Romanus 16 - Uhokri Gahegbetawni Nukune akak Sawmus

Nah awahkis kabayka yimin

¹ Nah awahkis ukebyi kiyavuno Febe yimin. Eg kabayno tino. Eg ayava ka aynsima Uhokri gihiyegavu aynte avit paytwempu Senkreya.

² Amavanigbay kabayntiwa ku samah gumawkan, mmanawa eg hawata Jesus gihiyega. Avuriwnigbay. Ikinay gut madikte ku pariye gumawkanitnene, mmanawa eg kuwis ayava ka aynsima hiyeg ay. Eg ayavan hawata.

³ Nah awahkis kabayka yimin yis madikte Uhokri gihiyegavu ayge. Wani kiyavwiye Akwila kabay nudahan gukak gihayo kiyavuno Pirisila. Egkis kannivwiyos gidahan Cristo Jesus payak nukakuh.

⁴ Egkis ka kavigsa guvitkis nudahan. Nah kabayhigkis, ka nahwanema, heneme madikte Uhokri gihiyegavu ku pariye kane judeyenevwima hawata.

⁵ Nah hawata awahkis kabayka giminkis madikte Jesus gihiyegavu ku pariye pahadguhwenevwi kabubuk lammesya guvinekukis. Wani nukagmada kibeyne Epênetu kabay nudahan. Ig kitnene ku pariye kamaxwa givitit Cristo ayge avit waxri Asiyamnaw.

⁶ Wani kiyavuno Mahi kabay nudahan. Eg ku pariye kane kabivwisima kannivwiyo yidahan.

⁷ Wani kiyavwiye Andrôniku kabay nudahan gikak kiyavwiye Juwnyas. Igkis nuyaki judeyenevwi ku pariye paraksepka payak nukakuh ariku parakseket. Igkis Uhokri giwatnivwi kiyatyevwi. Igkiskit kamaxwa givitit Cristo minikwak avit nah kamaxwa.

⁸ Wani nukagmada kibeyne kiyavwiye Ampliyatu, nukebyi Uhokriyan, kabay nudahan.

⁹ Wani kiyavwiye Urbanu kabay nudahan. Ig kannivwiye gidahan Cristo payak ukakuh. Hawata nukagmada kibeyne kiyavwiye Estakis kabay nudahan.

¹⁰ Wani kiyavwiye Apeles kabay nudahan. Igyewa Cristo gihiyega. Wani kiyavwiye Aristóbulu gimunyavu kabay nudahan.

¹¹ Wani kiwavwiye Erodiyawh kabay nudahan. Ig nuyaki judeyene. Hawata kiyavwiye Narsisu gimunyavu ku pariye gihiyegavu Jesus, wani igkis kabay nudahan.

¹² Wani kiyavuno Tirifena kabay nudahan gukak kiyavuno Tirifósa. Egkis kannivwiyos kabayntiwa gidahan Ukivarawiy. Wani nukagmada kibayno kiyavuno Persidi kabay nudahan. Eg ka gubivwisima kannivwiyo gidahan Ukivarawiy.

¹³ Wani kiyavwiye Rufu kabay nudahan. Ig kibeynewa Uhokri gihiyega. Wani ginag hawata kabay nudahan. Eg kavigsan hawata ke gukamkayhbe.

¹⁴ Wani kiyavwiye Asinkritu kabay nudahan gikakkis kiyavwiye Flegonti, kiyavwiye Ermes, kiyavwiye Pátrobas, kiyavwiye Ermas payak gikakkis madikte gikebyuvwikis Jesus gihiyegavu ayge akiw.

¹⁵ Wani kiyavwiye Filólogu kabay nudahan gukak kiyavuno Julya. Hawata kiyavwiye Nerew gukak gisamu, gikak kiyavwiye Olimpas payak gikakkis madikte Uhokri gihiyegavu ayge ku pariye pahadguvu lammesya ayge gukakkis.

