Romanus 3 - Uhokri Gahegbetawni Nukune akak Sawmus

Uhokri ka kinis

¹ Nawenetke pahavwi yaytak hiyapni hene, ig awna: “Ku hene nikwe, ku ig Uhokri amava hiyeg kane judeyenevwima payak gikakkis hiyeg judeyenevwi, nikwe in ku samah nah hiyeg judeyene in waditnevyenen. Inin ku samah nah hiwhka nuvituh in waditnevyenen.” Nukebyi, ka muwaka awna hene.

² In kabayntiwa pidahan. Wixwiy hiyeg judeyenevwi wixwiy uti ka aynsima ubunugawiy gikak Uhokri. Ig ike gikumadukan ta giwakuritkis uhawkrivwiy pitatyevwi minikwak.

³ Igkisme hiyapni hene, igkis awna git Uhokri: “Usuh ihpa inakni piwn madikte.” Heneme kabahte madikte ka keh ku samah giwnkis git. Nawenetke pahavwi yaytak hiyapni hene, ig awna: “Ku hene nikwe, ig Uhokri kawnata keh ku samah giwn ta gitkis.”

⁴ Nukebyi, ig keh madikte. Ig awna avanenekwa ku pariye inyewatnene iwit. Hiyawa madikte hiyeg amadgayavu inin kinis, igme ka kinis. Inakni ku samah Uhokri gannasan kinetihwa gimin Uhokri. In awna: “Kiyavwiye Uhokri, nutaraksan keh nah hiyekep ku pisnewa waditye. Nah hiyekep awaku ku samah nah ka wadit. Inneki keh nah hiyakpi ku pisnewa waditye. Avanenekwa piwn pes waditnenekwa. Ku aysaw hiyeg awna: ‘Awase akak’ ignes tarakse. Pis utipkanek ku pis awna wadit.” Henewatbaki in Uhokri gannasan awna.

In kabay adahan Uhokri tukuhave patahwavye giw

⁵ Nawenetke pahavwi yaytak hiyapni hene, ig awna: “Ku hene, nikwe utaraksan kabay awaku in keh wis hiyaka Uhokri ku ignewa waditye. Nikwe ig Uhokri ka hiya igma katiwnisa utaraksan wot. Ku ig ivukwewiy hanpa arimkanit biyukwiki avatra utaraksan, nikwe ig ka keh wadit.” Nukebyi, ka ba awna inakni hene. Inakni hiyakemniki in hiyeg gihiyekemni amadgaya inin.

⁶ In avawyewa giw Uhokri gihiyekemni. Wake ig ka katiwnisabe utaraksanwiy wotwiybe, nikwekam amun ini ig ka kehkam wadit. Nikwekam ig ka hiya igma katiwnisa gitaraksankis gitkis madikte taraksavye aysawnemenek amaksemni hawkrinek. Heneme ig wadit. In kabay adahan ig tukuhave patahwavye giw.

⁷ Nah kehte abektey yidahan. In huwewe wot ku wis ka hiya wisma awna: “Ka sam nah wasaympiye.” Ine wis kawnata hiya wisma awna: “In keh hiyeg hiyaka Uhokri ku ignewa waditye, mmanawa ignewa ka wasaymaw.” Wis ka hiya wisma awna: “Nuwasemni keh hiyeg kiyatha Uhokri. Nikwe ig ikanuh ku nah kibeyne. Ig ka keh nah katiwnivwe avatra ini nuwasemni.”

⁸ Nukebyi, wis ka hiya wisma awna inakni hene. Wasaymka in mbayka in. Ka ik adahan wis awna: “Uyay keh mbayka kahadbe ariwntak mbayka kabayka humaw.” Kawnata ik adahan wis awna: “Ka sam wixwiy keh mbayka awaku ka udahanwiyma wixwiy keh. In gidahan Uhokri.” Nukebyi, ka ik adahan wis awna hene. Ku pariye awnenevwi inakni ignes ivukavepkanek hanpa arimkanit biyukwiki. Henewa neras kis adahan igkis biyuk giw Uhokri. Gaytakkis hiyeg awna numinuh ku nahwa ekkene inakni hene bawa kawa.

