Sawmus 115 - Uhokri Gahegbetawni Nukune akak Sawmus

Kabayhaki git igyewa Uhokri

¹ Kiyathasanaba pisnenwa, Kiyavwiye Uhokri, pisnenwa, ka ba usuhma, amawka pisnenwa kiyathaka awaku pamnihra hawata awaku pis inyewa.

² Mmahki neras nawenyevwi hiyegviyenevwi givewkankis ayapta usuh: “Kitwiki yiwohkiga?”

³ Usuhme kaytwa: “Ig uwohkiga aynte inurik; ayteke ig wewkis hawkri ku samah gimawkan.

⁴ Igkisme giwohkigavukis nawenyevwi hiyegviyene igkis kehka akak karukri seyno hawata akak karukri wahano, igkis kehka gavitkis awaykemni.

⁵ Kadahan gibiykis, heneme igkis ka awna; kadahan giwtyakkis, heneme igkis ka hiyap.

⁶ Kadahan gitaybikis, heneme igkis ka timap; kadahan gikigkis, heneme igkis ka ayh.

⁷ Kadahan giwakkis, heneme igkis ka kamax; kadahan gikugkukis, heneme igkis ka wew. Hawata igkis mown.

⁸ Neras ku pariye gibetketnikis hawata ku pariye gikiyathetnikis, igkis misekwebdinek hawata kewa ignesbe ahehpati bataka ka hiyak arikanawnama.

⁹ Izhaewyenevwi, kamaxwanabay givitit Kiyavwiye Uhokri! Ignewatbaki wayavetniwiy hawata umaptentenwiy.

¹⁰ Uhokri gimuwvegavu, kamaxwanabay givitit Kiyavwiye! Ignewatbaki wayavetniwiy hawata umaptentenwiy.

¹¹ Kamaxwanabay givitit Kiyavwiye, madikte yis ku pariye ihpenevwi giw! Ignewatbaki wayavetniwiy hawata umaptentenwiy.

¹² Ig Kiyavwiye Uhokri kiye wixwiy, ig ikinek kabayka wotwiy; ig ikinek kabayka gitkis gihiyegavu izhaewyenevwi hawata gitkis madikte gimuwvegavu, Arawh gihiwhivwi.

¹³ Ig ikinek kabayka gitkis madikte ku pariye ihpenevwi giwn, neras ku pariye kiyatyevwi payak gikakkis neras ku pariye ikaka yumanene gikiytanikis.

¹⁴ Numawkan Kiyavwiye Uhokri ikinek yit ka aynsima yikamkayuvwi, hawata yihiwhivwi ka aynsima gikamkayuvwikis.

¹⁵ Numawkan sarayhka ka aynsima kabayka yivitit gavit Kiyavwiye, ku pariye kehe inurik akak waxri.

¹⁶ Inurik in gidahannenwa Kiyavwiye, heneme waxri ig ikepni gitkis hiyegviyenevwi.

¹⁷ Hiyeg miyaravye, ku pariye muhuk arimkanit miyaravye giwetrikis, ignes ka kabayha Kiyavwiye Uhokri akiw.

¹⁸ Heneme wixwiy, ku pariye ivegnete, wixwiy ik adahan kabayha Kiyavwiye Uhokri kuri hawata adahan avenenekwa. Kabayhanay Kiyavwiye Uhokri!