Sawmus 119 - Uhokri Gahegbetawni Nukune akak Sawmus

Uhokri giwn, gikumadukan, gannasan

¹ Ka aynsima kabaykanek gidahankis hiyeg ku pariye wewnevwi wadit, avigkutavrik Kiyavwiye Uhokri gikumadukan.

² Ka aynsima kabaykanek gidahankis hiyeg ku pariye ihpenevwi ignewa Kiyavwiye Uhokri giwn hawata ku pariye mpiksewnevwi giharit Kiyavwiye Uhokri akak madikte gimaviswankis.

³ Ka aynsima kabaykanek gidahankis hiyeg ku pariye ka taraksa gikak pahavwinema hiyeg, igkis wew avigkuw Kiyavwiye Uhokri gihiyekemni.

⁴ Kibeyne, Kiyavwiye, pis ike wotuh pikumadukan. Pis aye wotuh adahan usuhme tiviknene wewnene avigku pihiyekemni avanenekwa.

⁵ Kiyavwiye, avititakwa nuyakni nah ihpekere ini pikumadukan. Nah ka muwaka taraksin aynesnima.

⁶ Ku nah ikatuswanek arit madikte pikumadukan, nikwe nah ka marakwanek nuvituh.

⁷ Ku nah hiyekenek ku nah kuwis wewnene avigkutavrik ini pikannuhakni waditye, nikwe nah kabayhapnek ka aynsima.

⁸ Kiyavwiye, nah battukawnek ihpa pikumadukan. Ka ba ehwapmanek nukakuh ku nah ka huwitnek arit. Kiyaknihwanabanek nukakuh.

Ihpenevwi Uhokri giwn

⁹ Mmahpa pahavwi takweye ik adahan avuriw gihiyekemni barewbet? Ku ig avuriwni ku samah pannasan awna, nikwe gihiyekemni barewbetnenekwa.

¹⁰ Nah mpiksewnene wew akak pihiyekemni avititakwa nuyakni. Ka ba isaksa nah dagah ariw pikumadukan.

¹¹ Nah kiyenenekwa piwn abet nuhiyekemni kahadbe nah ka taraksa pikak.

¹² Nah kabayhap, Kiyavwiye! Uya kannuhun amin pihiyekemni adahan waymuhwan.

¹³ Nah nubetki awna gitkis hiyeg akak nuhawna inwata iwit ku pariye pis awna adahan usuh keh.

¹⁴ Nah pi batekte adahan wew avigku pikumadukan mpiya ariw ku nah kadahan ka aynsima igiska.

¹⁵ Nah avanenekwa ivegmina nuhiyekemni amin pihiyekemni. Nah kiyenenekwa ini pikumadukan.

¹⁶ Ka nubetkisima ku aysaw nah keh avigkutavrik pihiyekemni. Nah ka miyehnek ini pannasan.

Batekka adahan Uhokri gikumadukan

¹⁷ Kiyavwiye, kehnaba kabayka nukakuh, nah pibuk, adahan nah tiviknene aymuhwenene hawata adahan nah ihpenene piwn ay amadga inin.

¹⁸ Uya woka nudahan nuhiyekemni kahadbe nah hiyak ini pihiyekemni barewyewatnene ariwntak pannasan.

¹⁹ Nah he mpiyevyenen avitiw inin waxri. Uya akka nutuh ini pikumadukan huwewehe marihwa nah ik adahan huwithasaw nit.

²⁰ Nutivuh ka aynsima aharitkere pikumadukan, mmanawa avanenekwa nah muwaka hiyak ku pariye pimawkan.

²¹ Pis himah hiyeg ku pariye kane kumadukasewkere pit; neras ibiytahakare ku pariye kane huwithasewkere arit pikumadukan.

²² Uya amnih wiwhun ariw mahivwihka ku pariye igkis awna numinuh, mmanawa nah ihpene pikumadukan.

²³ Hiyawa hiyegviyenevwi gikivarakis pahadguhwe adahan mbeyhene nuwhu, heneme nah pibuk, nah ikinek nuhiyekemni arimkanit pikumadukan.