Yuma hiyeg kibeyne ay amadga inin

⁹ Nawenetke pahavwi yaytak hiyapni hene, ig awna: “Ku samah ig Uhokri ike gikumadukan ta uwakuritwiy wixwiy hiyeg judeyenevwi, nikwe wixwiy kabayte giwkis nawenyevwi hiyeg.” Nukebyi, ka ba awna inakni hene. Nah kuwis akki yit ku hiyeg judeyenevwi payak gikakkis hiyeg ku pariye kane judeyenevwima ig Uhokri hiyavgikis hehpekuye giwtrik. Wixwiy madikte taraksavye giwtrik.

¹⁰ Henewa in ku samah Uhokri gannasan minikwekne awna. In awna: “Yuma pahavwinema hiyeg kibeyne ay amadga inin.

¹¹ Yuma pahavwinema hiyeg pukuhpene Uhokri gihiyekemni. Yuma pahavwinema mpiksewne aharit gihiyekemni.

¹² Madikte hiyeg kuwis tukuhwe giw Uhokri. Igkis madikte kisevyibdi giw. Yuma pahavwinema kehne kabayka. Yumahwatbaki pahavwinema.

¹³ Madikte hiyeg giwnkis ke mikahrikibe git Uhokri. Gibiykis kewa imewtibe woknenebe. Igkis wasaymaw mbeyevye. Gibiykis ke pahavwi kaybunebe pahaywotneye gibiybe adahan miyaka.

¹⁴ Mbaytunka akak kanaktinka pes gibiyaptakis.

¹⁵ Igkis ahegbet adahan umehne hiyeg.

¹⁶ Muwapuw igkis kehne hiyeg hiyap mbeyne, igkis patehene hiyeg giwkis.

¹⁷ Igkis ka pasamrak gikakkis giyakivwi hiyeg.

¹⁸ Igkis ka aminama giw Uhokri. Igkis ka avis gibohri.” Henewatbaki ig Uhokri gannasan awna.

¹⁹ Madikte hiyeg judeyenevwi hiyak inakni iwit. In amadgatak gidahankiswa gikumadukankis. Nikwe ku samah ig Uhokri kinetihwa amin hiyeg gihiyekemnikis mbeyevye in kawih adahan ekkene ku samah gihiyekemnikis igkis hiyeg judeyenevwi. In hawata kawih adahan ekkene ku samah gihiyekemnikis madikte hiyeg amadgayavu inin. Yuma pahavwinema hiyeg wihwene niw. Wixwiy madikte taraksavyekuye. Wixwiy ka kiseweknema adahan wixwiy danuh git Uhokri.

²⁰ Mmanawa yuma hiyeg kibeyne giwtrik Uhokri awakuma ku samah ig iha giwn amekene Moís gikumadukan. In amekene Moís gikumadukan in he areketninen ku wixwiy taraksavye. In humaw areketni wot awaku ku samah wis ka keh avigkutavrikma ku samah gimawkan.

Jesus keh wixwiy humaw kewa kibeynevwibe giwtrik Uhokri

²¹ Heneme, kibeyne, kuri ig Uhokri akka wotwiy hiyakemniki ku pariye inyewa keh wis kibeyne giwtrik. Ig keh wis kibeyne ka akakma ku samah wis mpiksaw akak ukehbetannenwa adahan wis ihpene giwn amekene Moís gikumadukan, heneme akak nawenyewa hiyakemniki ku pariye Uhokri gannasan kuwis kinetihwa nimin.

