Romanus 9 - Uhokri Gahegbetawni Nukune akak Sawmus

Uhokri ikaksa ka aynsima kabayka ta gitkis judeyenevwi

¹ Nukebyuvwi, nah ka aynsima muwaka nuyakivwi judeyenevwi pukuhpa inakni Uhokri gamnihra. Ku samah Cristo ay nuvituh nah awna inakni iwit inyewatbakin. Ka nuwasemnima. Gaytakkis hiyeg iki ku nah ka batek gikakkis hiyeg judeyenevwi. Bawa nah inyewa batek gikakkis. Nah hiyakni abet nuhiyekemni, Uhokri Gitip hawata akka nutuh ku inakni iwit inyewa.

² Nah wakaymni gidahankis nuyakivwi judeyenevwi ka aynsima. Nah kayah gidahankis takunipti avititak nuyakni.

³ Pi kabaytekama nahwatkam biyuk giw Cristo mpinekata igkis nukebyuvwi judeyenevwi biyuke giw. Nah kadniye gidahankis, mmanawa uhawkri pahavwiwa gikakkis. Igkis izhaewyenevwi hawata ke nahbe.

⁴ Minikwak uhawkrivwi izhaewyenevwi kabunuga gikak Uhokri. Ig Uhokri keh igkis humaw gihiyegavu. Ig ekkenenekwa gannu gitkis akak gamuwyi. Ig akka gitkis ku pariye gimawkan. Ig akka gitkis gikumadukan. Ig akka gitkis adahan ku samahpa igkis kiyathig. Ig ikakse gitkis ka aynsima kabayka.

⁵ Gihawkrikis pitatyevwi igkis kiyatyevwi hiyeg igkis amekene Abraawh gikak amekene Izaki, amekene Jakó. Igwa Cristo kinagsew ay gibetkis izhaewyenevwi ku pariye kumadukene madikte. Uhokri ku pariye kis adahan wixwiy kabayha adahan avanenekwa. Ameh.

Uhokri giwn ka waditnevyenenma

⁶ Heneme igkis izhaewyenevwi ka uti madikte ini kabayka ku pariye Uhokri ikakse gitkis gihiyegavu. Ka sam. Inakni giwn ka waditnevyenenma. Ka ik adahan wis awna ku giwn he waditnevyenen. Mmanawa igkis izhaewyenevwi igkis ka madiktema igyewa Uhokri gihiyegavu.

⁷ Ini ku samah igkis amekene Abraawh gihiwhivwi ka innema keh igkis humaw Uhokri gihiyegavu. Nah kehte abektey gikakwa amekene Abraawh. Ig amekene Abraawh kakamkayh piyana gikebikis, ig amekene Izaki gikak ig amekene Izmayew, heneme igkis ka piyamatema gikamkayh igyewatma giwntak Uhokri. Ig Uhokri awna: “Nerasnen gikamkayuvwi Izaki nerasnen ik adahan igkis humaw nuhiyegavu.”

⁸ Igme amekene Izmayew ig amadga wayk awaku ku samah amekene Abraawh mpiksaw kakamkayh akak gikehbetanenwa. Nikwe ig amekene Izmayew gikamkayuvwi ka humaw Uhokri gihiyegavu. Igme gikamkayh amekene Izaki ku pariye igyewa giwntak Uhokri, ku pariye ig Uhokri ikakse git, igi gikamkayuvwi humaw Uhokri gihiyegavu.

⁹ Mmanawa ig Uhokri ikakse amekene Izaki ta git amekene Abraawh. Ig awna git: “Adahan pahak kamukrinek avigkutavrik nah keh pihayo Sara kakamkayhnek.” Henewatbaki ig Uhokri ikakse git.

¹⁰ Igme amekene Izaki, ig kuwis kiyapariye kuwis, ig Uhokri hawata ikakse ku pariye danuh gitkisnek gidahanwa gikamkayuvwi. Avim ini ig uhawkriwiy Izaki kakamkayh abes gukak gihayo amakano Rebeka. Ig eggutye kewye Ezaú. Igme buttiye kewye Jakó.

