Sawmus 111 - Uhokri Gahegbetawni Nukune akak Sawmus

Uhokri kabayhaki

¹ Kabayhanay Kiyavwiye Uhokri! Ay abet hiyeg givahdukawnikis nah kabayhanek Kiyavwiye Uhokri akak madikte batekka avititak nuyakni, payak gikakkis neras ku pariye ihpenevwi giwn.

² Adahan barewyevwi annut ku pariye gikehni! Nikwe ku pariye batekyevwi adahan ini gannu amawka igkis mpiksaw pukuhpin.

³ Madikte ku pariye gikehni in areketni gidatni akak gikiytani; akka ku ignewa waditka akivara adahan avananekwa.

⁴ Ig Kiyavwiye Uhokri ka isaksa wixwiy miyeh ini gannivwi barewyevwi. Ig kibeyne hawata ka gamnihrasima.

⁵ Ig iki gimanakis neras ku pariye kiyathenevwi giw. Ig kawnata miyehti ku samah giwn.

⁶ Ig hiyapkise gidatni gitkis izhaewyenevwi ku aysaw ig ike gitkis nawenyevwi hiyeg giwaxigkis.

⁷ Ig ka kinisakti hawata madikte ku pariye gikehni in wadit. Madikte gikumadukan kis adahan hiyeg kamaxwa nivitit.

⁸ In dahwa adahan avananekwa, mmanawa in kehka avigkutavrik hiyakemniki inyewatnene hawata avigkutavrik waditka.

⁹ Kiyavwiye Uhokri awahkise amnihka giminkis gihiyegavu hawata ig kehe pahat ahegbetawka gikakkis adahan avananekwa. Ig barewvitye hawata ig ka gidatnisima.

¹⁰ Adahan wis himaw hiyekemniye hiyeg, amawkan pitatye wis ihpenete Kiyavwiye Uhokri giwn. Ig iki pukuhpaki gitkis hiyeg ku pariye ihpenevwi gikumadukan. Amawka Kiyavwiye Uhokri kabayhaka adahan avanenekwa!