Sawmus 101 - Uhokri Gahegbetawni Nukune akak Sawmus

Kabayka ay uvinwa

¹ Kiyavwiye, nah paksap, nah kabayhap amin pabay inyewatnene.

² Nah mpiksaw wew avigkutavrik ku samah pihiyekemni. Aysaw pis paraknek abet nuhawkan? Nah kehkere pibetkinenwa ay nuvinwa.

³ Nah ka sarayhnek nuvegi arimkanit ariknawnama patahwaki amadgaya inin. Nah amiyha gikehnikis neras hiyeg ku pariye kane kamaxwenevwima pivitit. Nah kawnata daxtasewkerenek arit ini givathawnikis.

⁴ Nah ka ikawnek arit hiyeg mbayavye gihiyekemnikis. Nah kawnata idiswanek abetit ini gihiyekemnikis mbeyevyenenwa.

⁵ Ku nah timap pahavwi awnene mbeyevye iwit gimin pahavwi giharavrik, nah ka isaksanek ig awna inakni. Nah kawnata timepkerenek giwnkis hiyeg kawantiyavye ku pariye kane tuwatasewkere pitivut.

⁶ Heneme nah sarayhnek nuvegi gitkis hiyeg ku pariye kamaxwenevwi pivitit ay amadga inin. Nah keh igkis misakwanek ay numunuh. Ignes ku pariye wewnevwi wadit pikak ignesnewa nah darihwaknek gikakkis.

⁷ Yuma pahavwinema hiyeg wasaympiye misakwanek nuvineku. Yuma pahavwinema kinisekevutne misakwanek nuvetun.

⁸ Mpuse hewkevye nah mpiksawnek pisenwa gikakkis madikte hiyeg arewhavye avititak uwaxig. Hawata nah ivukenek avititak inin paytwempu gidahan Kiyavwiye Uhokri madikte ku pariye kehnevwi mbayka.