Romanus 8 - Uhokri Gahegbetawni Nukune akak Sawmus

Ku Uhokri Gitip kumadukawiy, wixwiy ka adahanma miyakama akiw

¹ Kurime ig keh wixwiy isahptaw adahan wixwiy ka isaksaw arit mbeyvye hiyakemniki amun ini ku aysaw wixwiy pahavwiwa gikak Cristo Jesus. Amun ini nikwe wixwiy ka adahanma miyakama akiw.

² Wixwiy ke wotbe wixwiy kuwis kannikawbe ariw umiremniwiy git Uhokri. Kuri wixwiy iveg gidahan Uhokri awaku ku samah wixwiy pahavwiwa gikak Cristo. Kuri ig Cristo Gitip ay abet uhiyekemniwiy. Ignewa ku pariye kumadukawiy. Ayge nikwe wixwiy isahptaw ariw uvathawniwiy akumadukan adahan wixwiy ka uti ini miyaka ku pariye keh hiyeg biyuk giw Uhokri adahan avanenekwa.

³ Inme amekene Moís gikumadukan in yuma awaygisima adahan in keh wis humaw kibeyne avigkutavrik ku samah umawkan, mmanawa uvathawni mpithanaw adahan wis ka ihpin. Igme Uhokri ig ka gawaygisima adahan ig keh wis humaw kibeyne. Ig awahkise gidahanwa gikamkayh adahan ig kinaghaw ig wageswa ihtikekne ke wixwiybe taraksavye adahan ig umahkiswe udukwenavrikwiy adahan katiwnihpiye utaraksanwiy. Ayge nikwe ig matekbete ahawkan ini uvathawniwiy akumadukan ku pariye aynene abet uhiyekemniwiy adahan in ka taraksasawiy akiw.

Ku Uhokri Gitip kumadukawiy, wixwiy isahptaw ariw uvathawniwiy akumadukan

⁴ Inneki keh wixwiy awaygye adahan wixwiy iha Uhokri gikumadukan adahan wixwiy wew wadit ku samah ig aya wotwiy. Mmanawa wixwiy ka wew akakma uhiyekemniwiy amadgaya inin akiw, heneme wixwiy wew akak Uhokri Gitip gihiyekemni.

⁵ Mmanawa ku pariye hiyeg wewne akak gihiyekemnikis amadgaya inin, ignes aminenekwa hiyakemniki amadgaya inin. Ignesme ku pariye wewnenes akak Uhokri Gitip gihiyekemni, igkis aminenekwa Uhokri gihiyekemni.

⁶ Ku pariye aminenekwa hiyakemniki amadgaya inin, aysawnemenek ignes miyarapnek igkis biyuk giw Uhokri adahan avanenekwa. Ignesme neras ku pariye aminenekwa Uhokri Gitip gihiyekemni, igkis aymuhwanek gimun Uhokri adahan avanenekwa. Hawata akiw igkis wew karisaw ay amadga inin.

⁷ Hiyakemniki amadgaya inin suguhak akak Uhokri gihiyekemni. Hiyeg ku pariye wewne akak ini hiyakemniki amadgaya inin ignes ka kumadukasewkere ta git Uhokri. Wake igkis kumadukasewkerebe git Uhokri, igkis kawnata hiyak asamanakam.

⁸ Mmanawa ku pariye hiyeg wewnene akak gihiyekemnikis amadgaya inin ignes ka hiya akehka Uhokri gibetki.

⁹ Wixwiyme ka huwithasaw arit uhiyekemniwiy amadgaya inin akiw. Wixwiy ihpene Uhokri Gitip giwn. Mmanawa ig Uhokri Gitip ay abet uhiyekemniwiy. Ku pariye hiyeg yuma Cristo Gitip ay abet gihiyekemni, igi ka Uhokri gikamkayhma. Heneme kibeyne, wixwiy igyewa gikamkayuvwi.