²⁴ Nah ka nubetkisima akak pikumadukan, mmanawa innewa naydhetni adahan ikine nuhiyekemni.

Uya kannuhun amin pikumadukan

²⁵ Nah kuwis matekepka. Nah kuwis harit waykbor. Uya iki nutuh nukune nawaygi akiw, ku samah pis ikakse nutuh.

²⁶ Kibeyne nah ekke pit madikte ku pariye nukehni. Pisme kaytwe nuwnuh. Kiyavwiye, uya kannuhun amin pikumadukan.

²⁷ Uya keh nah pukuhpin kiyeste akiw, kahadbe nahme ivegminene nuhiyekemni amin ini pikiyakemni kibeynewatnene nudahan.

²⁸ Nah ka aynsima kadni. Nah tih aynte avit nuyakni. Uya amnih iki nutuh nawaygi akiw, ku samah pis ikakse nutuh.

²⁹ Ka ba isaksa nah wew akak hiyakemniki taraksebdivye. Heneme uya kannuhun amin pikumadukan akak pabay.

³⁰ Nah kuwis kaniye adahan nah wewne akak pihiyekemni inyewatnene. Hawata nah battukewnene ihpa ini pikumadukan adahan waymuhwan.

³¹ Kiyavwiye Uhokri, nah mpiksewnene wew akak pikannuhakni; ka ba isaksa nah marekepma nuvituh. Keh nah mataka ini ku pariye nah aharit.

³² Nah iwawhaw ihpa pihiyekemni, mmanawa nah aharit pukuhpa kiyeste akiw pikumadukan.

Keh nah pukuhpa pikumadukan

³³ Kiyavwiye Uhokri, uya kannuhun adahan nah pukuhpa pihiyekemni, adahan nah wew nivigku avanenekwa.

³⁴ Keh nah pukuhpin, kahadbe nah wew nikak avititakwa nuyakni.

³⁵ Huwithanuba avigkut pikumadukan. Innewa keh nah batek.

³⁶ Kehnaba nah batek akak pihiyekemni mpiy ariw igiska amadgaya inin.

³⁷ Ka ba isaksa nah ivegmina nuhiyekemni arimkanit arikna ku pariye yumanene awaygi. Kabaynaba nukakuh, ku samah pikaksan.

³⁸ Uya kahayaksa inyewa ku pariye pikaksan nutuh, nah pibuk, kahadbe nah inyewa avis taraksa pikak.

³⁹ Nah kuwis avise ku nawenetke nah kawih maraki akak nutaraksan ay pivetun. Kiyavwiye, ka ba isaksa inin danuh nutuh. Kibeyne pikumadukan kibeynewa adahan keh nah ka taraksa pikak.

⁴⁰ Nah wewkere akak ini pikumadukan kabayntiwa ku samah pimawkan. Kehnaba nuhiyekemni wadit, ku samah pihiyekemni waditye.

Nah kamaxwa avitit pannasan

⁴¹ Kiyavwiye Uhokri, kehnaba nah kayah ini pibetki nukakuh. Hawata uya amnihun ku samah pis ikakse nutuh.

⁴² Kahadbe nah kannuh kaytwa giwnkis neras ku pariye numahivwihtnivwi, mmanawa nah kamaxwa avitit pannasan.

⁴³ Ka ba isaksa nah miyeh inakni iwit inyewatnene, mmanawa nah kamaxwa avitit pihiyekemni kibeyne.

⁴⁴ Hewkevye nah mpiksawnek adahan ihpa pikumadukan, adahan avanenekwa nah wewne nikak.

⁴⁵ Kahadbe yuma ariknawnama avisasannek, mmanawa nah mpiksewnene keh ku pariye pis ayap nutuh.

⁴⁶ Hene nah kinetihwanek amin pikumadukan gitkis ikivaratviyenevwi. Nah ka maraka nuvituhnek gitivutkis.

⁴⁷ In pikumadukan ewk batekka nutuh, mmanawa nah bateke nikak.

⁴⁸ Nah taraknek nuwakuh adahan amevene ini pikumadukan, ku pariye nah inyewa bateke nikak. Nah ikinek nuhiyekemni nimkat avanenekwa.

