Romanus 6 - Uhokri Gahegbetawni Nukune akak Sawmus

Uhiyakemniwiy amadgaya inin kuwis miyap wowiy

¹ Nawenetke pahavwi yaytak hiyapni hene, ig awna: “Nikwe ka sam wixwiy tiviknene wixwiy taraksenene Uhokri gikumadukan kahadbe wixwiy pi hiyakte ku samah ig Uhokri ka gamnihrasima ukakwiy.”

² Kawa. Nukebyi, ka ba awna inakni hene. Wixwiy uhiyekemniwiy taraksevye in ke wotbe in kuwis miyapbe wowiy. Amawka wixwiy ka muwaka kannikasin akiw adahan wixwiy keh abetki akiw.

³ Mmanawa wixwiy hiyakni ku aysaw wixwiy kewvi ahakwat un giwavrik Cristo Jesus amun ini wixwiy ameve ini ku wixwiy pahavwiwa gikak Cristo Jesus. Ku samah ig umahkiswe amun ini nikwe in ke wotbe uhiyekemniwiy amadgaya inin in hawata miyapbe payak gikakbe.

⁴ Ku samah wixwiy huwikiswika ahakwat un, amun ini wixwiy amevene ini ku uhiyekemniwiy amadgaya inin ke wotbe in hawata avuhpikabe payak gikak Cristo, in ke miyavibe ayge gikak. Igme Cristo kannikasaka ariw gimiremni gavit Wigwiy ku pariye kane gikiytanisima. Wixwiy hawata ku samah wixwiy iyak ahakwatak un, amun ini wixwiy amevene ini ku wixwiy kadahan nukune uhiyekemniwiy kuri.

⁵ Mmanawa ku samah uhiyekemniwiy amadgaya inin in ke wotbe in miyapbe wowiy payak gikak Cristo, inme uhiyekemniwiy nukune in ke wotbe in hawata kannikawbe payak gikak.

⁶ Minikwak wixwiy ubetkiwiy keh ku pariye kane kabay. Kurime ini uhiyekemniwiy minikweknene in ke wotbe in kuwis deddehpikabe payak gikak Cristo amin giyaknibe minikwak. Avim ini uhiyekemniwiy mbeyevye in ke wotbe in ay givitbe Cristo. Amun ini ku samah ig miyap in hawata in ke wotbe in miyapbe. Ig Kiyavwiye Jesus umahkiswe adahanikwa ini uhiyekemniwiy mbeyevyenen yuma akiw. Kahadbe uvitwiy ka kumadukasaw nit akiw.

⁷ Mmanawa ku aysaw pahavwi miyap, ig ka patahwa akiw.

⁸ In ke wotbe uhiyekemniwiy amadgaya inin kuwis miyapbe payak gikak Cristo. Ayge nikwe wixwiy kamaxwene avit ini ku uhiyekemniwiy kannikaw nukunewa akiw hawata ke igbe.

⁹ Ku samah ig Cristo kannikew ariw gimiremni in kahayak huwewe wot ku ig ka miyati akiw. Miyaka ka hiya gisamanak akiw.

¹⁰ Ku samah ig miyap ig ka daxtasaw akak patahwaki akiw. Ig pisenwe akak patahwaki pahayewvi. Kuri ku samah ig kannikew ig gaymahwan pahamtak gikak Uhokri.

Amawka wixwiy ka keh mbayka akiw

¹¹ Wixwiy hawata. Wixwiy pahavwiwa gikak Cristo Jesus. Nikwe ikawnay ke wotbe yis kuwis miyavibe ariw patahwaki. Ka yi muwaka keh mbayka akiw. Heneme ikawnay ke wotbe yis iveg gidahanenwa Uhokri.

¹² Ka yi muwaka isaksa mbayka kumaduka yivit. Uvit he mpiyeviyenen kibehtenwa. Ka yi muwaka kumadukasaw arit yivit abetki ku pariye kane kabay.

