Sawmus 10 - Uhokri Gahegbetawni Nukune akak Sawmus

Kiyavwiye, aysawhka kuri pis pisenwa akak mbayavye gidatnikis?

¹ Kiyavwiye, mmahki pis piyawakad giwkis pihiyegavu? Mmahki pis ayemwe giwkis ku aysaw igkis abet kiyimwiki?

² Neras mbayavye igkis ikaw givitminkis madikte hiyeg. Igkis arewha gitkis hiyeg ku pariye yumanene gawaygikis gitivutkis. Uya keh igkis tuguhe arikut gidahankiswa giteynikis!

³ Igkis mbayavye keh giwantikis akak ku pariye gimawkankis igkis kehkere. Ku pariye hiyeg kowtyakuvye ig ka aritnama giw Kiyavwiye Uhokri. Ig hawata awna iwit ku pariye adahannenwa mahivwihne Kiyavwiye Uhokri.

⁴ Ku pariye hiyeg mbeyevye gihiyekemni ig ka hiyekere ku Kiyavwiye Uhokri ay. Git igwa kumaduka givit ay. Git Kiyavwiye Uhokri yuma ay.

⁵ Hiyaksa akak madikte ini mbayka ku pariye ig keh, heneme git ig ka kakehniyema. Ig giwevankama ku Kiyavwiye Uhokri ka katiwnisatinek gitaraksan git. Ig ikawvari datte giwkis givetunyavu.

⁶ Ig ivegmina gihiyekemni, ig awna: “Nah ka biyuksatinek nudatni. Nah ka hiyaptinek mbeyne.”

⁷ Gibiy kivun akak wasaymka akak ibiytahaki, hawata akak puwimahka. Giwn inenwa amin arewhakinenwa, amin mbaykanenwa.

⁸ Ig kadasa hiyeg kibeynevwi kennesa arimkat paytwempu adahan giwmeptenkis.

⁹ Ig kadasa hiyeg ke kawokwinebe amun gayemwekri. Ig wahap hiyeg ku pariye yumanene gimaptentenkis adahan ig giwmeptenkis. Nikwe ig kamax giwin ariku giteyni, ig tivikevgi givinwat.

¹⁰ Igme giwin dunihbetepka, ig tikisbetepka warikwit. Ig hahwa awaku ner givetunya ka gidatnisima.

¹¹ Ayteke ner awayg mbeyevye gihiyekemni awna: “Uhokri ka aritnema ariw inin. Ig manan, ig ka hiyap ariknawnama.”

¹² Kiyavwiye Uhokri, kannikawnaba. Hiyapkis git ner ku pariye mbeyevye gihiyekemni akak piwak detye. Ka ba miyeh neras ku pariye ay giwaku. Igkis yumanene gimaptentenkis giw!

¹³ Mmahki ner awayg mbeyevye gihiyekemni ig ka kiyatha Kiyavwiye Uhokri? Mmahki ig ivegmina gihiyekemni ku Kiyavwiye Uhokri ka diyuhkisnek gihiyegavu gimigkis?

¹⁴ Heneme pismeti, Kiyavwiye, pis hiyap pihiyegavu gihiyvankis mbeyne. Pis hiyap gikadnikis. Nikwe pis ahegbet adahan amnihpigkis avanenekwa akak piwak detye. Igkis mabimnavye kamaxwa pivitit, mmanawa avanenekwa pis parak abet gihawkankis.

¹⁵ Kiyavwiye, aysawhka kuri pis pisenwa akak mbayavye gidatnikis? Hiyapkis gitkis avatra gihiyekemnikis amebyemni. Ka ba isaksin mpiya henentima.

¹⁶ Kiyavwiye, pis ikivarat adahan avanenekwa. Hiyeg ku pariye kane ihpekere piwn igkis tukuhavepkanek ariw piwaxig.

¹⁷ Igkisme neras ku pariye tuwatasewnevwi pitivut pis timapnek giviryepkawnikis. Pis ikinek gawaygikis.

¹⁸ Pis timapnek gamnihswankis neras ku pariye hiyepnevwi mbeyne, neras ku pariye migenavye. Pis paraknek abet gihawkankis adahan gimaptentenkis kahadbe neras hiyeg amadgayavu inin ka takunima avisasigkis akiw.