Pikaksan iki nawaygi

⁴⁹ Kiyenaba pikaksan nutuh, nah pibuk, ku pariye kavit pis ike nawaygi adahan nah wahap akak madikte nukamaxwan.

⁵⁰ Ku aysaw nah bet mbeyne, in aydhaptipen, in ike nawaygi adahan nah patiptekene mbeyne.

⁵¹ Neras ikewnevwi kabaytenene, igkis avanenekwa mahivwihun. Heneme ka sam nutuh, nah ka miniw ariw ini pihiyekemni.

⁵² Kiyavwiye, minikwaknawa pikumadukan ekke wotuh ku samah in inyewa. Inneki keh nah iwi nawaygi niwntak.

⁵³ Ku aysaw nah hiyap hiyeg mbayavye ka wewkere avigku ini pikumadukan, in keh nah dagawnaw gitkis ka aynsima.

⁵⁴ Ku aysaw nah aynetenek amadga inin hawkri, nah kehnenekwa avatnek akak ini pihiyekemni barewye.

⁵⁵ Kiyavwiye, ku aysaw nah iveg tiyegem, nah ivegmina nuhiyekemni amin pihiyekemni. Numawkan nah ihpenenekwa pikumadukan.

⁵⁶ Nannivwi kuri amadga inin, numawkan na ihpene piwn.

Nah ka miniw ariw pihiyekemni

⁵⁷ Kiyavwiye, pisnewa madikte nudahan. Nah ikaksa pit ku nah inyewa ihpanek piwn.

⁵⁸ Avititakwa nuyakni nah aya pit: uya amnihun, keh ku samah pikaksan nutuh!

⁵⁹ Nah kuwis ivegmina nuhiyekemni adahan mmahpa nah wew, nah ikaksa pit ku nah inyewa wewnek avigkutavrik pihiyekemni.

⁶⁰ Nah ka ayivwihwanek adahan ihpin.

⁶¹ Hiyeg mbayavye aharitnene adahan wageswiye nuhiyekemni piw, heneme nah ka miniw ariw pihiyekemni.

⁶² Pabuskak mitipka nah kannikaw, nah kabeyhene piw adahan pikumadukan waditye.

⁶³ Nah gikagmadakis madikte hiyeg ku pariye kiyathap hawata ku pariye ihpenevwi pikumadukan.

⁶⁴ Kiyavwiye, waxri kuwis kivun akak areketni pamnihra. Uya kannuhun amin pihiyekemni.

Pikumadukan ka waditnevyenenma

⁶⁵ Kiyavwiye, kibeyne pis kehe kabayka nukakuh, nah pibuk, ku samah pis ikakse nutuh.

⁶⁶ Uya kannuhun amin pihiyekemni kahadbe nah hiyak ku pariye wadit, mmanawa nah iveg avitit pikumadukan.

⁶⁷ Minikwak ku samah nah kote hiyapte mbeyne, nah wew akak nudahanwa nuhiyekemni amadgaya inin, heneme kuri nah wewkere akak pidahan pihiyekemni kibeyne.

⁶⁸ Kiyavwiye, pisnewa kibeyne. Pisnewa keh kabayka. Uya kannuhun amin ku pariye pis muwaka nah keh.

⁶⁹ Hiyeg ku pariye kane kumadukasewkere pit, igkis wasaymaw nudahan, heneme akak ini, akak madikte nubetki, nah nudukwenewa ihpenene piwn.

⁷⁰ Ignes hiyeg dahkise giyaknikis piw. Nahme batek akak pikumadukan.

⁷¹ Kibeynekata nah hiyap mbeyne. Inneki keh nah kannuhwa amin pihiyekemni.

⁷² In pannasan ku pariye pes piwntak in pi awaygte nutuh ariw madikte igiska amadgaya inin.

Pihiyekemni in waditye

⁷³ Kiyavwiye Uhokri, pisnewa kehe nuvituh humaw payak akak nuhiyekemni. Kuri, uya kannuhun adahan nah pukuhpa pikumadukan.

⁷⁴ Neras ku pariye kiyathap igkis bateke giminkis ku aysaw igkis hiyavun, mmanawa nah kiyathap hawata nah kamaxwa avitit piwn.

