Sawmus 125 - Uhokri Gahegbetawni Nukune akak Sawmus

Uhokri ay ganwakis gihiyegavu

¹ Hiyeg ku pariye kamaxwenevwi givitit Kiyavwiye Uhokri, ignes kewa waxri Siyawhbe, ku kavit Jerusalém misakwa. Yuma ariknawnama hiya gisamanakkisnek.

² Ku samah waxribdi imuwadminene ay aranwa Jerusalém, hene ig Kiyavwiye Uhokri ay ganwakis gihiyegavu. Igkis ay giwanmaku ku akak inin hawata adahan avanenekwa.

³ Hiyeg mbayavye ka kumadukanek Uhokri gihiyegavu adahan avanenekwatma. Ig Kiyavwiye ka isaksanek igkis mpiksaptih gihiyegavu adahan ignesme keh ku pariye kane wadit.

⁴ Kiyavwiye Uhokri, kehnaba kabayka gikakkis hiyeg ku pariye wadityevwi!

⁵ Igkisme neras ku pariye tukuhwevye ariw pihiyekemni, igkis katiwnihnek gitaraksankis payak gikakkis neras mbayavye gihiyekemnikis. Hene izhaewyenevwi misakwanek akak pasamraka. Igkis misakwa karisaw adahan avanenekwa!