Romanus 2 - Uhokri Gahegbetawni Nukune akak Sawmus

Hiyeg kataraksanye katiwnivwenek

¹ Nawenetke pahavwi yaytak hiyapni hene, ig awna: “Neras hiyeg ka kibeynevwima. Ignes katiwnivwenek avatra gitaraksankis. Nahme ka henema. Nah kibeyne hiyeg.” Nukebyi, ka ba awna inakni. Avuriwnaba ku pis hawata kataraksanata ke igkisbe. Ku aysaw pis iki ku igkis ka kibeynevwima, piminwa pis awna ku pis kawnata kibeynema.

² Wixwiy hiyakni ku Uhokri ka taraksa ku aysaw ig hiyak gikakkis hiyeg. Madikte hiyeg ku pariye kehnevwi mbayka ignes katiwnivwenek avatra gitaraksankis. Igkis utinek ku pariye kabay gidahankis. Igkis biyuknek giw Uhokri adahan avanenekwa.

³ Pis awna: “Neras kis adahan igkis katiwnivwe avatra gitaraksankis.” Bawa pis hawata kis adahan pis katiwnivwe hawata ke igkisbe. Pis kataraksanata hawata ke igkisbe. Mmah pivewkan ig Uhokri ka katiwnisa pit avatra pitaraksan? Ihi. Ig hiyak pikaknek hawata ku samah ig hiyak gikakkisnek neras kataraksanye.

⁴ Ba nawenetke pahavwi yaytak hiyapni hene, ig awna: “Awase akak. Nah ka taraksa mpiynevevyema. Ig Uhokri ka gabayisima ukak. Ig bayahminaw ariw utaraksan. Ig ka katiwnisa nutaraksan nutuh awaku ig ka giyaknisima. Ka sam nah ka miniw ariw nutaraksan.” Nukebyi, ka ba awna inakni hene. Ka ba pis hiyap ku ig ka gabayisima pikak adahan pis mara akak ini pitaraksan pis miniw ariw ini pihiyekemni?

⁵ Pisme ka wageskere pihiyekemni. Piyakni ka adanisima. Ayge nikwe pis kiyesrinene pitaraksan he ku aysaw ahawkanavrik danuhnek adahan Uhokri kahayaksa pitnek ku samah ig ka batek akak ini pihiyekemni kane kabay. Avim ini pis utinek ku pariye kabay pidahan. Mmanawa ig Uhokri ka taraksa ku aysaw ig hiyak ukak.

Wixwiy utiwniwiy pakekunawa akak ku samah ukehniwiy

⁶ Mmanawa aysawnemenek ig Uhokri iki utiwninek pakekunawa akak ku samah ukehni ay amadga inin. Ku wis keh mbayka, mbaykanewa ig iki wot. Ku wis keh kabayka, kabaykanewa wis uti.

⁷ Ku pariye hiyeg tiviknene kehnene kabayka, igkis mpiksewnenes aharit Uhokri gibereswan, igkis mpiksewnenes aharit Uhokri gikiytani, igkis mpiksewnenes aharit gaymahwankis gimun Uhokri, akebi neras hiyeg utinek kabayka dehetniki.

⁸ Heneme ku pariye hiyeg kehkerevye gidahankiswa gibetkikis, igkis ka ihpekere Uhokri giwn ku pariye inyewatnene, gikehnikis mbaykanenwa, akebi neras hiyeg hiyapnek ku samah Uhokri ka batek akak hiyakemniki ku pariye kane kabay, igkis ivukepkanek hanpa arimkanit biyukwiki.

⁹ Avim ini madikte hiyeg ku pariye kehnevwi mbayka igkis hiyap mbeynenek. Igkis kayahwa ka aynsimanek. Pitatye igkiskite hiyeg judeyenevwi uti ini mbayka. Butte hawata hiyeg ku pariye kane judeyenevwima igkis uti inwata mbayka hawata ke hiyeg judeyenevwibe.

