Romanus 15 - Uhokri Gahegbetawni Nukune akak Sawmus

Wixwiy ka keh kabayka udahanwiynenwatma

¹ Wixwiy ku pariye hiyeknevwi hiyakemniki kabayntiwa amawka ku wixwiy kiyaknihwa gikakkis neras ku pariye kotene hiyakte hiyakemniki kabayntiwatma. Amawka wixwiy ka keh kabayka udahanwiynenwatma.

² Amawka wixwiy kehnekuye ku pariye kabay gitkis ukebyuvwiy kahadbe igkis tiviknene aymuhwenene akak Uhokri gihiyekemni.

³ Mmanawa igwa Cristo ka keh kabayka gidahanenwatma. In henewa ku samah Uhokri gannasan awna. In awna: — Niguh, nah amava ta nuvitit madikte ini mahivwihka ku pariye hiyeg awna pimin. Henewatbaki ig Uhokri gannasan awna.

Uhokri gannasan in ukannuhtenwiy

⁴ Madikte Uhokri gannasan in adahan ukannuhtenwiy. In adahan ikene wawaygiwiy adahan wixwiy ka miniw ariw wohpanwiy inin kabayka ku pariye nehmnikuhpiye.

⁵ Kibeyne gidahan Uhokri. Ignewa iki wawaygiwiy. Ignewa keh wixwiy kiyakniye wahap. Ig keh wixwiy wew akak pahatwowa uhiyekemniwiynek gikak Cristo gihiyekemni.

⁶ Ayge nikwe ik adahan wixwiy kabayha giw Uhokri, Ukivarawiy Jesus Cristo gig, akak pahatwowa uhiyekemniwiy akak pahatwowa wownwiy.

Hiyeg kane judeyenevwima hawata humaw Jesus gihiyegavu

⁷ Amavaknay pawtak kabayntiwa hawata ku samah ig Cristo ameve wixwiy. Ayge nikwe Uhokri kiyathakanek.

⁸ Mmanawa ig Cristo humewvi Uhokri giwatni giminkis hiyeg judeyenevwi adahan ig ekkene gitkis ku Uhokri giwn ka waditnevyenenma. Ig awahkiska adahanikwa ig utipkisne gitkis ini kabayka ku pariye Uhokri gikaksan ta gitkis gihawkrikis.

⁹ Ig hawata woke ahin gidahankis hiyeg ku pariye kane judeyenevwima adahan igkis hawata kabayha Uhokri adahan gamnihra. In henewa ku samah Uhokri gannasan awna. In awna: — Nikwe nah kabayhap ayge gibetkis hiyeg kane judeyenevwima. Nah pak avat payak gikakkis adahan kibeyhene piw.

¹⁰ Hawata in gannasan awna akiw. In awna: — Yis hiyeg kane judeyenevwima, bateknay yinaktin payak gikakkis Uhokri gihiyegavu judeyenevwi.

¹¹ Hawata akiw in gannasan awna: — Kabayhanay Ukivarawiy madikte yis ku pariye kane judeyenevwima. Kabayhanigbay ka aynsima madikte yis hiyegiviyenevwi.

¹² Hawata amekene Izaíyas awna: — Aysawnemenek pahavwi gihiwhi amekene Jesse ig danuh atanek. Ig humawnek kewa pahakti ahinanyobe ku pariye metakwa hiyan ariwntak gudug mugumguvye. Ig kumadukanek neras hiyeg kane judeyenevwima. Igkisme kamaxwa givititnek adahan ig gamnihtenkisnek. Henewatbaki in Uhokri gannasan awna.

Nah ekkene Uhokri giwn muwapu

¹³ Kibeyne gidahan Uhokri ku pariye keh wixwiy kamaxwa givitit adahan ig wamnihtenwiynek. Ig keh yis batek yinaktinek. Ig kariswehse yiyakninek akak ini yikamaxwan. Numawkan ig keh yis kamaxwa givitit kiyesrad akiw givitimpi Gitip.

¹⁴ Nukebyuvwi, nah hiyakni ku yis kibeynevwi hiyeg, yis kuwis hiyakemniye adahan yis ikene hiyakemniki pawtak.

¹⁵ Heneme nah ka mara kiyekis yit aynesa hiyakemniki amadgatak inin kagta. Nah kiboka awna inakni yit, mmanawa nah ka awna nuwnteknewatma. Ignewa Uhokri akak gabay

¹⁶ ignewa keh nah humaw Cristo Jesus giwatni. Ig awahkisun giminkis hiyeg ku pariye kane judeyenevwima adahan nah ekkene ginetni ta gitkis. Nukebyuvwi, ku samah judeyenevwi gimuwvegakis kakanhaw ta git Uhokri, nah hawata ku samah nah ekkene Uhokri ginetni amun ini nah ke wotbe nah kakanhewnebe ta git Uhokri. Madikte hiyeg ku pariye ihevye inakni nunetni igkis humaw kewa nukanhube ta git Uhokri. Igkis ik adahan ig Uhokri amavigkis, mmanawa Gitip barewvitevgikis.

¹⁷ Kibeyne, ig Cristo Jesus keh inin nannivwi gidahan Uhokri in wew kabayntiwa. Nah batek kinetihwa amin ku samah ig wewkisni.