Uhokri Gitip keh utivwiy akak uvitwiy aymuhwa adahan avanenekwa

¹⁰ Hiyawa uvitwiy miyap awaku uvathawniwiy, utivwiyme ka miya. Ku Cristo ay uvitwiy, ig Gitip keh utivwiy aymuhwa adahan avanenekwa awaku ku samah ig keh ig barewvitye.

¹¹ He ini uvitwiy iveg akiw aysawnemenek. Uhokri kannikase Kiyavwiye Jesus givit ariwntak gimiremni. Ku ig Uhokri Gitip ay uvitwiy, nikwe ig ku pariye kannikase Cristo Jesus givit ariwntak miyaka ig hawata kannikasa udahanwiynek uvitwiy amadgaya inin. Ig kannikasin akak Gitip gannu ku pariye ay uvitwiy.

¹² Nikwe nukebyuvwi, wixwiy ka mpiksaptihka akiw adahan wixwiy wew akak uhiyekemniwiy amadgaya inin.

¹³ Mmanawa ku wixwiy wew akak ini uhiyekemniwiy amadgaya inin, wixwiy miyarapnek. Heneme ku wixwiy wew akak Uhokri Gitip gihiyekemni, ku wixwiy umahkis uhiyekemniwiy amadgaya inin git Gitip, ayge nikwe wixwiy ka miya giw Uhokri. Heneme wixwiy aymuhwa gimun Uhokri adahan avanenekwa.

Uhokri Gitip keh wixwiy humaw Uhokri gikamkayuvwi

¹⁴ Mmanawa ku pariye hiyeg huwithasaw ta git Uhokri Gitip ignesbaki ku pariye Uhokri gikamkayuvwi. Ayge nikwe igkis aymuhwa gimun Uhokrinek.

¹⁵ Mmanawa ku samah wixwiy ameve Uhokri Gitip, ig ka kumadukawiy akakma mpiksakima ke wotbe wixwiy gibukvigbe. Kuri ig kumadukawiy akak kabayka hawata ku samah pahavwi igti kumaduka gikamkayh. Kuri wixwiy iha giwn ka akakma wavisniwiyma gibohri, heneme wixwiy iha giwn awaku ku samah ig Wigwiy. Ig Gitip keh wixwiy humaw gikamkayuvwi. Ig keh wixwiy kighaw ta git, wixwiy kanumgi “Pa, Niguh”.

¹⁶ Kibeyne, ig Uhokri Gitip akka wotwiy abet uhiyekemniwiy ku wixwiy igyewa Uhokri gikamkayuvwi.

Aysawnemenek wixwiy kawih Jesus gikiytaninek

¹⁷ Ku samah wixwiy Uhokri gikamkayuvwi, nikwe ku pariye Wigwiy gidahan in udahanwiywata. Aysawnemenek wixwiy darihni hawata ku samah gikamkayh Cristo kuwis darihpin. Wixwiy hiyepne mbeyne kuri avatra ku samah wixwiy gikamkayuvwi. Heneme ka sam. Mmanawa ku wixwiy hiyap mbeyne payak gikak, ayge nikwe wixwiy kawih gikiytaninek payak gikak.

¹⁸ Inin mbeyne ku pariye wixwiy hiyepne ku akak inin, in ka ariknawnema. Aysawnemenek wixwiy humaw Uhokri gikamkayuvwi ka ukiytaniwiysima akak Jesus gikiytani. Nah hiyakni ku ini ukiytaniwiy in ka aynsima mpiya ariw inin mbeyne.

¹⁹ Mmanawa madikte ariknebdi ku pariye Uhokri gikehavan in wahepnenekwa adahan ku aysaw wixwiy hiyapkiska ku wixwiy gikamkayuvwi avigkutavrik ku samah gimawkan Wigwiy.

Aysawnemenek madikte ariknebdi kibeynekuyenek

²⁰ Kuri ini ariknebdi ku pariye Uhokri gikehavan in ka dahwa, in ka kabayntiwatma kema pitatyema ku samah hawkri humaw. Heneme ka nihawkanavrikma. Igwa Uhokri keh in ka dahwa. Heneme ig keh in wahepnenekwa he ku aysaw nihawkanavrik danuh.