²² Ig keh wis kibeyne giwtrik awaku ku samah wis kamaxwa givitit Jesus Cristo. Madikte hiyeg ku pariye kamaxwa givitit Cristo ig Uhokri hiyavgikis igkis kewa kibeynevwibe giwtrik hawata ke Cristobe. Inakni hiyakemniki kawih gidahankis hiyeg ku pariye kane judeyenevwima payeke gikakkis hiyeg judeyenevwi, mmanawa Uhokri hiyavgikis hehpekuye giwtrik.

²³ Mmanawa madikte wixwiy taraksavyekuye. Wixwiy ka huwit avigkutavrikutnema ku samah Uhokri gikiytani.

²⁴ Heneme kibeyne, ig Uhokri hiyap wixwiy kewa kibeynevwibe giwtrik awaku ku samah Cristo Jesus katiwnihe utaraksanwiy udukwenavrikwiy. Wixwiyme ka katiwnih ariknawnema. He wamnihkawiynen ig amnihpewiy hene.

²⁵ Ig Uhokri awahkise Cristo Jesus adahan ignewa umahkiswe udukwenavrikwiy giwtrikkis madikte hiyeg. Ku samah ig sukase gimig, nikwe ik adahan ig Uhokri bayahminawiy ariw utaraksanwiy wixwiy ku pariye kamaxwenevwi avitit gimiremni adahan in katiwnih utaraksanwiy. Amun ini nikwe ig Jesus akka ku samah igme Uhokri waditye. Kiyavwiye Uhokri ka hiya igma hiyavwiy ke wotbe wixwiy wadityevwibe henenwatma. Heneme ig ka giyaknisima gikakkis hiyeg minikweknenevwi. Ig ka katiwnisa gitaraksankis gitkis, mmanawa ig wahepne Kiyavwiye Jesus katiwnih gidahankis.

²⁶ Kibeyne, kurime ig Cristo aytwe ekke wotwiy ku samah ig Uhokri igyewa kibeyne hiyeg. Mmanawa ig akka ku samah igme Uhokri waditye ig hawata keh wixwiy humaw kewa wadityevwibe giwtrik, wixwiy ku pariye kamaxwenevwi givitit Jesus.

²⁷ Ka udahanwiyma ukehbetanwiyma kabayka keh Uhokri hiyavwiy kewa kibeynevwibe giwtrik. Innewa ukamaxwanwiy givitit gikamkayh keh wixwiy kewa kibeynevwibe giwtrik. Nikwe ka hiya wixwiyma keh uwantiwiy ukakwiyma aynesnima.

²⁸ Henewatbaki in. Wixwiy hiyakni ku Uhokri hiyavwiy kewa kibeynevwibe giwtrik ka awakuma ukehbetanwiyma ku samah wixwiy ihpene giwn amekene Moís gikumadukan, heneme awaku ku samah wixwiy kamaxwene givitit Kiyavwiye Jesus.

²⁹ Ba nawenetke pahavwi yaytak iki igkisnewa hiyeg judeyenevwi kawohkigaye. Kawa. Ig Uhokri ig madikte hiyeg giwohkigakis.

³⁰ Ignewa Uhokri pahavwiwa ay. Ig keh hiyeg judeyenevwi humaw kewa kibeynevwibe giwtrik ku aysaw igkis kamaxwa givitit. Ig hawata keh madikte nawenyevwi hiyeg humaw kewa kibeynevwibe giwtrik ku aysaw igkis hawata kamaxwa givitit.

Ukamaxwan keh wis pi muwakapte adahan iha Uhokri gikumadukan

³¹ Nawenetke pahavwi yaytak hiyapni hene, ig awna: “Ku Uhokri hiyavwiy kewa kibeynevwibe giwtrik kuwis awaku ku samah ukamaxwanwiy kuri, mmeneki wixwiy muwaka iha giwn Uhokri gikumadukan akiw?” Nukebyi, ka muwaka awna hene. Ku samah wixwiy kamaxwa givitit Kiyavwiye Jesus in keh wixwiy pi muwakapte adahan iha giwn gikumadukan.