⁷⁵ Kiyavwiye, nah hiyak ku pihiyekemni in wadit avigkut hiyakemniki. Pis muwaka amnihun, inneki keh pis isakse ini mbeyne danuhe nutuh.

⁷⁶ Ka sam. Nah muwaka pis ayta aydhan akak ini pamnihra ku samah pis ikakse nutuh, nah pibuk.

⁷⁷ Uya amnih iki nutuh nudehetni kahadbe nah tiviknene ay amadga inin, mmanawa nah batek akak pikumadukan.

⁷⁸ Neras ku pariye kawantiyavye igkis ka aynsima kanumtevun waditnevyenen. Uya keh igkis mara akak giwasemnikis. Nahme numawkan nah ikatuswenenekwa arit piwn.

⁷⁹ Nerasme ku pariye avisnevwi pibohri, neras ku pariye hiyeknevwi pikumadukan, numawkan igkis ayta misakwa nuwntak.

⁸⁰ Numawkan nuhiyekemni barewbet ariw taraksaki, kahadbe nah taraksema pikumadukan hawata adahan nah ka marekema nuvituh.

Nah kuwis wahap ayivwad kuwis adahan pis amnihun

⁸¹ Kiyavwiye, nah kuwis wahap ayivwad kuwis adahan pis ayta amnihun. Nah ka aynsima wakaymni. Heneme nah nudukwenewa kamaxwenene avitit piwn.

⁸² Mataytak hewke tiyegem nah misakwa avuriwvarimpi adahan wahepne ku pariye pikaksan nutuh, he nuwtyak mabip. Nah awna: “Aysawhki pis ayta amnihun?”

⁸³ Nah ka kawih akiw, nah ke puwiknebe amar ku pariye harit abet tiket, madikte aravwi, heneme nah ka miyeh adahan keh ku samah pikumadukan awna.

⁸⁴ Aysawhki ayivwi adahan nah wahap akiw? Kabetvahki pis hiyapkisnek gitkis neras ku pariye nuharaksetnivwi?

⁸⁵ Ignes kawantiyavye, ku pariye ka ihpekere pikumadukan, igkis ahegbetave tey adahan nukamaxwitni.

⁸⁶ Kiskama madikte pikumadukan in ihpaka. Hiyaksa igkisme ka ihpin. Igkis haraksan waditnevyenen. Uya amnihun.

⁸⁷ Igkis kaba umehpen, heneme nah ka miniw ariw pikannuhakni.

⁸⁸ Uya amnihun. Iki nutuh nawaygi akiw, mmanawa nah hiyak ku pis batek nukakuh. Ku pis iki nawaygi akiw, nikwe nahme ihpanek madikte iwit ku pariye pes pibiyaptak.

Uhokri gihiyekemni ka mpiyati

⁸⁹ Kiyavwiye Uhokri, piwn in dahwa adahan avanenekwa. In dahwa avanenekwa ke inurikbe.

⁹⁰ Ku samah piwn in tiviknene avanenekwa, pis ike waxri niwetrimadgat in ka higihwati akiw.

⁹¹ Madikte ariknebdi dahwa kuviknene akak inin ku samah piwn, mmanawa madikte wew avigkutavrik ku samah pimawkan.

⁹² Wake nah ka batekbe akak pikumadukan, kuwiskama nah miyavikam awaku mbeyne ku pariye nah hiyap.

⁹³ Nah ka miyehtinek pikumadukan, mmanawa nivitimpi pis ike nawaygi, pis ka isaksa nah biyuksa nudehetni.

⁹⁴ Kiyavwiye, nah pidahan! Uya amnihun, mmanawa nah kuwis mpiksaw ihpa pikumadukan.

⁹⁵ Hiyeg mbayavye kuwis wahepbet adahan nuwmepten, heneme nah ikinene nuhiyekemni arimkanit pikumadukan.

⁹⁶ Nah kuwis avuriw ku madikte ariknebdi amadga inin in kadahan niwetu, heneme pikumadukan in kawih adahan madikte.