¹⁰ Heneme ig Uhokri ikinek gibereswan akak gikiytani givititkis madikte hiyeg ku pariye kehnevwi kabayka. Ig kariswahsa giyaknikisnek. Pitatye hiyeg judeyenevwikit uti ini kabayka. Butte hawata hiyeg ku pariye kane judeyenevwima igkis uti inwata kabayka hawata ke hiyeg judeyenevwibe.

Uhokri hiyap madikte hiyegiviyenevwi hehpekuye giwtrik

¹¹ Mmanawa ig Uhokri hiyap madikte hiyegiviyenevwi hehpekuye giwtrik. Ig ka mpiyasa pahavwinema gikehni henenwatma. Igkis madikte katiwnihnekuye gitaraksankis gitnek.

¹² Ku pariye hiyeg kane hiyak amekene Moís gikumadukan, ku ignes keh patahwaki, igkis hawata katiwnivwe avatra ini gikehnikisnek. Igkis biyuk giw Uhokrinek awaku ig Uhokri hiyap igkis ka kabay giwtrik. Ig hiyap igkis ka kabay giwtrik ka avatrama ku samah igkis taraksa amekene Moís gikumadukan, heneme avatra ku samah igkis hiyak abet gihiyekemnikis ku pariye kane wadit adahan igkis keh, igkisnewa mpiksaw kehni. Ignesme ku pariye hiyeknevwi amekene Moís gikumadukan, ku igkis keh patahwaki, nikwe ig Uhokri hiyap igkis ka kabay giwtrik avatra ku samah igkis tarakse amekene Moís gikumadukan.

¹³ Mmanawa ig Uhokri iki ku wis kibeyne ka awakuma ku samah wis kadahan gikumadukan, heneme awaku ku samah wis ihpene ariwn gikumadukan.

¹⁴ Neras hiyeg ku pariye kane judeyenevwima igkis ka hiyak amekene Moís gikumadukan. Heneme ku igkis wew akak ini hiyakemniki ku pariye gikumadukan aya wot, ku igkis wew nikak giwntekneswa gimawkankis, amun ini nikwe ini gihiyekemnikis humaw ke amekene Moís gikumadukanbe adahan givitkis.

¹⁵ Ini giwewnikis waditye akka ku igkis kuwis kadahan Uhokri gihiyekemni ay abet gihiyekemnikis. Igkis hiyakni avit giyaknikis ku aysaw igkis keh mbayka. Igkis hiyakni ku aysaw igkis keh kabayka. Gitipkiswa akka gitkis.

¹⁶ Aysawnemenek ig Uhokri gihawkanavrik danuhnek adahan ig kawatni Jesus Cristo adahan igme ivegbetene hiyeg gihiyekemnikis ku pariye ayemewnene ay avit giyaknikis, ig iwasa ba in waditnema. Henewatbaki ku samah nunetni yit.

Ka yi muwaka ikaw kabaytema giw pahavwi

¹⁷ Yaytak yis hiyeg ayge, yis judeyenevwi ke nahbe. Nawenetke yis ikawnamah kibeyne hiyeg awaku ku samah uhawkrivwiy kaniyka gavit Uhokri adahan igkis humaw gihiyegavu. Bawa wixwiy kawa avigkutma. Wixwiy judeyenevwi kamaxwa avitit amekene Moís gikumadukan.

¹⁸ Wixwiy hiyak ku pariye Uhokri gibetki. Wixwiy hiyak ku pariye kabayka, ku pariye mbayka, awaku ku samah wixwiy kannuhwa amadgatak amekene Moís gikumadukan.

¹⁹ Nawenetke yis ikawnamah hiyakemnite giwkis nawenyevwi hiyeg awaku ini. Ta yit ignes kewa motavyebe abet gihiyekemnikis, yisme gihwitentenkis. Ta yit gihiyekemnikis ke wotbe abet misanpikibe, yisme humaw abukri gidahankis.