¹¹ Igkis abes yumahte amadga hawkri, igkis yumahte gikehnikis ine mbayka ine kabayka, heneme kuwis ig Uhokri ikakse ku pariye danuh gitkis. Ig awna gut amakano Rebeka: “Ku aysaw pis kakamkayhnek, ner eggutye kumadukakanek gavit ner buttiye. Inakni areketni huwewe wot ku Uhokri avanenekwa ig kaniy gihiyegavu ku pariye gimawkan.”

¹² Ka akakma ukehbetanenwatma wis kaniykiswa git. Heneme ig humakwi ta gimkat giwnteknewa.

¹³ Henewa inakni gikaksan gut amakano Rebeka in kuwis kahayak, mmanawa ariwnteke ini, ayipa guhiwhivwikis amadga hawkri, ig Uhokri awna: “Nah kuwis kavigsa Jakó gihiwhivwi. Igme Ezaú gihiwhivwi nah ka kavigsigkis.” Henewatbaki ig Uhokri gannasan awna.

Yuma pahavwinema waytakwiy kis adahan Uhokri amnihgi, heneme ig amnih ku pariye ig amnihkere

¹⁴ Nawenetke pahavwi yaytak hiyapni hene, ig awna: “Uhokri ka keh wadit ku samah ig ka kavigsa amekene Ezaú gihiwhivwi.” Nukebyi, ka muwaka awna inakni hene.

¹⁵ Mmanawa ig Uhokri awna ta git amekene Moís. Giwn: “Nah amnih ku pariye nah amnihkere. Nah bayahmina ku pariye nah bayahminekere.”

¹⁶ Nikwe kawki umawkanma keh ig kaniyvew. Ine kawnata ukehbetanenwatma. Igwa Uhokri kaniy ku pariye ig amnihkere giwnteknewa.

¹⁷ Ig Uhokri gannasan akka inakni huwewe wotwiy. Mmanawa in akka ku samah ig keh gikak amekene Faraó. Ig awna git: “Nah keh pis humaw hiyeg gikivarakis kahadbe madikte hiyeg hiyap ku samah nah kanannusima hiyak pikak. Kahadbe igkis hiyapni hene, igkis kinetihwa numinuh muwapuw amadga hawkri.”

¹⁸ Henewa ig Uhokri amnih ku pariye ig amnihkere. Ig dahkis giyakni ku pariye ig dahkiskere.

¹⁹ Nawenetke pahavwi yaytak hiyapni hene, ig awna nutuh: “Nikwe ka amekene Faraó gihawkanavrikma ku ig dahkise giyakni. Mmahki ig Uhokri sarayhni givitit? Ig kehne ku samah Uhokri ikiswanaw gidahan.”

²⁰ Nukebyi, ka ba awna inakni hene. Pis he hiyeg amadgayanen inin. Pariyenekap adahan pis karatonaw gitivut Uhokri? Yuma pahavwinema waytakwiy kis adahan Uhokri amnihgi. Wixwiy ka ariknawnema gitivut. Wixwiy kewa parawkambe. Igme Uhokri ig kewa pahavwibe ku pariye batak ini parawkam. Pahavwi gibatkan ka hiya inma awna git: “Mmahka pis kehun hene?”

²¹ Ku pariye batak akak parawkam ig ik adahan ig batak teggin ku samah gimawkan. Ariwntak inwata barew ayesri parawkam ig ik adahan ig keh pisaya teggin. Paha teggin barewye adahan kibeyne kawihka, pahame teggin mbeyevye adahan kawihka henen. In ka adahanma bayahka.

²² Hawata ig Uhokri gikakkis hiyeg. Gaytakkis hiyeg ig kavigsigkis. Gaytakkisme ig ka kavigsigkis. Ignes kawih adahan padekwiki hawata ke paha tegginbe mbeyevyebe. Heneme ig kiyakan adahan givedkeptenkis. Mmanawa ig muwaka akka ku samah ig ka batek akak patahwaki. Ig muwaka akka hawata ku samah ig detye adahan pisenwa akak patahwaki. Neras ku pariye ig ka kavigsigkis igkisnewa kawih adahan areketni ini.

²³ Hawata akiw ig Uhokri muwaka akka ku samah ig ka gamnihrasima. Ig muwaka akka ku samah gamnihra in ka nibaysima. Neras ku pariye ig kavigsigkis adahan ignes kawih gikiytani, igkisnewa kawih adahan areketni ini gamnihra.

