Sawmus 107 - Uhokri Gahegbetawni Nukune akak Sawmus

Kabayka, patahwaki, mbeyne, wageska uhiyekemni, kabayka akiw

¹ Kabayhanay Kiyavwiye Uhokri, mmanawa ig kibeyne, hawata awaku gabay dahwa adahan avanenekwa.

² Kabayhanay Kiyavwiye madikte yis ku pariye ig amnihe. Mmanawa ig wiwhpewiy giwakutakkis uvetunyavuwiy.

³ Hawata ig kehe wixwiy diyuhe avititak nawenyewa waxriviyene, aytontak tiwrikaptak akak aytontak mekavriktak, aytontak uvitkigtak akak aytontak wahamavriktak adahan wixwiy ayta misakwa atan avit uwaxigwiy akiw.

⁴ Minikwak gaytakkis gihiyegavu igkis biyuke aynte amatmadga. Igkis ka uti paytwempu adahan igkis misekwenes.

⁵ Avim ini igkis mativwebdi. Igkis arabyubdi un. Igkis biyukse madikte gikamaxwankis.

⁶ Abet giwakemnikis igkis amnihswebdi git Kiyavwiye Uhokri Dehetniye avititak giyaknikis, igme hiyapni hene, ig wiwhpigkis ariw giwakemnikis.

⁷ Ig waxwevgikis avigkuw ahin waditye arimkanit paha paytwempu ku kiney ik adahan igkis misakwa.

⁸ Nukebyuvwi, amawka igkis kabayha Kiyavwiye Uhokri adahan ini gamnihra hawata adahan ini barewye annut ku pariye ig kehe gidahankis.

⁹ Mmanawa ig gibetki iki un gitkis arabyuvyevwi hawata ig iki kibeyne axka gitkis ku pariye mativwevyevwi. Henewatbaki ig!

¹⁰ Gaytakkisme gihiyegavu igkis misakwa akak giwakemnikis aynte abet miyaka amisnavye, igkis wanaminave akak xen sivari.

¹¹ Mmanawa igkis ka ihpa Kiyavwiye Uhokri inurikyene gikumadukan. Igkis tukuhe gikannuhakni.

¹² Igkis madikte mabipdip awaku gannivwikis awiyni; gaytakkis tuguhe, yuma hiyeg gayavetnikis.

¹³ Abet ini giwakemnikis igkis amnihswebdi git Kiyavwiye Uhokri avititak giyaknikis, igme wiwhpigkis ariw ini giwakemnikis.

¹⁴ Ig wiwhpigkis ariw ini miyaka amisnavye hawata ig matisbete ini xen sivari ku pariye giwankamnitenkis.

¹⁵ Nukebyuvwi, amawka igkis kabayha Kiyavwiye Uhokri kuri adahan ini gamnihra hawata adahan ini annut barewyevwi ku pariye ig kehe gidahankis.

¹⁶ Mmanawa ignewa hakuhbeta parakseket alapota. Hawata ignewa matis xen kehka akak sivari. Henewatbaki ig keh!

¹⁷ Gaytakkisme gihiyegavu akiw igkis kakahribdi awaku givathawnikis. Hawata igkis hiyap mbeyne awaku amebyemni gihiyekemnikis.

¹⁸ Avim ini igkis asenbet gimanakis, igkis kaba miyarap.

¹⁹ Abet ini giwakemnikis igkis amnihswebdi git Kiyavwiye Uhokri avititak giyaknikis, igme hiyapni hene ig wiwhpigkis ariw ini giwakemnikis.

²⁰ Akak giwnnenwa ig makniwevgikis hawata ig kannikasevgikis ariw miyaka.

²¹ Nukebyuvwi, amawka igkis kabayha Kiyavwiye Uhokri kuri adahan ini gamnihra hawata adahan ini annut barewyevwi ku pariye ig kehe gidahankis.

²² Amawka igkis kabayha Kiyavwiye Uhokri kuri akak kakanhawka hawata akak avatman adahan batekka. Hawata adahan igkis akka madikte ku pariye gikehni. Henewatbaki!

²³ Gaytakkisme gihiyegavu igkis tivikbetwikis parahwokwat amadgew nawiy adahan kannivwiyes awvre adahan givitkis amadgew parahwokwa.

²⁴ Igkis hiyap ku pariye Kiyavwiye Uhokri gikehni barewye arikna, hawata igkis hiyap gidatni ku pariye ig hiyapkise ayge amadga parahwokwa.