¹⁸ Nah ka kiboka kinetihwa numinuh. Heneme nah ka aynsima batek kinetihwa amin ku pariye ig Cristo keh nuvitimpi. Mmanawa ku aysaw nah akki Uhokri ginetni ta gitkis hiyeg kane judeyenevwima, ig keh igkis iha inakni ginetni. Ignewa iki nutuh nuwnuh. Igwata iki gannu ta nuvitit.

¹⁹ Kibeyne, ig iki gannu ta nuvitit adahan nah kehne kibeyne annut ku pariye keh hiyeg wakaymni. Ini Uhokri Gitip gannu keh igkis kamaxwa givitit Uhokri. Akak ini gannu ay nuvituh nah wageswa muwapuw paytwempuriw. Nah ekkene ginetni gimin Cristo muwapuw. Nah kavusa ariwntak paytwempu Jerusalém he nah danuhe tahan avitit waxri Iliriyamnaw ku pariye piyawakad.

²⁰ Avanenekwa nah mpiksaw adahan nah ekkene inakni kibeyne inetit ku kiney Cristo giw kote timapkante. Nah ka ekkekere giwn ku kiney nawenyevwi hiyeg kuwis ekke inakni giwn. Nah numawkan adahan nah akkin ta gitkis hiyeg ku pariye kote timapnite.

²¹ In ku samah Uhokri gannasan awna. In awna: — Ku pariye hiyeg kote akkakante Uhokri gitkis, igkis hiyakginek. Ku pariye hiyeg kote timapte gak, igkis pukuha gihiyekemninek.

Nah danuhpekere atere Roma

²² Nukebyuvwi, ka aynsima hawkri nah danuhpekere yit atere, heneme inin nannivwi adahan nah ekkene Uhokri giwn gitkis hiyeg in mpitan in keh nah ka kahawkan danuha atere yit.

²³ Kurime nah kuwis pisenwa nannivwi ay avit inin waxri. Kuri ik adahan nah danuhpa atere yit ku samah nah kuwis aharit kibite kamukri.

²⁴ Nah atekne ekkene Uhokri giwn ta avitit Espanyamnaw, aytontak pahambatak yiwaxig. Nikwe nutepkemninek nah mpiya awvre yimuniw, gikak Uhokrinek. Nah ka aynsima hiyepkere yihivak kahadbe wixwiy aydhak pawtak. Ayteke nikwe hiyawa yis ayavan adahan nah tivikwiye akak kabayka ta avitit Espanyamnaw.

²⁵ Heneme kurinewa avit nah atak yimkat, nah ateknete ta avitit paytwempu Jerusalém adahan nah ewkne karukri ta gitkis Jesus gihiyegavu ayge.

²⁶ Egu karukri ikepka nuwakurit gavitkis Jesus gihiyegavu ku pariye misekwenevwi avit waxri Masedôniyamnaw gikakkis neras ku pariye misekwenevwi aynte avit waxri Gresiyamnaw. Igkis pahadguhe nor karukri adahan gamnihtenikis Jesus gihiyegavu ku pariye madiptavye aynte avit Jerusalém. Hiyawa igkis ka judeyenevwima, heneme igkis kakanhewnes ta gitkis hiyeg judeyenevwi.

²⁷ Igkis ahegbete ini gihiyekemnikis giwntekneswa awaku igkiswa amnihkerevgikis. Hawata akiw igkis diyuhkiskere giwakkis. Mmanawa ignes hiyeg judeyenevwi kuwis ekke ka aynsima kabayka inurikyene gitkis hiyeg ku pariye kane judeyenevwima. Kuri amawka igkisme ayavigkis akak arikna ku pariye kabay amadgaya inin.

²⁸ Kibeyne, igkis ike egu karukri ta nuwakurit adahan nahme ikevgu ta gitkis ukebyuvwiy aynte Jerusalém. Ku aysaw nah pisenwa gukepka gitkis, ku aysaw nah hiyap ku eg inyewa ay giwakukis, ayteke nikwe nah tivik nah mpiya awvre yimuniw ku samah nutepkemni ta avitit Espanyamnaw.

²⁹ Ku aysaw nah danuh atere yitnek, nah hiyak ig Cristo iki wotwiynek ka aynsima batekkanek, ka aynsima kabaykanek.

³⁰ Nukebyuvwi, nah aya yit gidahan Ukivarawiy Jesus Cristo, ku pariye kuwis keh yis batek nukakuh awaku ku samah wixwiyweke kadahanyevwi Gitip ay uvitwiy, nah aya yit adahan yis ayavan akak yiviryepkawni ta git Uhokri nudahan.

³¹ Piriyepkawnabay nudahan adahan nudawnhan atere avitit Judeyamnaw marihwa Uhokri mpitan giwkis neras hiyeg aygnenevwi ku pariye kane kamaxwa givitit Kiyavwiye Jesus. Hawata akiw nawenetke neras judeyenevwi ku pariye kamaxwenevwi givitit Kiyavwiye Jesus ayge Jerusalém nawenetke igkis pukuhpahwenek abohri ini nukan gitkis, mmanawa in awahkiska giminkis gavitkis hiyeg ku pariye kane judeyenevwima. Piriyepkawnabay nudahan marihwa igkis ka pukuhpaw nibohri.

³² Ayge nikwe gikak Uhokrinek nah danuh atere yitnek akak batekka, nah iwene nawaygi ayge yibetnek.

³³ Uhokri gabay yikaknek. Ignewa kariswehse uyakniwiynek. Ameh.