²¹ Mmanawa aysawnemenek in ka hiyap biyukka akiw in ka mugumugu akiw. Avim ini wixwiy hiyapkiska ku wixwiy Uhokri gikamkayuvwi kiyatyevwi akak Kiyavwiye Jesus gikiytani avigkutavrik ku samah Uhokri gimawkan. Hawata avim ini madikte in ariknebdi ku pariye Uhokri gikehavan in hawata kibeynekuye, kiyatyekuye payak ukakwiy.

²² Wixwiy hiyakni kuri ku madikte ku pariye Uhokri gikehavan in he kayawvari misekwe, in kayah ke pahavu tinobe pamakutekwiyobe.

Wixwiy wahepnene ku aysaw wixwiy avrikutavrik ku samah Uhokri gimawkan

²³ Ka ininewatma ini ariknebdi kayah. Wixwiy hawata kayah. Wixwiy kuwis kadahan in Uhokri gikan pitatye wotwiy. Ini gikan in Uhokri Gitip. Heneme wixwiy kayah avititak uyakniwiy, wixwiy kahekanaw ku samah wixwiy wahepnenete ku aysaw wixwiy hiyapkiska ku wixwiy Uhokri gikamkayuvwi kiyatyevwi akak Kiyavwiye Jesus gikiytani. Mmanawa avim ini wixwiy kawihnek uvitwiy kiyatye ku pariye kawih udahanwiy.

²⁴ Ku samah ig Uhokri kuwis kidiswewiy in ikenenekwa wawaygiwiy adahan wixwiy ihpenene ku aysawnemenek wixwiy humaw avigkutavrik ku samah gimawkan. In hawata ikenene wawaygiwiy adahan wixwiy wahepnenekwa ku aysaw in danuh. Wake in kuwis danuhbe wixwiy ka wahapnikam akiw. Mmanawa wis ka wahap ku pariye kuwis danuh wot.

²⁵ Wixwiyme, ini kabayka ku pariye wixwiy wahepnene in kote danuhte. Heneme wixwiy kiyaknihwa adahan wixwiy wahepnene ku aysaw in danuhnek adahan wixwiy humaw avigkutavrik ku samah Uhokri gimawkan.

Uhokri Gitip ayavaw piriyepkaw

²⁶ Hawata akiw ig Uhokri Gitip ayavaw piriyepkaw. Wixwiy yuma uhiyekemniwiy. Wowntekneywa wixwiy ka kannuh piriyepkaw ku samah Uhokri gimawkan. Heneme ignewa Uhokri Gitip piriyepkaw udahanwiy. Ig keh wixwiy kayah giwakemni avititak uyakniwiy. Ig keh wixwiy kayah mpiynevevye he wixwiy kahekanaw. Wixwiy ka ik adahan akkin git akakma iwit.

²⁷ Ka sam. Ig Uhokri ka aminama ariw iwit. Ig amin ku pariye avit uyakniwiy. Ig hiyak ku kamin Gitip awnene ay avit uyakniwiy. Mmanawa ig Uhokri Gitip keh uviryepkawniwiy tuguh avigkutavriknawa ku samah Uhokri gimawkan gidahankis gihiyegavu.

Madikte wageswanek adahan kabayka udahanwiy

²⁸ Ku wis inyewa batekye gikak Uhokri, ku wis kuwis iha Uhokri gihumkan ta gimkanit adahan igme keh ukak ku samah ig ikiswanaw udahan, nikwe madikte ku pariye danuh wot in wageswanek adahan kabayka udahan.

Wixwiy wageswanek hehpekuye ke Jesusbe

²⁹ Ku samah yumahte hawkri ig kuwis hiyakwiy. Ayge ig ikiswanaw udahanwiy adahan wixwiy wageswa hehpekuye ke gikamkayhbe Kiyavwiye Jesusbe, kahadbe ig ka aynsima gikamkayuvwi kewa Kiyavwiye Jesusbe. Igme Kiyavwiye Jesus ig gikamkayh eggutye, wixwiyme gikamkayuvwi buttiyevwi.