¹⁶ Aytnihaknabay pawtak nudahan akak inyewa batekka. Madikte Cristo gihiyegavu ay nukakuh igkis awahkis kabayka yimin.

Pukuhpawnabay gibohrikis kinisekevutnevwi

¹⁷ Nukebyuvwi, nah ikene yihiyekemni aynesa akiw. Pukuhpawnabay abohri gihiyekemnikis neras ku pariye kehkere yihiyekemni ibekhewbet. Pukuhpawnabay abohri gihiyekemnikis neras ku pariye tuguhkiskere yikamaxwan, neras ku pariye ka ihpekere inakni iwit ku pariye yis kuwis ameve. Ayguhwanay giwkis.

¹⁸ Mmanawa akebi neras hiyeg igkis ka kiye Ukivarawiy Cristo. Igkis kiye he givitkisnen. Igkis ayta kinista hiyeg akak barewye iwit ku pariye kahayak ke wotbe in kibeynebe hiyakemniki, hene igkis kinista neras ku pariye kane hiyak hawkri.

Ku yis iha Uhokri giwn, yis wanekbeta Satanas gihawkan

¹⁹ Yisme ka henema nukebyuvwi. Madikte hiyeg timap yak ku yis ihpenevwi Uhokri giwn. Inneki keh nah batek nunaktin yikak. Numawkan yis wewnenekwa akak kibeynenen hiyakemniki. Mbeyevyeme hiyakemniki numawkan yis ka wew nikak aynesnima.

²⁰ Ayge nikwe ig Uhokri ku pariye keh uyakniwiy karisaw ig sibuhkisnek Satanas gihiyegavu ta yit ka ayivwinema. Ukivarawiy Jesus gabay yikaknek yis madikte.

Ukebyuvwi awahkis kabayka yimin

²¹ Ig Timotyu ku pariye kannivwiye payak nukakuh ig awahkis kabayka yimin. Hawata akiw kiyavwiye Luwsiyu gikakkis kiyavwiye Jasawh, kiyavwiye Sosipatru, nuyakivwi judeyenevwi, igkis hawata awahkis kabayka yimin.

²² Nah Tersiyu awahkis kabayka yimin giwavrik Ukivarawiy. Nah Pol genneve ku pariye anniri inin kagta gidahan.

²³ Ig kiyavwiye Gayu ku kamun nah Pol misakwa, ig hawata awahkis kabayka yimin. Madikte Jesus gihiyegavu pahadguhwa lammesya ay gimun. Hawata kiyavwiye Erastu awahkis kabayka yimin. Ig avuriwkevutne karukri gidahan ikivarat ay avit inin paytwempu. Ukebyi kiyavwiye Kuwartu hawata awahkis kabayka yimin.

²⁴ Ukivarawiy Jesus Cristo gabay yikaknek yis madikte. Ameh.

Kibeyne gidahan Uhokri

²⁵ Kibeyne gidahan Uhokri. Ig detye adahan ikene wawaygiwiy ku samah nah kuwis akki yit abet nunetni gidahan Kiyavwiye Jesus Cristo. Minikwak hiyeg kote hiyakte inakni kibeyne inetit gimin Kiyavwiye Jesus.

²⁶ Kurime in ekkepka ta gitkis madikte hiyeg muwapuw. In ekkepka gitkis amadgatak inakni iwit ku pariye Uhokri gannasan ta gitkis gawnevevu pitatyevwi. Inakni kibeyne inetit ekkepka ku samah Uhokri dehetniye gawahkisni. In ekkepka ta gitkis madikte hiyeg kahadbe igkis ihpin, kahadbe igkis kamaxwa givitit Kiyavwiye Jesus.

²⁷ Ig Uhokri ka gihiyekemnisima. Yuma pahavwinema kema igma. Kibeyne gidahan Uhokri givitimpi Jesus Cristo adahan avanenekwa. Ameh.