Nah ka nubetkisima akak pikumadukan

⁹⁷ Nah ka nubetkisima akak pikumadukan. Nah iki nuhiyekemni nimkat mataytak.

⁹⁸ In pikumadukan avanenekwa ay nukakuh. In keh nah pi hiyekemnite giwkis nuvetunyavu.

⁹⁹ Nah pukuhpate waymuhwan mpiy giwkis nukannuhtenvu, mmanawa nah ikatuswa arimkat pikannuhakni.

¹⁰⁰ Nah hiyakte hawkri giwkis kiyavwiyegben, mmanawa nah ihpa pikannuhakni.

¹⁰¹ Nah ka atakti sibuh avigkut pahatnama ahin mbeyviye kahadbe nah ik adahan ihpenene piwn.

¹⁰² Nah battukaw wew avigkut pikumadukan avanenekwa, mmanawa pisnewa kannuhun.

¹⁰³ Nah ka nubetkisima akak piwn, mmanawa in ka aynsima kitete ariw ahayak anunu.

¹⁰⁴ Nah uti nuhiyekemni ariwntak pikumadukan hene nah tukuhave madikte ahin adahan kinisaka.

Piwn in kewa abukribe

¹⁰⁵ Inakni piwn in kewa abukribe adahan uguhavrikune nuhina. In kabutniki adahan nuhwitenten.

¹⁰⁶ Nah kehnek ku samah nuwnuh pit. Nah ihpanek pikumadukan ku pariye waditye.

¹⁰⁷ Kiyavwiye Uhokri, nuhiyvan mbeyne in mbeyevye; uya iki nutuh nudatni akiw ku samah pikaksan.

¹⁰⁸ Kiyavwiye, uya amava nuviryepkawni adahan kabeyhene piw. Uya kannuhun amin pikumadukan.

¹⁰⁹ Nah avanenekwa abet mbeyne. Heneme abetnewa ini nah ka miyeh pikumadukan.

¹¹⁰ Hiyeg mbayavye ahegbeta tey nudahan, heneme nah ka miniw ariw pikumadukan.

¹¹¹ In pikumadukan innewa nudahan avanenekwa. In keh nuyakni batek.

¹¹² Nah kuwis ahegbete nuhiyekemni adahan nah ihpene pikumadukan danuhte amaksemni nuwewni pikak.

Nah kiyathanek pikumadukan avanenekwa

¹¹³ Nah amiyha hiyeg ku pariye ka wewkere inyewatma pikak, heneme nah batek akak pikumadukan.

¹¹⁴ Pisnewa nayemwekri. Pisnewa numaptenten. Nah kamaxwa avitit piwn.

¹¹⁵ Higihwanay nuwhu, yis hiyeg mbayavye, kahadbe nah ihpa Kiyavwiye Uhokri gikumadukan.

¹¹⁶ Ikinaba nawaygi, ku samah pikaksan nutuh, nikwe nahme kadeheten. Ka ba isaksa nukamaxwan pivitit in hiyapka waditnevyenen.

¹¹⁷ Uya parak abet nuhawkan kahadbe nahme isahptaw giwkis hiyeg mbayavye. Nahme kiyathanek pikumadukan avanenekwa.

¹¹⁸ Pis tukuh madikte hiyeg ku pariye kane ihpekere pikumadukan, mmanawa gihiyekemnikis adahan kinisakanenwa.

¹¹⁹ Hiyeg taraksavye ignes ta pit kewa igemnatbe adahan hawkri. Inneki keh nah batek akak pikannuhakni.

¹²⁰ He nah avis nah sagka ta pivetunat. Nah avise ku nah hiyapkisanek nutuh ku samah pikumadukan awna.

Nah kumadukasaw arit pikumadukan

¹²¹ Nah kuwis keh ku pariye kabay hawata ku pariye wadit. Ka ba isaksa nuvetunyavu matekevunma.

¹²² Akka nutuh ku inyewa pis avuriwhun, nah pibuk. Ka ba isaksa ignes hiyeg ku pariye kane batek pikak hiyapkiswima mbeyne nutuh, neras hiyeg ku pariye ikewnevwi ku igkisnewa kumaduka givitkis.