Uhokri amnih hiyeg kane judeyenevwima payak gikakkis hiyeg judeyenevwi

²⁴ Kibeyne, nukebyuvwi, wixwiy Uhokri gikanyanvu adahan ig ukavriwtenwiy. Waytakwiy hiyeg judeyenevwi. Waytakwiyme hiyeg kane judeyenevwima. Heneme kibeyne, wixwiy madikte gibetkivu gikanyanvu.

²⁵ Henewa in ku samah ig awna amadga amekene Oseyas gikagtan. Ayge ig awna: “Neras hiyegiviyenevwi ku pariye kane judeyenevwima ku pariye pitatye ka nudahanma, kurime nah keh igkis humaw nudahan. Neras ku pariye pitatye nah ka batek gikakkis kurime nah keh igkis humaw nubetkivu.

²⁶ Ku kavit waxri ku kiney minikwak nah awna gitkis ku igkis ka nuhiyegavuma, aygewata igkis kanumkanek Uhokri dehetniye gikamkayuvwi.”

²⁷ Giminkisme hiyeg izhaewyenevwi ig Uhokri gawneve amekene Izaíyas awna: “Yis izhaewyenevwi, hiyawa yis ka aynsima yikebi ke kayhbe akigbimna parahwokwa. Heneme ka kibitema yaytak isahptawnek.

²⁸ Mmanawa Ukivarawiy ka ayivwi hiyapkis yit avatra yitaraksan ku samah ig kuwis awna. Ig hiyapkisnek yit pahatya amin pahakte amadga wayk.”

²⁹ Hawata ig amekene Izaíyas awna: “Ig Ukivarawiy Uhokri ig ka gidatnisima. Wake ig ka amnihpima mpita waytakwiybe, nikwekam madikte wixwiy biyukwikam. Wixwiy biyukap ke hiyeg sodomayenevwibe hawata ke hiyeg gomohayenevwibe.” Henewa in ku samah ig amekene Izaíyas awna.

Kaba madikte hiyeg judeyenevwi kote kamaxwekerete givitit Jesus

³⁰ Nawenetke pahavwi yaytak hiyapni hene, ig awna: “Mmahki Uhokri gawnevevu awna inakni iwit?” Nukebyi, igkis awna inakni iwit hene adahan ekkene wot ku neras hiyeg kane judeyenevwima, ku pariye minikwak kane mpiksaw wew wadit giwtrik Uhokri, kurime igkis wageswe kewa kibeynevwibe giwtrik awaku ku samah igkis kamaxwe givitit Cristo.

³¹ Igkisme hiyeg izhaewyenevwi ku pariye mpiksewnes wew wadit giwtrik Uhokri akak ku samah igkis ihpenes amekene Moís gikumadukan, igkis mpiksewviwatkama, heneme igkis ka hiya igkisma wageswa kewa kibeynevwibe giwtrik.

³² Nawenetke pahavwi yaytak hiyapni hene, ig awna: “Mmahki ka hiya igkisma?” Nah akkite pit. Awaku akak gikehbetankisnenwa igkis mpiksaw adahan igkis ikewnes kibeyne giwtrik Uhokri. Igkis ka kamaxwekere givitit Kiyavwiye Jesus. Amun ini nikwe ig Kiyavwiye Jesus humaw kewa pohow tipbe ku kavitit igkis tese igkis tuguhe dunibdiwarumpi.

³³ Henewatbaki ig Uhokri gannasan awna. In awna: “Ivegnay. Aysawnemenek nah ke wotbe nah ikisne pohow tip ay gibetkis hiyeg siyawhyenevwi. Egu tip kehnek igkis tuguhe dunibdiviwarumpikisnek. Ku samah pahavwi kiyimwihwa akak tip ku kavit ig tese gikugku, igkis judeyenevwi hawata igkis kiyimwihwanek gikak ner ku pariye nah ikise ayge gibetkis. Heneme ku pariye hiyeg kamaxwenevwi givitit igkis ka tuguh dunibdivinemanek. Igkis ka marakwa givitkis gitivut Uhokri.” Henewatbaki ig Uhokri gannasan awna.