Sawmus 116 - Uhokri Gahegbetawni Nukune akak Sawmus

Uhokri amnih ariw miyaka

¹ Nah batek gikak Kiyavwiye Uhokri, mmanawa ignewa timavun. Ignewa ataybiswa arimkanit nuviryepkawni.

² Ignewa timavun avanenekwa ku aysaw nah kabiman adahan amnihswene git.

³ Miyaka ateyni kaba matekevun. Nah avisaseu ka aynsima abohri imewti. Nuwakemni keh nah biyuk nukan.

⁴ Ayteke nah hiyapni hene, nah kabiman git Kiyavwiye. Nah awna git: “Kiyavwiye Uhokri, nah amnihswa pit: Uya wiwhun ariw inin mbeyne!”

⁵ Ig Kiyavwiye ka gabaysima. Ig waditye hiyeg. Ig uwohkigawiy ka gamnihrasima ukakwiy.

⁶ Ig Kiyavwiye mpithamni hiyeg yumanene gawaygi. Ku aysaw nah aynte abet mbeyne ig amnihpen atere.

⁷ Nukamaxwan ta givitit Kiyavwiye, mmanawa ignewa ka gabaysima nukakuh.

⁸ Kiyavwiye Uhokri wiwhpen ariw miyaka. Ig manwotevun ariw nukantak, hawata ig amnihpen ariw miyaka ateyni.

⁹ Inneki keh nah wewnek givetun Kiyavwiye Uhokri wadit, ay gibetkis hiyeg ivegnenevwi.

¹⁰ Hiyawa nah awna: “Nah kuwis hahwa.” Akak ini nah kamaxwenene.

¹¹ Hawata nah ka biyuksa nukamaxwan, hiyawa nah awna ka akakma ivegminaki hiyakemniki: “ka ik adahan wis kamaxwa givit pahavwinema.”

¹² Nikwe pariye kuri nukannuh git Kiyavwiye Uhokri adahan madikte ini kabayka ku pariye ig kehe nudahan?

¹³ Nah ewknek win adahan nukannuh git Kiyavwiye adahan kabeyhene giw ku samah ig amnihpen.

¹⁴ Abet givahdukawnikis madikte gihiyegavu nah ikinek git ku pariye nukaksan git.

¹⁵ Gitkis hiyeg kamaxwenevwi, ku aysaw pahavwi miya gibetitakkis Kiyavwiye Uhokri gihiyegavu in kabaykanenwa gidahan, gitme Kiyavwiye, ig pisenwe gannivwi amadgatak hawkri.

¹⁶ Kiyavwiye, nah pibuk. Nah wew pikak ku samah minikwak nnaguh wew pikak. Pisnewa amnihpen ariw miyaka.

¹⁷ Nah kakanhawnek pit adahan pikatiwnihpitni. Abet nuviryepkawni nah awnanek pikak.

^18-19 Abet givahdukawnikis madikte pihiyegavu, ay avetun pivin aynte Jerusalém, nah ikinek pit ku pariye nukaksan. Kabayhanay Kiyavwiye Uhokri!