³⁰ Ku samah ig ayipa ikiswanaw hene udahanwiy, ig humekwewiy ta gimkat. Ku samah ig humekwewiy, ig hawata wadithebdihe utaraksanwiy. Ku samah ig wadithebdihe utaraksanwiy, ig hawata keh wixwiy kiyatye akak Kiyavwiye Jesus gikiytani.

Uhokri kavigsawiy kabayntiwa, uvetunyavuwiy ka hiya usamanakwiy

³¹ Inneki keh wixwiy hiyakni ku ig Uhokri kavigsawiy kabayntiwa. Ku samah ignewa Uhokri kavigsawiy, nikwe yuma pahavwinema uvetunyawiy hiya usamanakwiy.

³² Kibeyne, ig Uhokri kuwis ekke ka aynsima kabayka wotwiy. He ig ka kavigsa gidahanwa gikamkayh wowiy. Ig ikevgi adahan hiyepne mbeyne udahanwiy. Yuma kabayka hene akiw. Ku wis hiyap ig kuwis ike gikamkayh udahanwiy, inkata akiw ig ka iki wotwiy madiktema kabayka?

Utaraksanwiy ka hiya amaptanka Uhokri gamnihra danuh wotwiy

³³ Wixwiynewa Uhokri gihiyegavu gibetkivu. Ignewa Uhokri kuwis kehe wixwiy kewa kibeynevwibe giwtrik. Pariye hiyeg hiya ukamyahkawiy kuri ta git Uhokri? Yuma pahavwinema.

³⁴ Pariye hiyeg ayta ivukwawiy hanpa arimkanit biyukwiki avatra utaraksanwiy? Yuma pahavwinema. Mmanawa igwa Cristo Jesus kuwis umahkiswe udukwenavrikwiy avatra utaraksanwiy. Ka ininewatma ig umahkiswe, ig hawata kannikew ariw gimiremni. Kawnata ininewatma ig kannikew ariw gimiremni, ig kuri ig ay gihumwa Uhokri. Ig piriyepkewnenekwa git Uhokri udahanwiy.

Yuma ariknawnema mbayka hiya amaptanka Uhokri gamnihra danuh wotwiy

³⁵ Nikwe pariye hiya amaptanka Cristo gamnihra danuh wotwiy? Yuma ariknawnema mbayka hiya usamanakwiy. Ka sam wixwiy abet mbeyne abet kiyimwiki. Kawnata sam hiyeg hiyapkis mbeyne wotwiy. Kawnata sam wixwiy kamax mativwa. Kawnata sam wixwiy madipti. Kawnata sam wixwiy abet kibohriki, abet miyaka. Kibeyne, yuma ariknawnema mbayka hiya amaptanka Uhokri gamnihra danuh wotwiy.

³⁶ Henewa wixwiy hiyap ini mbeyne ku samah Uhokri gannasan awna. In awna: “Kiyavwiye, usuh pihiyegavu ay abet miyaka mataytak. Hiyeg iki usuh kewa muwtohbe adahan igkis giwmeptenkis.”

³⁷ Ka sam. Madikte ini mbeyne in ka hiya awenkebdihka uhawkanwiy. Wixwiy ik adahan wanekbeta ahawkan ini mbeyne akak Cristo gamnihra. Igme wagesni humaw kabayka mpiy ini mbeyne akiw.

Yuma ariknawnema hiya amaptanka Uhokri gamnihra danuh wotwiy

³⁸ Mmanawa nah hiyakni ku yuma ariknawnema hiya amaptanka Uhokri gamnihra danuh wotwiy, ine umiremniwiy, ine wowskawniwiy amadga inin, ine mbeyviye ahj, ine wavityempu gikivarakis, ine ku pariye ay amadga inin kuri, ine ku pariye nehmnikuhpiye.

³⁹ Ine ku kiney wixwiy aynte inut, ine aynte warikwi, ine hiyeg detyevwi. Yuma pahavwinema hiya amaptanka Uhokri gamnihra danuh wotwiy, mmanawa wixwiy pahavwiwa gikak Ukivarawiy Cristo Jesus.