nah wahepne Uhokri parak abet nuhawkan

¹ Kiyavwiye Uhokri, abetnewa nuwakemni nah kanum piw.

² Timapnaba nubiman, Kiyavwiye! Ataybiswanaba arimkanit namnihswan.

³ Wake pis kehbe pahak kagta adahan ekkene uvathawni, pariye isahptewviyekam ariw mbeyne?

⁴ Heneme pis bayahmina usuh ariw utaraksan. Inneki keh usuh ihpa piwn.

⁵ Akak madikte nukamaxwan nah wahepne Kiyavwiye Uhokri parak abet nuhawkan. Nah kamaxwa avitit giwn.

⁶ Nah wahap giwntak Kiyavwiye mpiy suwtat ku pariye wahepne hewkepka, Henewatbaki, mpiy suwtat ku pariye wahepne kamuw pes.

⁷ Nukebyuvwi izhaewyenevwi, kamaxwanabay givitit Kiyavwiye Uhokri, mmanawa gamnihra in inyewa. Ig avanenekwa ahegbet adahan amnihwiy.

⁸ Ig amnihnek gihiyegavu izhaewyenevwi ariw madikte givathawnikis.