Sawmus 102 - Uhokri Gahegbetawni Nukune akak Sawmus

Nah wakaymine pahapo

¹ Kiyavwiye, timapnaba nuviryepkawni. Timapnaba namnihswan pit.

² Ka ba ayamwa nuwhu ku aysaw nah ay abet wakaymniki. Timapnanuba ku aysaw nah amnihswene pit. Kaytwanaba nuwnuh kibehtenwa.

³ Nudehetni me madikemet kewa sariyanbe, nuvituhme ka aynsima awehe kewa ariwtrikbe tiket.

⁴ Nah mabimnevye kewa pamatkabe tigahka, sibuhka; nah kawnata maguwasni akiw.

⁵ Nah migiswa ka ahawnasima. He nah kevi avitnenwa.

⁶ Nah kewa pahavu kuhivrabe kahiyotnivyo pahapo amatmadga. Nah pahapo kewa pahavu pukupkube aynte avitmin payt mehwevye ikiska.

⁷ Nah ka himaksaki. Nah kewa pahavu kuhivrabe pahaponano avuheku payt.

⁸ Nuvetunyavu miyathan kiberevut. Neras ku pariye numahivwihtni igkis kawih nuwhu adahan humakisne mbeyne.

^9-10 Awaku pidagoni akak pimabyan, naxni wageswe hewyekata. Inme nukantak payegbitak akak nuhigvan, mmanawa pis sumuhpen, pis tukuhpen piyawakad piw.

¹¹ Nudehetni kewa anmaptibe menwempiye ku aysaw kamuw uguhpiye aygete. Nah kewa pamatkabe ku pariye tiviknene huruhrunene.

Nah kadniye aharit paytwempu Jerusalém

¹² Heneme, pis Kiyavwiye Uhokri, pis Ikivarat adahan avanenekwa. Madikte hiyeg aytwinihpiye akiw igkis kiyepinek.

¹³ Nah hiyak ku pis kannikawnek, pis kayahnek adahan pidahanwa paytwempu Jerusalém, mmanawa kuwis danuh ahawkanavrik adahan pis amnihni. Henewatbaki, ahawkanavrik kuwis danuh.

¹⁴ Usuh pihiyegavu piyawakad niw kuri heneme usuh adukwenewa batek nikak, hiyawa in madikte mehpika. Igkis amnihepni, hiyawa in madikte hehe warikwit.

¹⁵ Aysawnemenek neras nawwotunyevwi avisnek gibohri Kiyavwiye Uhokri. Henewatbaki, madikte ikivaratiyenevwi amedgene inin avisnek abohri gidatni.

¹⁶ Ku aysaw ig Kiyavwiye kannikasanek Jerusalém akiw, ig hiyapkisnek gikiytani ayge.

¹⁷ Avim ini hawkri ig timapnek gihiyegavu tukuhkare gamnihswankis hawata ig timapnek giviryepkawnikis.

¹⁸ Amawka inakni tamaka amadga kagta adahan uhiwhivwiy hiyaknek ku pariye ig Kiyavwiye Uhokri kehe hawata kahadbe neras ku pariye wayvukanek kabayhig hawata.

¹⁹ Ariwntak giwetri barewye inuriktak, ig Kiyavwiye Uhokri iveg; inuriktak ig iveg arimkanit waxri

²⁰ adahan timepne gimigiswankis kamaxkarempu, hawata adahan ig giwiwhpitnikis neras ku pariye ikaksepka adahan miyaka.

²¹ Hene ig Kiyavwiye Uhokri kabayhakanek ay avit Jerusalém akiw. Ayge giw kavusaw akkakanek

²² avim ini ku aysaw nawwotunyevwi gikakkis kumadukenevwi pahadguhwanek adahan kiyathene giw.

²³ Nah nudukwenewa takweye, heneme ig Kiyavwiye Uhokri wiwhe nudatni hawata ig matkuhe nayivwi amadga inin.

²⁴ Inneki keh nah aye git adahan ig ka iwevunma kuri pabuskak nudehetni. Ka sam. Kiyavwiye Uhokri, nuwohkiga, pisnewa ku pariye dahwa adahan avanenekwa.

²⁵ Pitatye akavuska hawkri pis kehe waxri humaw. Hawata akakwa piwak pis kehe en.

²⁶ Aysawnemenek waxri akak en in biyukenek. Pismeti dahwanek adahan avanenekwa. Aysawnemenek waxri akak en in mugumgupnek ke kamisbe. Pisme uniyavepninek ku samah hiyeg uniyah gikawihni, inme padakavepkanek.

²⁷ Pismeti ka uniyehwati. Pis pidukwenewa misakwa adahan avanenekwa.

²⁸ Inneki keh nah hiyak ku ukamkayuvwi misakwanek abet pabay. Igkisme gihiwhivwikis hiyapnek pamnihra adahan avanenekwa.