¹³ Kawnata yi muwaka kawih yivit ine yibi ine yiwak adahan kehne mbayka. Heneme kumadukasawnay ta git Uhokri ke hiyegbe kannikasaka ariw miyakabe. Kawihnay yivit pahavwite adahan kehne kabaykanen.

¹⁴ Hiyeg taraksavye kewa ibuktibe. Pahavwi ibukti ka hiya igma pes ariw gannivwi gidahan gikivara. Taraksavye kawnata hiya ignesma miniw ariw gikehnikis mbayka. Wixwiyme nawenyewa ukivarawiy kuri. Ik adahan wixwiy miniw ariw madikte ukehniwiy mbayka. Mmanawa wixwiy ka kumadukasaw arit amekene Moís gikumadakan akiw, heneme wixwiy kumadukasaw arit Uhokri gabay.

Amawka wixwiy ikaw kabayka abuk

¹⁵ Nawenetke pahavwi yaytak hiyapni hene, ig awna: “Wixwiy iveg avitit Uhokri gabay adahan ig keh wixwiy isahptaw. Nikwe ka sam wixwiy taraksa Uhokri gikumadukan. Mmanawa wixwiy ka iveg avitit inin ku samah wixwiy ihpene giwn gikumadukan adahan in keh wixwiy isahptaw.” Nukebyi, ka muwaka awna inakni hene.

¹⁶ Mmah pis ka hiyak? Ku pariye pis kumadukasaw git ig ner humaw pikivara, pisme humaw gibuk. Ku pis kumadukasaw arit pihiyekemni mbeyevye, nikwe pis ka hiya pisma miniw ariw pikehni mbayka. Ku pis ka miniw ariw pikehni mbayka, pis uti miyaka nikwe. Heneme ku pis kumadukasaw git Uhokri giwn, nikwe pis humaw Uhokri gibuk pis uti kabayka nikwe, pis humaw kibeyne nikwe.

¹⁷ Kibeyne gidahan Uhokri. Minikwak yis ka hiya yisma miniw ariw yikehni mbayka. Heneme, kibeyne, kuri yis ihpene avititakwa yiyakni ini hiyakemniki ku pariye ekkepka wotwiy adahan wixwiy wewne nikak.

¹⁸ Ayge nikwe yis isahptew ariw ini yikehni mbayka. Yis humaw Uhokri gibuk adahan yis kehne kabaykanen.

¹⁹ Ka nuhawkanavrikma nah kanumyi ibukti. Heneme nah awna inakni hene kahadbe yis pukuha ka mahikonema. Minikwak in ke wotbe yis ikaw patahwaki abukbe. Avim ini yis kawih yivit pahavwite adahan kehne mbayka. Yis tiviknene kehnene mbayka avanenekwa. Kurime amawka yis ikaw kabayka abuk. Amawka yis kawih yivit pahavwite adahan kehne kabayka, yis tiviknene kehnene kabayka avanenekwa.

²⁰ Minikwak yis ka hiya akehka kabayka awaku yis kumadukaka gavit mbayka.

²¹ Ku samah yis kehne ini mbayka, pariyeva yiwitwan kabayka abetitak ini mbayka? Yuma. He marakinen yis uti. Mmanawa ku avim inin yis merenpi akak inere. Ka ininewatma maraki yis uti. Wake yis ka miniwbe niw, nikwekam yis hawata uti miyaka dehetniki.

²² Kurime yis isahptew ariw ini mbayka akumadukan adahan yis kumadukaka gavit Uhokri. Yis ik adahan yis miniw ariw yikehni mbayka adahan yis kehne kabayka. Inineki keh yis uti kabayka dehetnikinek.

²³ Mmanawa patahwavye gitiwnikis inebaki miyaka adahan biyukwiki giw Uhokri. Gikanme Uhokri wotwiy nawenyewa. Ig keh wixwiy aymuhwa gimun adahan avanenekwa awaku ku samah wixwiy pahavwiwa gikak Ukivarawiy Jesus Cristo.