Romanus 4 - Uhokri Gahegbetawni Nukune akak Sawmus

Abraawh humaw kibeyne giwtrik Uhokri awaku ig kamaxwa givitit

¹ Nah kehte abektey gikak amekene Abraawh ig uhawkriwiy wixwiy hiyeg judeyenevwi. Nah akkite yit ku samah awitwak git ku samah ig kibeyne giwtrik Uhokri.

² Wake he gimaviswanen akak gikehbetanen keh ig humaw kibeynebe giwtrik Uhokri, nikwe ikkam adahan ig keh giwanti nikakkam. Heneme kawa. Ig ka hiya igma keh giwanti giwtrik Uhokri henentima.

³ Mmanawa ig Uhokri gannasan awna: “Ig Abraawh kamaxwa givitit Uhokri. Inneki keh ig Uhokri hiyavgi kewa kibeynebe giwtrik.” Henewatbaki ig Uhokri gannasan awna.

⁴ Nah akkite yit nawenyewa abektey. Ku pahavwi awayg kannivwiye ig ikaka karukri git. Nor karukri ka ikaka git he gamnihkanenwatma. Kawa. In gannivwitiwni.

⁵ Inme ku samah ig Uhokri hiyavwiy kewa kibeynevwibe giwtrik innebaki gikan wotwiy he gikannenwa. In ka wannivwitiwnima. In awaku ku samah wixwiy kamaxwa givitit. Ig ka katiwnih ukehniwiy kabayka, mmanawa wixwiy yuma ukehniwiy kabayka giwtrik Uhokri. Wixwiy he kamaxwanen givitit Uhokri ku pariye keh hiyeg taraksavye humaw kibeynevwi hiyeg.

⁶ Amekene Davi ig hawata kinetihwa amin inakni. Ig kinetihwa gimin pahavwi ku pariye batek ka aynsima awaku Uhokri hiyap ig kewa kibeynebe giwtrik he gamnihkanen.

⁷ Ig amekene Davi awna: “Ka aynsima batekka ay gimunkis hiyeg taraksavye ku aysaw Kiyavwiye Uhokri bayahminigkis ariw gitaraksankis, ig ka hiyap givathawnikis akiw.

⁸ Ka aynsima batekka ay gimun pahavwi ku pariye Kiyavwiye Uhokri ka hiyavgi kema patehwevyema giwtrik.” Henewatbaki ig amekene Davi awna.

⁹ Nawenetke pahavwi yaytak hiyapni hene, ig awna: “Ini batekka ku pariye amekene Davi kinetihwa nimin in he gidahankisnen hiyeg hiwhkavu givitkis.” Nukebyi, ka ba awna inakni hene. Ini batekka hawata gidahankis hiyeg kane hiwhkavuma givitkis. Wixwiy madikte hiyakni kuwis ku amekene Abraawh kamaxwa givitit Uhokri. Ayge nikwe ig Uhokri hiyavgi kewa kibeynebe giwtrik.

¹⁰ Mmah ig hiyap amekene Abraawh kewa kibeynebe giwtrik ku samah ayipa ig kuwis hiwhka givit? Kawa. Ig hiyavgi kewa kibeynebe giwtrik avim ini avit givit hiwhka.

¹¹ Givit hiwhka adahan areketni ku ig kuwis kibeyne giwtrik Uhokri awaku gikamaxwan. Ig ayipa humaw kibeyne giwtrik Uhokri avit givit hiwhka. Ayge nikwe ig amekene Abraawh ig humaw ke wotbe ig gihawkrikisbe gidahankis madikte hiyeg kane hiwhkavuma givitkis ku pariye kamaxwevye givitit Uhokri. Igkis hawata kibeynevwi giwtrik Uhokri.

¹² Ig amekene Abraawh uhawkriwiywata wixwiy ku pariye hiwhkavu uvitwiy. Ig uhawkriwiy ka awakuma ku samah wixwiy hiwhkavuma uvitwiy, heneme awaku ukamaxwanwiy hehpekuye ke gidahanbe gikamaxwan avim ini avit givit hiwhka.

Ukamaxwanwiy keh wixwiy darih ku pariye Uhokri gikaksan wotwiy

¹³ Ig Uhokri awna ta git amekene Abraawh, giwn: “Nah keh pis gikakkis pihiwhivwi yis kumadukanek madikte hiyeg amadga hawkri.” Ig ka awna: “Nah keh yis kumadukanek madikte hiyeg awaku ku samah yis ihpene giwn Moís gikumadukan.” Kawa. Ig ka awna inakni hene. Ig awna: “Nah keh yis kumadukanek hiyeg awaku ku samah yis kamaxwene ta nuvitit, nikwe nah hiyap yis kewa kibeynevwibe hiyeg.”