¹²³ Mataytak hewke tiyegem nah misakwa avuriwvarimpi adahan wahepne pis ayta amnihun, he nuwtyak mabip, adahan wahepne ini pamnihra ini kabayka ku pariye pis ikakse nutuh.

¹²⁴ Hiyapnanuba avigkutavrik pamnihra. Kannuhnanuba amin pannasan. Keh nah hiyak ku pariye pis.

¹²⁵ Keh nah humaw hiyekemniye, mmanawa nah pibuk. Numawkan nah pukuhpa pikannuhakni.

¹²⁶ Kiyavwiye Uhokri, kuwis danuh ahawkanavrik adahan pis hiyapkis pidatni, mmanawa pikumadukan in ka kiyathaka.

¹²⁷ Henewa nah batek akak pikumadukan mpiy ku samah nah batek akak karukri wahano.

¹²⁸ Inneki keh nah wew avigkutavrik ku samah pihiyekemni. Nah ka batek akak hiyakemniki ku pariye kane wadit.

Nah ihpekere piwn

¹²⁹ Pikumadukan in barewye kumadukaki, inneki keh nah ihpin avititakwa nuyakni.

¹³⁰ Ku aysaw piwn akkamnihka wot in uguh uhiyekemni, in kannuh hiyeg ku pariye kane hiyak hawkri.

¹³¹ Nah ka aynsima aharit pikumadukan, kewa pahavwi hiyegbe ku pariye kane aynsima arabyu un.

¹³² Ivegnaba numkanit akiw. Uya amnihun ku samah pihumpawan keh gikakkis hiyeg ku pariye batekyevwi pikak.

¹³³ Avuriwnanuba wadit, ku samah pikaksan nutuh, kahadbe mbayka ka kumadukevunma.

¹³⁴ Wiwhnanuba giwakutakkis neras ku pariye hiyapkisnevwi mbeyne nutuh kahadbe ik adahan nah ihpa pikumadukan!

¹³⁵ Iveganawnaba nutuh akak pabay, nah pibuk. Uya kannuhun amin pikumadukan!

¹³⁶ Nah suka nukantak ka aynsima awaku nawenyevwi hiyeg ka ihpekere pikumadukan.

Pikumadukan in waditye

¹³⁷ Pis waditye, Kiyavwiye. Pikumadukan in waditye.

¹³⁸ Inin pihiyekemni ku pariye pis ekke wotuh in madikte wadityenenwa.

¹³⁹ Nah kiyimwihwa ka aynsima, mmanawa nuvetunyavu ka aritnama ariw piwn.

¹⁴⁰ Kibeyne, in pikaksan in yuma kiniska nibet. Nah pibuk ka nubetkisima nikak.

¹⁴¹ Nah tuwatasaw pitivut. Nah ka batekkan nukakan. Heneme nah ka miyeh ini pikumadukan.

¹⁴² Pihiyekemni waditye in dahwa adahan avanenekwa. Pikumadukan in avanenekwa inyewa.

¹⁴³ Nah abet ka aynsima kiyimwiki, ka aynsima wakaymniki, heneme pikumadukan in kivunsan akak batekka.

¹⁴⁴ Inin pikannuhakni in waditnenekwa. Kehnaba nah pukuhpin, kahadbe nahme uti nudehetni.

Nah wew avigku pikumadukan

¹⁴⁵ Nah piriyepkaw pit avititakwa nuyakni. Kaytwanaba nuwnuh, Kiyavwiye. Nahme ihpanek pikumadukan.

¹⁴⁶ Nah ayap pit, uya amnihun! Nahme wewnek avigku pikumadukan.

¹⁴⁷ Kabeweke nah kannikaw adahan nah amnihswene pit, mmanawa nah ivegnenekwa avit pikaksan.

¹⁴⁸ Hewke tiyegem nah ka himak adahan nah ivegminene nuhiyekemni amin piwn.

¹⁴⁹ Timapnanuba, Kiyavwiye Uhokri, ku samah pamnihra nukakuh. Nukunehnaba nudatni akiw, ku samah pibetki.

