Sawmus 121 - Uhokri Gahegbetawni Nukune akak Sawmus

Kiyavwiye Uhokri kis adahan wis kamaxwa givitit

¹ Nah sarayh nuvegi arimkanit waxribdi. Nah awna: “Pariye ayta amnihun kuri?”

² Namnihten ignewa Kiyavwiye Uhokri, ku pariye humawase waxri akak en.

³ Nukebyih, ig kis adahan pis kamaxwa givitit. Ig ka isaksati pis tuguhnek, mmanawa ner ku pariye pimaptenten ig avuriwnenekwa. Ig avanenekwa ahegbet adahan parak abet pihawkan.

⁴ Ig izhaewyenevwi gimaptentenkis ig ka himakti, ine ig kawnata himekbetawti.

⁵ Ig Kiyavwiye Uhokri ig pikavriwten. Ig avanenekwa ay pihumwa adahan pimaptenten.

⁶ Kamuw ka kehpinek mbay puwivak. Kayg kawnata kehpinek mbay tiyegem.

⁷ Ig Kiyavwiye Uhokri bayahpinek ariw madikte mbeyne. Ig ka isaksanek mbeyne danuh pit.

⁸ Ig avuriwpinek ku aysaw pis tivikwiye hawata ku aysaw pis diyuhpiye, ku akak inin hawata avanenekwa.