Sawmus 118 - Uhokri Gahegbetawni Nukune akak Sawmus

Kabayhaki adahan mataki

¹ Kabayhanabay Kiyavwiy Uhokri, mmanawa ig kibeyne hawata awaku gamnihra in dahawa adahan avanenekwa.

² Inneki keh, amawka madikte izhaewyenevwi awnanekuye: “Gamnihra in dahwa adahan avenenekwa!”

³ Hawata Uhokri gimuwvegavu, amawka igkis awnanekuye: “Gamnihra in dahwa adahan avenenekwa!”

⁴ Hawata neras ku pariye ihpenevwi giwn, amawka igkis madikte awnanekuye: “Gamnihra in dahwa adahan avenenekwa!”

⁵ Abetnewa nah kiyimwiye, nah amnihswe git Kiyavwiye. Igme timevun ig wiwhpen abetitak wakaymniki.

⁶ Nah hiyak ku Kiyavwiye Uhokri ay nukakuh, inneki keh nah ka avis gibohrikis hiyeg. Igkis ka hiya nusamanak.

⁷ Nah hiyak ku Kiyavwiye Uhokri ay nukakuh, ignewa ku pariye ayavan. Inneki keh nah hiyapnek nuvetunyavu gibiykemnikis.

⁸ In kabayte wis kamaxwa givitit Kiyavwiye, mpinekata wis kamaxwa givititkis hiyeg amadgayavu. inin.

⁹ In kabayte wis iveg givitit Kiyavwiye mpinekata wis iveg givititkis hiyeg kiyatyevwi.

¹⁰ Nuventuyavu ku pariye kiyaraniwhpen igkis ka aynsima. Heneme akak Kiyavwiye Uhokri gidatni nah matekevgikis madikte.

¹¹ Nah misekwe kiyaran gikakkis, heneme giwavrik Kiyavwiye Uhokri nah matekevgikis madikte.

¹² Igkis ayta ivukwe numinuh ke ahayakbe kamabyanavye, heneme igkis bukahavepka madikte ta abetit tiket ke ah atawnibdibe huruhruvye.

¹³ Igkis aytwe nuvitit akak madikte garewhankis, kaba nah hahwa, heneme, kibeyne, ig Kiyavwiye Uhokri ayavevun.

¹⁴ Ig Kiyavwiye Uhokri ike nawaygi akak nudatni; hene ig amnihpen.

¹⁵ Timapnay kabimanka akak batekka avititak paytwempu, Uhokri gihiyegavu givinkis: “Kiyavwiye Uhokri gidatni kehe wixwiy mataka kerka.

¹⁶ Akak gidatni ig kehe ka aynsima barewyevwi annut. Kiyavwiye Uhokri gidatni kehe wixwiy mataka kerka.”

¹⁷ Nah ka miyanek, heneme nah aymuhwanek adahan nah kinetihwene amin ku pariye Kiyavwiye Uhokri gikehni.

¹⁸ Ig waditevun akak madikte ahawna, heneme ig ka isaksa adahan nah miya.

¹⁹ Wokanay nudahan Uhokri givin, kahadbe nahme parak atere adahan kabeyhene Kiyavwiye.

²⁰ Atere igkisnenwa hiyeg ku pariye ihpenevwi giwn ik adahan mpiya.

²¹ Kiyavwiye Uhokri, nah kabeyhekere pis atere, mmanawa pis ayavevun pis kehe nah isahptaw.

²² Hiyeg kehne paha payt tiptiye, igkis tukuhe pahow tip. Givewkankiskam ku egu tip ka kawihkam. Bawa egu tip eg pi awaygtenano ariw madikte. Eg humaw adahan payt akoksa.

²³ Igwa Kiyavwiye Uhokri ikaksig hene. In kabayntiwa wotwiy ig kehgu hene.

²⁴ Inin hawkri igwa Kiyavwiye Uhokri ahegbetin hene, nikwe uyay batek uminwiy, uyay fetya gidahan.

²⁵ Uya amnih usuh, Kiyavwiye, uya amnih usuh! Kannikasaba usuh akiw, Kiyavwiye Uhokri!

²⁶ Uhokri gabaynek gikak ner ku pariye ayta giwavrik Kiyavwiye Uhokri! Ig amavakanek akak Uhokri gabay ay givineku Kiyavwiye Uhokri.

²⁷ Kiyavwiye ignewa Uhokri; ignewa uguhwiy akak gibutni. Akak ahamna yiwaku, amavanig akak fet, wewnay aranwavrik kakanhawket.

²⁸ Kiyavwiye, pisnewa nuwohkiga. Inneki keh nah kabayhap, nah awna amin pikiytani.

²⁹ Kabayhanabay Kiyavwiye Uhokri, mmanawa ignewa kibeyne hawata awaku gamnihra in dahwa adahan avanenekwa.