Sawmus 103 - Uhokri Gahegbetawni Nukune akak Sawmus

Kiyavwiye Uhokri kehnenekwa ku pariye kabay udahan

¹ Kiyavwiye Uhokri, numawkan madikte nuhiyekemni kabayhap! Numawkan nah kabayhap akak madikte nudatni!

² Numawkan madikte nuhiyekemni kabayhap, Kiyavwiye. Nah ka miyehkere pahatnama kabayka ku pariye pikehni nudahan.

³ Pisnewa bayahminan ariw madikte nutaraksan hawata pis makniwhun ariw madikte nukahribdi.

⁴ Kibeyne, ig Kiyavwiye Uhokri amnihun ariw miyaka adahan nah ka biyuk giw. Ig ka gamnihrasima nukakuh. Ig hawata ka gabaysima nukakuh.

⁵ Ku samah nah ay amadga inin, nah uti ka aynsima kabayka giwntak. Ig iki nawaygi, ig keh nah ka mab, ig keh nah tiviknene kewa avaknibe amerempiye.

⁶ Ig Kiyavwiye Uhokri avanenekwa kehnenekwa ku pariye kabay udahanwiy. Ku wixwiy hiyepne mbeyne, ig parak abet uhawkanwiy.

⁷ Minikwak ig ekke gihiyekemni git amekene Moís. Avim ini ig ekke gidatni gitkis hiyeg izhaewyenevwi.

⁸ Ig Kiyavwiye Uhokri ignewa ka gamnihrasima, ka gabaysima. Ig ka giyaknisima ukakwiy; ig ahegbetnenekwa adahan kehne kabayka udahanwiy.

⁹ Ig akka wotwiy utaraksanwiy, heneme ig ahegbet adahan bayahminawiy niw. Gidagoni ka dahwa adahan avanenekwatma.

¹⁰ Wixwiy kis adahan ig hiyapkis ka aynsima mbeyne wotwiy avatra utaraksanwiy, heneme ig ka keh hene. Kibeyne ig amnihpewiy, ig ka katiwnisa utaraksanwiy wotwiy ku samah amawkan.

¹¹ Ku samah en ka aynsima aviyukan ariw waxri, hene hawata gamnihra ka aynsima ukakwiy wixwiy ku pariye kiyathig.

¹² Ku samah wahamavrik aviyukan ariw uvitkiyavrik, hene hawata aviyukan ig higih utaraksanwiy wowiy.

¹³ Ku samah pahavwi igti ka gabaysima gikak gikamkayh, hene hawata ig Kiyavwiye Uhokri ka gabaysima gikakkis ku pariye kiyathig.

¹⁴ Mmanawa ig hiyakni ku wixwiy yuma udatniwiy, wixwiy he wayk atabdabninenwa.

¹⁵ Hiyeg amedgenevwi inin igkis kewa pamatkabe. Gikiytanikis kewa ivuriti akiytanibe.

¹⁶ Ku aysaw kamaygviye huwit nit, in madikte kigise. In ka hiyapka akiw.

¹⁷ Inme Kiyavwiye Uhokri gamnihra in dahwa adahan avanenekwa, adahan ig amnihne madikte hiyeg ku pariye kiyathenevwi ig. Ini gabay dahwa adahan akiwka akiwnek

¹⁸ gikakkis hiyeg ku pariye wewnevwi akak gihiyekemni, ku pariye ihpenevwi gikumadukan.

¹⁹ Ig Kiyavwiye Uhokri bat kumadukene aynte inurik. Ig kumaduka madikte hiyeg inurikyenevwi, hawata madikte hiyeg ay amadga inin.

²⁰ Yis ahj detyevwi, ku pariye ihpenevwi giwn, ku pariye kehnevwi gibetki, uyay kabayha Kiyavwiye Uhokri.

²¹ Yisme gihiyegavu inurikyenevwi, yis gibukvig ku pariye kannivwiyevwi gidahan, uyay kabayhig.

²² Hawata, yisme madikte ku pariye Kiyavwiye Uhokri gikehavan muwapuw amun gikumadukan, uyay kabayhig. Nah hawata kabayha Kiyavwiye Uhokri avititak nuyakni!