Sawmus 1 - Uhokri Gahegbetawni Nukune akak Sawmus

Ivegminene uhiyekemni takunipti amin Uhokri gihiyekemni

¹ Ka aynsima kabayka ay gidahan pahavwi ku pariye kane wew akak hiyeg mbayavye gihiyekemnikis, ine ig kawnata sibuh avigku gihinakis hiyeg taraksavye, ine ig kawnata bat gikakkis neras ku pariye mahivwihnevwi Kiyavwiye Uhokri.

² Heneme ig batek ka aynsima akak Uhokri gannasan, ig ivegminene gihiyekemni amin Kiyavwiye Uhokri gihiyekemni mataytak hewke tiyegem. Ku gihiyekemni hene, ig uti ka aynsima kabaykanek.

³ Ig humaw kewa pahakti ahbe mutuhka akigbimna warik ku pariye sarayhnanokwa guw avanenekwa. ku aysaw guhawkanavrik danuh, eg ka taraksati. Guvan hawata avanenekwa ka miyavewti. Igi hiyeg hawata. Madikte ku pariye gikehni in adahan kabaykanenwa.

⁴ Ignesme hiyeg taraksavye igkis ka henema. Igkis kewa dug amarbe mihikuhka, kibehtenwa mayg pasuhni, in ka hiyapka akiw.

⁵ Inneki keh aysawnemenek avim ini ku aysaw Kiyavwiye Uhokri gihiyvetnikis hiyeg ba igkis kibeynevwiwatma, avim ini igkis tukuhavepkanek. Igkis ka isaksakanek misakwa gibetkis hiyeg kibeynevwi.

⁶ Mmanawa ig Kiyavwiye Uhokri avuriw hiyeg kibeynevwi. Heneme hiyeg mbayavye gihiyekemnikis gidahankis mbeyne akak miyaka.