Sawmus 112 - Uhokri Gahegbetawni Nukune akak Sawmus

Gibetki pahavwi kamaxwene givitit Uhokri

¹ Kabayhanay Kiyavwiye Uhokri! Ka aynsima kabayka gidahan pahavwi ku pariye ihpene Kiyavwiye Uhokri giwn, ku pariye mpiksewne wew avigkutavrik gikumadukan.

² Gikamkayuvwi ner hiyeg igkis barewyevwi gaymahwankisnek ay avit waxri ku pariye Uhokri gikan. Hawata gihiwhivwikis Uhokri ikinenekwa kabayka gitkis akiw.

³ Igi hiyeg kivun akak igiskanek ay giveneku, yuma ariknawnama muweknenek git, hawata ig ka miyehkantinek adahan kabayka ku pariye gikehni.

⁴ Ku aysaw ig aynte abet amisnavyenek, igme Kiyavwiye Uhokri uguhnek gihina atere. Inneki keh ig ka gabaysima, ig batek ayava giyakivwi hiyeg hawata ig avanenekwa keh ku pariye waditnene.

⁵ Ka aynsima kabayka gidahan, mmanawa ig kayah avititakwa giyakni adahan ayavene giyakivwi hiyeg, ig wewkis gannivwi akak madikte waditka.

⁶ Ig ka mpiyasatinek mahikoki abet gaymahwan hawata madikte hiyeg kiyeginek awaku ig kibeyne hiyeg.

⁷ Ku aysaw ig timapnek mbeyevye inetit danuh git, ig ka avisnek nibohri, mmanawa gikamaxwan wadit givitit Kiyavwiye Uhokri, hawata awaku ig hiyak ku samah gaymahwan.

⁸ Ig ka wakaymnihwanek adahan givit, ine ig kawnata avisnek, mmanawa ig hiyakni ku Kiyavwiye Uhokri ahegbet adahan parekne abet gihawkan gitivutkis givetunyavu.

⁹ Ig ka mpukaw gitkis hiyeg madiptavye. Ini gabay avanenekwa keh hiyeg kiyegi.

¹⁰ Igkisme hiyeg mbayavye gihiyekemnikis, igkis ka aynsima dagawnebdinek git. Igkis ivegnek akak madikte gamiyhankis, ayteke nikwe igkis tivik biyukvi. Yuma ariknawnama giwhpankisnek adahan igkis uti kabayka.