²⁰ Nawnetke ta yit igkis mahayakemnavye igkis ka hiyak hawkri, yisme gikannuhtenkis. Mmanawa amadgatak amekene Moís gikumadukan wixwiy judeyenevwi uti madikte hiyakemniki madikte iwit ku pariye inyewatnene. Henewa wixwiy uti madikte, heneme waditnevyenen.

²¹ Wixwiy kannuh nawenyevwi hiyeg. Mmah nikwe wixwiy ka wew akak inin ukannuhakniwiy? Wixwiy awna: “Ka ba amevwi.” Heneme waytakwiy kidis ku pariye kane udahanwiyma.

²² Wixwiy awna: “Ka ba powkemnihwa.” Heneme waytakwiy powkemnihwa. Wixwiy ka batek akak ahehpakti batakka. Heneme waytakwiy amevwi karukri arikutak givinkis ahehpakti batakka. Amun ini hawata wixwiy keh mbayka.

²³ Wixwiy batek kinetihwa amin ku samah wixwiy kadahan Uhokri gikumadukan. Heneme in waditnevyenen. Wixwiy mbayhasa Uhokri giw awaku ku samah wixwiy ka ihpenema inakni gikumadukan.

²⁴ Henewa in ku samah Uhokri gannasan awna. In awna: “Neras hiyeg kane judeyenevwima igkis mahivwih Uhokri awaku igkis hiyap ku samah gihiyegavu judeyenevwi ka wew wadit.” Henewatbaki in Uhokri gannasan awna.

²⁵ Wixwiy hiyeg judeyenevwi wixwiy hiwhka uvitwiy adahan arakak ku samah wixwiy Uhokri gihiyegavu. Ku wixwiy ihpene ariwn Uhokri gikumadukan, in kabay wixwiy hiwhka uvitwiy. Heneme ku wixwiy ka ihpin, ayge nikwe inin ku samah wixwiy hiwhka uvitwiy in ka ariknawnema. In ke wotbe uvitwiy ka hiwhkama, wixwiy ka gihiyegavuma.

²⁶ Pahavwime ku pariye kane hiwhkama givit, ku ig wew wadit ku samah Uhokri gikumadukan aya wot, nikwe ig Uhokri ikiygi ku ig hawata kewa pahavwi hiwhkabe givit, kewa gihiyegabe.

²⁷ Ku samah neras ku pariye givitkis kane hiwhkavuma igkis iha Uhokri gikumadukan, amun ini igkis hiyekevwiynek ku wixwiy hiyeg judeyenevwi ka avigkutma ini gikumadukan. Wixwiy kadahan Uhokri gikumadukan anna amadga kagta, bawa waditnevyenen. Uvitwiy hiwhka, bawa waditnevyenen. Mmanawa wixwiy ka wew avigkut gihiyekemni.

²⁸ Ku samah wixwiy hiyeg judeyenevwi uvitwiy hiwhka ka innema keh wixwiy igyewatma Uhokri gihiyegavu.

²⁹ Heneme ku gihiyekemni ay uvitwiy, innewa ku pariye keh wixwiy igyewa Uhokri gihiyegavu. In ke wotbe uyakniwiywa hiwhkabe, mmanawa wixwiy kadahan pahat arakak ayge ku pariye akka huwewe ku wixwiy Uhokri gihiyegavu. Ignewa Uhokri Gitip. Mmanawa wixwiy humaw Uhokri gihiyegavu ka awakuma ku samah wixwiy kadahan gihiyekemni tamak amadga kagta, heneme awaku ku samah gihiyekemni ay abet uhiyekemniwiy. Ku pahavwi wew akak ini gihiyekemni, igi Uhokri kabayhig. Ku hiyeg amadgayavu inin ka kabayhig, ka sam git. Igme Uhokri kabayhig.