Sawmus 11 - Uhokri Gahegbetawni Nukune akak Sawmus

Kiyavwiye Uhokri ivegbeta hiyeg ayta inuriktak

¹ Kiyavwiye Uhokri ignewa nayemwekri. Yuma bisiket akiw kema igma. Nikwe ka yi muwaka awna nutuh: “Asa bisike ke kuhivrabe arimkat nawenyewa bisiket akiw.

² Iveg ku samah muwapuw hiyeg mbayavye kadasene hiyeg kibeynevwi abet amisnavye. Igkis kuwis pakakah giyakakis adahan gihapseptenkis hiyeg wadityevwi.

³ Mbeyne kuwis muwapuw, hiyeg ka ihpa akiw kibeyne hiyakemniki. Hiyawa pis uhokriyan, heneme yuma pesket pidahan akiw, nikwe asa bisike pisenwate.” Nahme nah ka ihpanek inakni iwit.

⁴ Ig Kiyavwiye Uhokri gidukwenewa ay amun giwskeki. Gevwi kiyatyo gudukwenewa aynte inurik, ayteke ig kumaduka hiyeg. Ig avuriw madikte hiyeg. Ig hiyak ku pariye gikehnikis.

⁵ Ig Kiyavwiye Uhokri ivegbeta hiyeg kibeynevwi gihiyekemnikis. Ig hawata ivegbeta hiyeg mbayavye gihiyekemnikis. Ig ka batek aynesnima gikakkis hiyeg ku pariye kehnevwi mbayka.

⁶ Ig Kiyavwiye Uhokri keh tiket wageska payegbitak akak ini pusukempiye ku pariye bixiwahnene arihri tuguhnek givititkis neras mbayavye gihiyekemnikis. Ig hiyapkisnek gitkis akak kamaygviye awahni kene tiketbe akadwey.

⁷ Mmanawa ig Kiyavwiye Uhokri waditye hiyeg. Ig batek gikakkis hiyeg wadityevwi. Hiyeg kibeynevwi aymuhwanek gimun adahan avanenekwa.