¹⁵⁰ Neras mbayavye nuharaksetnivwi igkis danuhnene numkat, ignes hiyeg ku pariye kane ihpati piwn.

¹⁵¹ Pisme, Kiyavwiye, kibeyne pis ay kennesa nuhumwa. Madikte pikumadukan in wadityenenwa.

¹⁵² Ka kuyenema nah kannuhwa amin pikannuhakni. Pis ikepni adahan in dahwa adahan avanenekwa.

Amnihswaki

¹⁵³ Kiyavwiye, ivegnaba arimkanit nuhiyvan mbeyne. Uya amnihun, mmanawa nah ka miniw ariw pikumadukan.

¹⁵⁴ Paraknaba abet nuhawkan, hawata uya wiwhun ariw mbeyne. Nukunehnaba nudatni akiw, ku samah pikaksan nutuh.

¹⁵⁵ Hiyeg mbayavye pis ka amnihgikisnek, mmanawa igkis ka aritnama ariw pikumadukan.

¹⁵⁶ Kiyavwiye, pis ka pamnihrasima. Nukunehnaba nudatni akiw, ku samah pibetkiyavrik!

¹⁵⁷ Nuvetunyavu nuharaksetnivwi igkis ka aynsima, heneme nah ka miniw ariw pikumadukan.

¹⁵⁸ Ku aysaw nah iveg gimkatkis neras kinisekevutnevwi, nah ka nuwakemnisima, mmanawa igkis ka ihpa pikumadukan.

¹⁵⁹ Kiyavwiye, ivegnaba ku samah nah batek akak pikumadukan. Nukunehnaba nudatni akiw, awaku ku samah pamnihra.

¹⁶⁰ Madikte piwn in inyewa. Madikte pikumadukan in wadityekuye. In dahwa adahan avanenekwa.

Nah ka nubetkisima awaku pikaksan

¹⁶¹ Neras ikivaratviyenevwi haraksan waditnevyenen, heneme nah kiyatha pikumadukan mpiynigkis.

¹⁶² Pikaksan keh nah betek ka aynsima, kewa pahavwi hiyegbe ku pariye utevye igiska.

¹⁶³ Nah amiyha wasaymka, nah ka betek nikak aynesnima, heneme nah batek akak pikumadukan.

¹⁶⁴ Ntewnehkervut mpuse hawkri nah kabayhap, mmanawa pikumadukan wadityekuye.

¹⁶⁵ Neras ku pariye batekyevwi akak pikumadukan igkis uti ka aynsima pasamraki. Yuma ariknawnama keh igkis tuguh.

¹⁶⁶ Kiyavwiye, nah wahap pis amnihun, mmanawa nah wew avigkut pikumadukan.

¹⁶⁷ Nah ihpa pikumadukan, hawata nah batek nikak avititak nuyakni.

¹⁶⁸ Nah ihpa pikannuhakni akak pikumadukan, mmanawa pis hiyak madikte nukehni.

Nah ka miyeh pikumadukan

¹⁶⁹ Kiyavwiye Uhokri, numawkan namnihswan danuh ta pit. Ikinaba nutuh hiyakemniki ku samah piwn.

¹⁷⁰ Numawkan nuviryepkawni danuh ta pivetunat. Uya amnihun, ku samah pikaksan.

¹⁷¹ Avanenekwa nah kabayhapnek, mmanawa pisnewa kannuhun amin pikumadukan.

¹⁷² Nah paknek amin pikumadukan, mmanawa madikte pikumadukan in wadityekuye.

¹⁷³ Kiyavwiye, ba ayta ayavan avanenekwa, mmanawa nah kuwis kaniye wew avigkut pikumadukan.

¹⁷⁴ Kiyavwiye, ka aynsima nah muwaka pis amnihun. Ariwntak pikumadukan, nah uti batekka.

¹⁷⁵ Nukunehnaba nudatni akiw kahadbe nah ik adahan kabayhap. Numawkan pikannuhakni kawih adahan nayavetni.

¹⁷⁶ Nuwewni kewa pahavwi muwtohbe biyukwiye. Kiyavwiye, ba ayta iwevun nah pibuk, mmanawa nah ka miyeh pikumadukan.