²⁵ Pahaye adahan ig kihawne kamaygviye. Kamaygviyeme kavusa uvuvuk kihaw hawata in kannikase paraw.

²⁶ In padak ginawyakis ta inut, ayteke in isahkis egu nawiy, eg huwis ta ahakwat un. Abet ini mbeyne, igkisme hiyeg ka hiyak ku pariye igkis keh akiw.

²⁷ Igkis wew kewa hiyeg uwkayehbe amadga nawiy awaku paraw. Hawata madikte gannukis adahan huwithawka in ka ayavigkis ariknawnama.

²⁸ Abet ini giwakemnikis igkis amnihswenes git Kiyavwiye Uhokri avititak giyaknikis, igme hiyapni hene ig wiwhpigkis ariw ini giwakemnikis.

²⁹ Ig kariswehse kamaygviye gidahankis hawata inme paraw tinwohew.

³⁰ Igkis hiyapni hene igkis bateke giminkis awaku paraw tinwohew. Hene Kiyavwiye Uhokri waxwevgikis kabayntiwa arimkanit ini minehweket ku kit gimawkankis.

³¹ Nukebyuvwi, amawka igkis kabayha Kiyavwiye Uhokri kuri adahan ini gamnihra hawata adahan ini annut barewye ku pariye ig kehe gidahankis. Henewatbaki!

³² Nukebyuvwi, ig Kiyavwiye Uhokri ka gikiytanisima. Akkanay gikiytani ku aysaw hiyeg pahadguhwa; kabayhanay Kiyavwiye Uhokri abetnewa givahdukawnikis ikivaratviyenevwi.

³³ Ig Kiyavwiye Uhokri ka gannusima. Ig kannu wages warik arapuwe kewa amatapbe. Hawata ig kannu makarase un ariwtyak madikte akiw.

³⁴ Ig ik adahan keh waxri kibeyne wageswe waxri pambetye awaku givathawnikis neras ku pariye misekwenevwi ay nivit.

³⁵ Hawata akiw ig kannu keh amatap wageswa mahakwa. Hawata ig kannu keh waxri aravwiye humaw un ariwtyak.

³⁶ Ig Kiyavwiye Uhokri ka gabaysima. Ig isakse hiyeg mativavye misakwa avit kibeyne waxri. Igkisme keh paha paytwempu, igkis misakwa nivit.

³⁷ Igkis keh giwasrakis. Igkis mutuhavepni akak uvavu akat. Ayge nikwe igkis kadahan ka aynsima uva ariw.

³⁸ Kibeyne, ig Kiyavwiye Uhokri iki ka aynsima kabayka gitkis gihiyegavu. Ig keh igkis kakamkayh ka aynsima. Ig ka isaksa givigkis pak madik.

³⁹ Heneme Kiyavwiye Uhokri ig barewvitye. Nikwe ku ig hiyap gihiyegavu tiviknene patehwenene giwtrik, ig isaksa igkis matakaka gavitkis givetunyavukis adahan igkisme hiyapkiska mbeyne gitkis. Nikwe igkisme kayah ka aynsima mbeyne hawata arewhaka gitkis.

⁴⁰ Ayteke ig Kiyavwiye Uhokri hiyapni hene, ig ekke gitkis neras givetunyavukis ku pariyevahki gikumaduketnikis, ku ka kis akiw adahan ignes hiyapkis mbeyne gitkis. Nikwe igme wewkiswigkis arimkanit biyukwiki, ayge igkisme he wewnemempikis, igkis ka hiyap gihinakis.

⁴¹ Heneme neras gihiyegavu ku pariye wages gihiyekemnikis ku pariye tuwatasewviye gitivut Uhokri, ignes wiwhka ariw ini gihiyvankis ku pariye tuwatasewviye gitivut Uhokri, ignes wiwhka ariw ini gihiyvankis mbeyne. Hawata ig keh gikamkayuvwikis kibihwa kewa muwtohyanbe.

⁴² Hiyeg ku pariye kibeynevwi igkis hiyap ku samah Kiyavwiye Uhokri barewbetha gihiyekemniks, nikwe igkis bateke giminkis, heneme hiyeg ku pariye mbayavye gihiyekemniks, ignes ka ik adahan awna pahatnama iwit givetun.

⁴³ Amawka hiyeg ku pariye hiyekemniyevwi ivegminanekuye gihiyekemnikis amin ini ku samah Uhokri gikehni udahanwiy. Amawka igkis battukawnekuye pukuhpa ini Kiyavwiye Uhokri gamnihra gikakkis gihiyegavu.