Sawmus 108 - Uhokri Gahegbetawni Nukune akak Sawmus

Uhokri matakasanek uvetunyavuwiy wotwiy

¹ Kiyavwiye Uhokri, nah kuwis ahegbete nuhiyekemni adahan nah paksene piw. Nah ka miniw niw.

² Nah hawata tesne nagigni hebek akak egu lira adahan kabeyhene piw. Nah kannikasakere kamuw hawkanawa akak nuvanuh!

³ Kiyavwiye Uhokri, nah kabayhapnek aynte gibetkis hiyegviyenevwi. Nah kabayhapnek aynte gibetkis nawenyevwi hiyeg.

⁴ Mmanawa pamnihra ayesri danuh tahan inurikut, inme pikiytani ayesri hawata danuh tahan abetit ukuhne.

⁵ Kiyavwiye Uhokri, hiyapkisnaba pidatni aynte inurik hawata pikiytani muwapuw amadga hawkri.

⁶ Uya amnih usuh akak pidatni. Kaytwanaba uviryepkawni kahadbe usuh pibetkivu isahptaw.

⁷ Kibeyne, aytontak ariwntak givin, ig Kiyavwiye Uhokri kuwis ikakse wotwiy ku wixwiy matakavenek uvetunyavuwiy. Ig awna: “Ku aysaw nah matakisenek yivetunyavu yit, nah ibekhenek ini paytwempu Sikeh akak ini waxri asababan Sukote yivuwiw yis nuhiyegavu.

⁸ Ini waxri Jiliyadi nah hiyapni kewotbe in kuwis nudahan, inme Manases hawata. Inme Efrayh humawnek ke iyutibe nudahan. Judá humawnek kewa nusugabe adahan nukumadukan.

⁹ Heneme Moabi aseneweke nutuh kewa nubesinabe adahan sukuhkugewne; avititme Edoh nah padaknek nukaswatni adahan areketni ku nah ka amavigkis. Aysawnemenek nah paknek amin ku samah nah matekise ignes filistewyenevwi ta yit.” Henewatbaki giwn.

¹⁰ Kibeyne, Kiyavwiye Uhokri, pisnewa matakasanek wotuh inere paytwempu kiyaranene akak ayahri. Pisnewa huwithannek atere avitit Edoh, nah gikakkis nusuwtatavu.

¹¹ Heneme ku akak inin usuh kote matakigkiste. In keh nah pukuhpaw aynesa. Mmah pis kuwis miniwvima wowhu? Mmah pis ka atakma wew gihaptikis usuwtatavu akiw?

¹² Kiyavwiye, ayavanaba usuh ker gitivutkis uvetunyavu, mmanawa gayavankis hiyeg amedgenevwi inin, in ka ariknawnama.

¹³ Ka sam. Ig Kiyavwiye Uhokri paraknek abet uhawkanwiy, ig matakasanek uvetunyavuwiy wotwiy. Igwa sibuhavevgikisnek udahanwiy.