Sawmus 104 - Uhokri Gahegbetawni Nukune akak Sawmus

Kiyavwiye Uhokri ig uhumtenwiy ukavriwtenwiy

¹ Kiyavwiye Uhokri, nah kabayhap avititak nuyakni! Kiyavwiye nuwohkiga, aynsikata piyesri hene! Pis kakawihnivu akak pikiytani hawata akak pidatni.

² Hawata pis awasvit akak pibutni. Pis kannikasa en kewa paha paytbe.

³ Hawata piwskeki ayntehan avitmin un inurikyene. Pis kawih ukuhne kewa pihmunbe adahan piwewten. Hawata pis amara abetvi kamaygviye.

⁴ Pis keh kamaygviye humaw inetitkekne pidahan. Inme ugugune humaw pibukvig.

⁵ Pis sarayhe waxri kabayntiwa avitmin akamaxtenvig, hene in ka mukusatinek.

⁶ Pis awasvite waxri akak parahwokwa, ke akak kamisbe. Inme un misekwe avitminvi waxribdi imuwadminene.

⁷ Heneme, abetnewa pis himehe un, in ayguhwe. Ku aysaw in timep pikuvimna adahan kumadukaki, in ayguhwe in sigise.

⁸ Ini un ayguhwe ariw waxribdi imuwadminene, in muhuke arimkanit asababan adahan tivikwiye arimkanit iwetrit ku kiney pis ahegbete nidahan.

⁹ Ayge pis kawetuhe un kahadbe in ka mpiya adahan awastene waxri akiw.

¹⁰ Pis keh warik atiwrik humaw amadgatak asababan. Hawata pis keh warik ariwnravig sigis ayegbiw waxribdi imuwadminene.

¹¹ Ariwntak ini un madikte puwiknebdi ahavwikunevwi higap. Akak ini un kaway ahavwikunevwi umah garabyunkis.

¹² Akigbimna warik, kuhivraviyonovwi keh gubkis. Hawata egkis awna avewitak ah atawnibdi.

¹³ Inuriktak pis waykis muwok avitit waxribdi imuwadminene. Inme waxri misakwa kivun akak pabay.

¹⁴ Pis keh pamatka aymuhwa gidahankis pak. Hawata ahakuvwi akak amutribdi adahan hiyeg gaxnikis. Avititak waxri igkis taris gimanakis.

¹⁵ Pis keh waxri iki win ku pariye keh wis batek; hawata iyti ku pariye aydha uhiyekemni, hawata bugut ku pariye iki udatni.

¹⁶ Ka aynsima muwok wayk avewi Kiyavwiye Uhokri gamutravwi, guvewikis magawga ayntenano avit Libano, ku pariye ig mutuhe.

¹⁷ Ayge kuhivraviyonovwi keh gubkis, hawata waratnaviyenevwi keh givinkis avewi ah.

¹⁸ Igkisme kabrit ahavwikune misakwa avit waxribdi imuwadminene. Igkisme lapeh ahavwikune ayamwa abet tivebdi.

¹⁹ Pis kehe kayg adahan areketni fet ahawkanavrik. Kamuw hiyak ku aysaw danuh gihawkanavrik adahan ig pituk.

²⁰ Pis kehe tiyegemka. Ku aysaw misanpi madikte puwikne ahavwikune pes adahan kanikne.

²¹ Kawokwine hihihwa ku aysaw igkis kaniknes, ivegvene gimanakis ku pariye Kiyavwiye Uhokri gikan adahan gaxnikis.

²² Heneme, ku aysaw kamuw pes, igkis diyuhe. Igkis atak dukugis arikut miyokwiye.

²³ Nikwe igkisme hiyegviyenevwi atak abetit gannivwikis. Igkis kannivwi danuhte aygete.

²⁴ Kiyavwiye, pis kehe ka aynsima ariknebdi. Pis kehpin akak pannu. Inin waxri in kivun akak paymuhnivwi.

²⁵ Ayge misakwa parahwokwa pugubwadnene, nopsadnene, ku kiney misakwa puwiknebdi nopsadminene akak nopsanyuvwi, igkis ka aynsima, ka ik adahan pukuhgikis.

²⁶ Nawiy mpiya awvre amadgew parahwokwa. Ayge Leviatah arehwa ahakwa, ig ner im ahawkri nopsadnene ku pariye pis aymuhe.

²⁷ Madikte igkis, puwikne akak hiyeg, wahap piwntak adahan pis iki gimanakis ahawkanavriknawa.

²⁸ Pis iki axka. Igkisme ahiwni. Igkis ax kabihribdave.

²⁹ Ku aysaw pis ka avuriwgikis, igkis madikte avis. Ku pis wiwhe gitipkis, igkis miyarap. Igkis wageswa wayk atabdabni akiw.

³⁰ Heneme, ku pis kawihkis pitip givititkis, nikwe igkis wayvuka akiw, hene pis nukunehkis gaymahwankis akiw amadga inin.

³¹ Kiyavwiye Uhokri, numawkan pikiytani dahwa adahan avanenekwa, kahadbe pisme bateknek ka aynsima akak ku pariye pikehavan.

³² Ig Kiyavwiye he ivegviyenenwa arimkanit waxri, inme sagka. Ig he daxnenwa waxribdi imuwadminene, sariyanme pes nivititak.

³³ Nahme paknek adahan kabeyhene Kiyavwiye ku samah nayivwi ay amadga inin. Nah paknek git nuwohkiga abet madikte naymuhwan.

³⁴ Numawkan ig bateknek akak nuvanuh, mmanawa nubetki in ayta giwntak Kiyavwiye.

³⁵ Nerasme mbayavye ku pariye kane timepkere Kiyavwiye gihiyekemni, amawka igkis wiwhavepkanek amadgatak wayk. Neras patahwavye, amawka igkis miyarap amadgatak inin hawkri. Nahme, amawka nah kabayhapnek avititak nuyakni, Kiyavwiye! Kabayhanay Kiyavwiye Uhokri!