¹⁴ Wake ini ku samah wixwiy ihpene giwn amekene Moís gikumadukan, wake innewatbe keh wixwiy darih ku pariye Uhokri gikaksan wotwiy, nikwekam inin ukamaxwanwiy givitit waditnevyenenkam. Wake henebe, wixwiy ka darihkam ariknawnema ku pariye Uhokri gikaksan wotwiy, mmanawa wixwiy ka iha gikumadukan madiktema.

¹⁵ Mmanawa amekene Moís gikumadukan awna ku pahavwi taraksa ini gikumadukan ka ik adahan ig darihwak gikak Uhokri. Nikwe wixwiy madikte biyuk giw Uhokri, mmanawa wixwiy madikte taraksenekuye gikumadukan. Wake ig ka ikepma gikumadukan ta wotwiybe, ininewa mpitawkam adahan wixwiy taraksinkam, mmanawa in yumakam aykam adahan wixwiy taraksin.

¹⁶ Heneme wis ka darih gikaksan wot awakuma ukehbetanenwatma ku samah wis ihpene giwn. Kibeyne, ig ike wotwiy kabayka he gikannenwa akak gabay, ta wotwiy wixwiy ku pariye kamaxwenevwi givitit. Ayge nikwe madikte wixwiy amekene Abraawh gihiwhivwi darihpin. Ka ininewatma neras ku pariye ihevye giwn amekene Moís gikumadukan, heneme hawata neras ku pariye kamaxwevye givitit Uhokri ke amekene Abraawhbe.

¹⁷ Henewa in ku samah Uhokri gannasan awna. In awna: “Nah kuwis kaniyvep adahan pis humaw gihawkrikis ka aynsima hiyegviyenevwi.” Henewatbaki ig Uhokri awna git amekene Abraawh avim ini ku samah ig kote kakamkaynte. Mmanawa ku pariye Uhokri gikaksan ig hiyap giwtrik ke wotbe in kuwis danuhbe. Ig ner Uhokri ku pariye amekene Abraawh kamaxwa givitit, ig ner Uhokri ku pariye keh miyaravye iveg akiw, ku pariye kinetihwa amin arikna ku pariye kotene danuhte ke wotbe in ayipa danuhbe.

¹⁸ Ig amekene Abraawh kamaxwe ta avitit inakni Uhokri giwn ku ig kahiwhi ka aynsimanek. Ku aysaw ig ka iknema adahan ig kakamkayh, ig gidukwenewa iveg givitit Uhokri ku ig humawnek gihawkrikis ka aynsima hiyegviyenevwi.

¹⁹ Ig kiyaparivye kuwis adahan ig kakamkayh. Kaba danuh madikawkubu madikwa (100) kamukri gaw. Gihayo amakano Sara hawata. Eg kiyaparuvyo kuwis adahan eg kakamkayh. Kaba danuh ahawkanavrik adahan egkis miyarap. Heneme in ka sam git. Ig ka tuguhkis gikamaxwan givititak Uhokri.

²⁰ Ig ka isahkis ini gikamaxwan. Ig ka tukuh Uhokri gikaksan git aynesnima. Ini gikamaxwan ike gawaygi git, keh ig kabayha Uhokri adahan ini gikaksan git.

²¹ Mmanawa ig hiyakni avititak giyakni ku ig Uhokri ka gidatnisima adahan ig keh ku samah gikaksan git.

²² Inneki keh ig Uhokri hiyap ig amekene Abraawh kewa kibeynebe giwtrik.

²³ Inakni iwit “Uhokri hiyap ig kewa kibeynebe giwtrik” inakni ka kawih gidahanenwatma amekene Abraawh.

²⁴ In hawata kawih udahanwiy, wixwiy ku pariye Uhokri hawata hiyap kewa kibeynevwibe giwtrik, awaku ukamaxwanwiy givitit. Ku samah ig amekene Abraawh kamaxwa givitit Uhokri, ku pariye keh gikamkayh Izaki wayvuka kewa abetitakbe miyaka, wixwiy hawata wixwiy kamaxwa givitit Uhokri ku pariye keh Ukivarawiy Jesus kannikaw ariw miyaka.

²⁵ Pitatye ig Uhokri ike Kiyavwiye Jesus adahan ig miya udukwenavrikwiy adahan katiwnihpiye utaraksanwiy. Ayteke ig hawata kannikasevgi ariw miyaka akiw kahadbe igme ikeviye wotwiy uhiyekemniwiy nukunewa akiw, kibeyne hiyakemniki.