Sawmus 109 - Uhokri Gahegbetawni Nukune akak Sawmus

Giviryepkawni pahavwi awayg haraksaki

¹ Kiyavwiye Uhokri, pis ku pariye avanenekwa nah kabayhap, uya amnihun. Ka ba misakwa tinwonama hene.

² Neras mbayavye gikakkis wasaymavye igkis ka aynsima mbeyhe nuwhu. Igkis awna wasaymkanenwa numinuh.

³ Igkis awna iwit mbeyevye numinuh. Hawata igkis kavetunsan yuma kavatrenesima.

⁴ Hiyawa nah mpiksaw akka nubetki gikakkis, igkisme ka hiyavun kabayntiwatma. Heneme nah nudukwenewa piriyepkewnene gidahankis.

⁵ Igkis katiwnih kabayka akak mbayka. Inme batekka igkis katiwnih akak gamiyhankis.

⁶ Kiyavwiye Uhokri, hiyapkisnaba git nuvetunya ini mbeyne ku pariye ig hiyapkisne nutuh. Kaniynaba pahavwi hiyaptigi kane wadityema adahan gihiyvetni ner nuvetunya hawata adahan pahavwi gaytakkis givetunyavu atak atere kamiyevgi akak wasaymkanenwa gibetitkis hiyeg.

⁷ Ku aysaw hiyaptigi gihiyvetninek, isaksa ig ikakanek ku ig kataraksanye. Ku ig piriyepkaw pit, ka ba timap giviryepkawni, hiyapni kewotbe in taraksakibe pit.

⁸ Keh ig hiyeke ku ig ka kis dahwa amadga inin. Amawka ku pahavwiwa akiw kannikaw giwenyan adahan kannivwiye gidukwenavrik.

⁹ Keh ig hiyeke ku ig ka wages gihiyekemni nikwe gikamkayuvwi humawnek migenavye. Hawata gihayo humawnek madankuno.

¹⁰ Nikwe gikamkayuvwi misakwanek yumanene givinkis. Hawata igkis misakwanek makehpene gimanakis. Mmanawa igkis ivukavepkanek arikutak givinkis ku kiney igkis misakwa.

¹¹ Ayge nikwe madikte ku pariye ig nuvetunya kadahan in iwepkanek giw ke adahanbe katiwnihne gimatiwnihni. Hawata nawenyevwi hiyeg misekwenek akak ku pariye ig ute akak gimaviswan.

¹² Hawata yuma pahavwinama hiyeg kibeynenek gikak mmanawa ig ka kibeynema gikakkis. Igkis kawnata avuriwkere gidahan gikamkayuvwi migenavye.

¹³ Keh ig hiyeke ku madikte gihiwhivwi miyarapnek kibehtenwa. Hawata giwkis miyehavepkanek kibehtenwa.

¹⁴ Heneme ig Uhokri ka miyeh gitaraksan gukak ginag hawata gitaraksan gikakkis gihawkrivwi.

¹⁵ Henewatbaki, ig Kiyavwiye Uhokri kiye ini gitaraksan gukakis adahan avanenekwa.

¹⁶ Ig ner awayg ka ivegminati gihiyekemni adahan kehne kabayka, heneme ig harakse ig umehe ner tuwatviye, ner madiptivye, hawata ner tukuhkare.

¹⁷ Ig gibetki ibiytahak; nikwe gibiytahanwa tuguhenek givitit! Ig ka amnihkere hiyeg. Kuri nikwe yuma hiyeg amnihkerevginek.

¹⁸ Git ibiytahaki ka mahikonama kewa ig kawihminawnebe akak kamis, kewa ig higepnebe un, kewa ig axnebe iyti.

¹⁹ Kuri nikwe gibiytahanwa tuguhnek givitit, ig ka ikwa adahan wiwhminaw niw.

²⁰ Henewatbaki in danuh gitkis neras nuvetunyavu ku pariye ibiytahan.

²¹ Heneme, nahme, Kiyavwiye nuwohkiga, uya ayavan ku samah pikaksan nutuh. Wiwhun akak ini pamnihra hawata akak ini pabay.

²² Nah madiptivye, nah yumanene nuwaygi. Nah kabahte ka ik adahan amava inin katiwvitka avit nuyakni.

²³ Nah kewa amisnavyebe menwempiye ku aysaw kamuw uguhpiye hawkri. Naymuhwan padakun piyawakad kewa pahavwi tananbe padaka.

²⁴ Mpiynevevye nah maxhaw, nubow sagka hawata nuvituh madikempi awaku keviki.

²⁵ Ku aysaw nawenyevwi hiyeg hiyavun, igkis mahivwihun. Hawata igkis miyathan. Igkis sasah gitewkis.

²⁶ Paraknaba abet nuhawkan, Kiyavwiye Uhokri Dehetniye, nuwohkiga! Uya amnihun akak ini pibetki nukakuh.

²⁷ Adahan nuvetunyavu hiyak ku pisnewa amnihun.

²⁸ Ka sam igkis ibiytahan, pisme sarayhnek kabayka nuvitit. Ku igkis haraksevunnek, igkis ka hiya nusamanaknek, nahme pibuk, nah misakwanek bateke numinuh.

²⁹ Aysawnemenek nuvetunyavu hiyapnek ka aynsima mbeyne, hawata maraki awastigkisnek kewa kamisbe.

³⁰ Akak madikte nukuvimna ahawna, nahme kabayhanek nuwohkiga Kiyavwiye Uhokriye Dehetniye. Nah kabayhignek abet givahdukawnikis hiyegviyenevwi.

³¹ Mmanawa ig mpithamni hiyeg ku pariye yumanene gawaygikis. Ig wiwhpigkis giwakutakkis neras ku pariye hiyapkisne mbeyne git.