Romanus 7 - Uhokri Gahegbetawni Nukune akak Sawmus

Wixwiy isahptaw ariw uhiyekemniwiy amadgaya inin

¹ Nukebyuvwi, yis pukuha ku pariye inakni nuwnuh, mmanawa yis hiyak ku pariye kumadukaki. Wis amedgenevwi inin wis kumadukaka avit hiyakemniki, amin ku pariye amawka wis keh, ku pariye amawka wis ka keh. Ininewa ku aysaw wis miyap ariw ini kumadukaki nikwe wis isahptaw niw.

² Nah kehte abektey marihwa yis hiyak huwewe. Pahavu tino, ku eg kigihgu, amawka eg misakwa ay gimun gugihgi ku samah gayivwi amadga inin. Hene ukumadukanwiy awna. Heneme ku ig gugihgi miyap guw, nikwe inakni ukumadukanwiy ka kumadukig akiw. Eg isahptaw niw.

³ In kahayak huwewe wot, mmanawa ku aysaw ig gugihgi kote miyate, ku eg kamax nawenyewa awayg, eg kanumka powkemnivyo. Heneme ku gugihgi miyavi, ku eg kamax nawenyewa awayg akiw, eg ka kanumka powkemnivyoma akiw. Eg ka kanumka powkemnivyoma awaku inakni hiyakemniki ka kumadukig akiw.

⁴ Nukebyuvwi, wixwiy hawata kewa nor tinobe. Minikwak wixwiy kumadukasaw arit amekene Moís gikumadukan. In ke wotbe wixwiy maripkewne nikak. Inme gikumadukan kewa ugihgiwiybe. Kurime wixwiy kewa pahavu tinobe ku pariye kuwis miyop giw gugihgi. Ku samah ig Cristo umahkiswe in ke wotbe wixwiywatbe miyap payak gikak ayge. Kuri wixwiy kuwis isahptew ariw amekene Moís gikumadukan adahan wixwiy wageswa gidahan pahavwiwa akiw. Kuri wixwiy gidahan Cristo ku pariye kannikasepka ariwntak gimiremni. Ku samah wixwiy pahavwiwa gikak Cristo, amun ini nikwe kabayka gidahan Uhokri pes wowntakwiy.

⁵ Minikwak ku samah wixwiy akakte uhiyekemniwiy amadgaya inin, avim ini uvitwiy kumadukaka avit uvathawniwiy. Ayge nikwe he mbaykanen pes wowntakwiy. Wake wixwiy ka miniwbe niw, nikwekam wixwiy miyakam, wixwiy biyuk giw Uhokri adahan avanenekwa. Mmanawa amekene Moís gikumadukan awna: “Ku pahavwi keh mbayka, amawka ig umehpika.”

⁶ Kurime wixwiy kuwis isahptew ariw inakni amekene Mois gikumadukan ku pariye kumadukawiy minikwak. Mmanawa kuwis uhiyekemniwiy amadgaya inin in ke wotbe in kuwis miyapbe wowiy. Kuri ik adahan wixwiy keh Uhokri gibetki. Wixwiy ka keh gibetki akakma ku samah wixwiy mpiksaw akak ukehbetanwiynen adahan wixwiy ihpene giwn gikumadukan tameknene amadga kagta. Heneme wixwiy keh gibetki akak ku samah wixwiy kadahan nukunewa uhiyekemniwiy ku aysaw wixwiy ihpa giwn Uhokri Gitip.

Moís gikumadukan adahan areketni uvathawniwiy wotwiy

⁷ Nawenetke pahavwi yaytak hiyapni hene, ig awna: “Nikwe amekene Moís gikumadukan in ka kibeynema.” Nukebyi, ka ba awna inakni hene. Innewa amekene Moís gikumadukan areketni wot ku pariye ka kibeynema adahan wis keh. Nah akkite yit ku samah. Wake amekene Moís gikumadukan ka awnabe nutuh: “Ka ba miyarhaw” nikwekam nah ka hiyakkam ku nah kehne mbayka ku samah nah miyarhaw. Nah ka hiyakkam ku patahwaki ay abet nuhiyekemni.

⁸ Kurime gikumadukan kuwis ekkepka nutuh. Nikwe nah hiyakni ku patahwaki ay abet nuhiyekemni awaku ku samah in keh nah miyarhaw arit arakembet. Wake amekene Moís gikumadukan yumahbe, nah ka hiyakkam ba patahwaki ayma.

⁹ Minikwak ku samah nah kote hiyakte amekene Moís gikumadukan, avim ini nah ka hiyaknima ba patahwaki ayma abet nuhiyekemni. Nah ka hiyakwa ba nah tiviknenema adahan miyaka dehetniki. Heneme ku samah nah hiyeke amekene Moís gikumadukan, avim ini nikwe in kahayak huwewe nutuh ku nah patehwevye, nah ka wew wadit. Ayge amun ini nikwe nah hiyakni ku nah tiviknene adahan miyaka adahan biyukwiki giw Uhokri.

Moís gikumadukan akki ku uvathawniwiy keh wixwiy biyuk giw Uhokri

¹⁰ Ig amekene Moís gikumadukan in ikaka wot adahan ku pariye hiyeg ihevye inakni giwn igi ik adahan ig aymuhwa gimun Uhokri adahan avanenekwa. Hiyaksa nahme ka ihpinwa. Nikwe ini gikumadukan keh nah uti ini miyaka ku pariye keh nah biyuk giw Uhokri adahan avanenekwa.

¹¹ Mmanawa ini patahwaki abet nuhiyekemni in kiniswen. Nah ikewkerevye kibeyne, heneme ini nuvathawni keh nah tarakse gikumadukan. Ayge nikwe in keh nah uti miyaka dehetniki.

¹² In kahayak huwewe wot nikwe ku ig amekene Moís gikumadukan in kibeynewa. In yuma patahwaki nibet. In barewvit hawata in wadit.

¹³ Nawenetke pahavwi yaytak hiyapni hene, ig awna: “Heneme ini gikumadukan ku pariye kibeynewa innewa keh nah uti miyaka akiw.” Kawa, nukebyi, uvathawni arannivwi keh wis uti miyaka. In nuvathawni keh nah taraksa akak inakni giwn ku pariye kibeynewatnen adahan in keh nah uti miyaka. Ayge nikwe metakwa nah hiyeke ini nuvathawni. Nah hiyeke ku inyewa nuhiyekemni patehwevye. Mmanawa amekene Moís gikumadukan keh ini nuvathawni amebyemni pi kahayakte akiw ku in mbeyevye mpiynevevye.

Nah kehkere kabayka hiyaksa nah keh mbayka

¹⁴ Wixwiy hiyakni ku ig amekene Moís gikumadukan ku innewa Uhokri gihiyekemni. Nahme nuhiyekemni amedgene inin. Ka ik adahan nah wew avigku gihiyekemni awaku nah ka nuvathawnisima. Ka hiya nahma isahptaw ariw nuvathawni nuwnteknewa.

¹⁵ Nah ka pukuha ku samah nuhiyekemni. Nah kehkere ku pariye waditnen, heneme nah ka hiya nikehka. Hiyaksa nah keh ku pariye nah ka kehkere.

¹⁶ Ku samah nah ka kehkere ini mbayka ku pariye nah keh, amun ini nikwe nuhiyekemni aka ku nah tarakse amekene Moís gikumadukan. Ayge nikwe nah hiyap ini gikumadukan kabay nutuh.

¹⁷ Nikwe in kahayak huwewe ku nah ka nuwnteknewatma keh ini mbayka ku pariye nah kane kehkere. In nuvathawni arannivwi ku pariye ay abet nuhiyekemni.

¹⁸ Nah hiyakni ku nuhiyekemni amadgaya inin ku in kuwis patehwevye, yuma kabayka ay nibet. Mmanawa nah kehkere kabayka, heneme nah ka hiya nikehka.

¹⁹ Nah ka keh ini kabayka ku pariye nah kehkere. Hiyaksa nah keh ini mbayka ku pariye nah ka kehkere.

²⁰ In areketni huwewe nutuh ku ka nuwnteknewatma nah keh ini mbayka. In nuvathawni arannivwi ku pariye ay abet nuhiyekemni.

²¹ Nuvathawni kumadukevun. Nah kehkerevye kabayka, heneme inevye mbayka nah pi kehte.

²² Nah batek gikak Uhokri gikumadukan akak nutivuh.

²³ Heneme nah hiyap nawenyewa kumadukaki ay abet nuhiyekemni amadgaya inin. Ini kumadukaki suguhak akak Uhokri gikumadukan ku pariye nutivuh amava. In keh nah isaksawte arit mbeyevye hiyakemniki.

²⁴ Ini keh nah wakaymni mpiynevevye. Kit nah uti bisiket adahan nah isahptaw ariw ini mbeyevye hiyakemniki ku pariye utipkiswiye miyaka nutuh ku pariye keh nah biyuk giw Uhokri adahan avanenekwa?

²⁵ Heneme nah kabayha Uhokri. Ignewa Uhokri keh nah isahptaw niw givitimpi Ukivarawiy Jesus Cristo. Wake ka ignema keh nah isahptaw ariw ini mbeyevye hiyakemniki, nikwekam nah misakwakam akak nuhiyekemni matekbetnenekwa. Akak nutivuh nah amava Uhokri gihiyekemni. Akakme nuhiyekemni amadgaya inin nah amava mbeyevye hiyakemniki.