Romanus 13 - Uhokri Gahegbetawni Nukune akak Sawmus

Ihpanay hiyaptigi giwn

¹ Amawka ku madikte hiyeg iha hiyaptigi giwn. Hiyaptigi ay ka giwnteknewatma. Ig ay awaku igwa Uhokri ikaksig. Wake ka Uhokrima ikigi adahan ig humaw ikivarat, ig ka humawkam ikivarat.

² Ku pahavwi meksa hiyaptigi, amun ini nikwe ig kavetunsene ku pariye igwa Uhokri iki. Aysawnemenek ig ner pahavwi ig katiwnisepka gitnek.

³ Hiyaptigi ka adahan aviskama gidahankis ku pariye wewnevwi wadit, heneme gidahankis ku pariye kehnevwi mbayka. Ku pis ka muwaka pukuhpaw gibohri hiyaptigi, amawka ku pis keh kabaykanen. Ayge nikwe ig kabayhap.

⁴ Mmanawa ig Uhokri kawih hiyaptigi adahan kehne kabayka pidahan. Pisme ku pis kehne mbayka, hiyawa pis pukuhpaw gibohri nikwe. Mmanawa ig kadahan gidatni adahan ig keh pis katiwnih pitaraksan. Ig ka samanaw pikak. Ig Uhokri kawihgi adahan ekkene ta gitkis kehnevwi mbayka ku ig ka batek aynesnima akak gikehnikis kane kabay.

⁵ Amawka ku wixwiy iha hiyaptigi giwn. Wixwiy iha giwn ka ininewatma awaku wixwiy pukuhpaw abohri gidagonima, heneme hawata awaku wixwiywa hiyak ku in kabay adahan wixwiy iha giwn.

⁶ Awaku ini hawata wixwiy katiwnih karukri ta git ikivarat, mmanawa ini ku samah ig ukumaduketniwiy ini gannivwi gidahan Uhokri.

Katiwnihnay yimatiwnihni

⁷ Nikwe katiwnihnay yimatiwnihni ta gitkis madikte hiyeg. Katiwnihnay ikivarat. Katiwnihnay ku pariye ayapka yit adahan yis katiwnih. Avisnay gibohrikis ikivarat. Kiyathanigkis.

⁸ Ka yi muwaka misakwa akak matiwnihka yiwaku. Misakwanay ininewa akak matiwnihka adahan batekakka pawtak. Ini batekakka wis ka pisenwanti akatiwnihka. Ku wis bateknenekwa gikakkis uyakivwi hiyeg, wis kuwis mateke madikte Uhokri gikumadukan.

Batekaknay pawtak

⁹ Ig Uhokri gikumadukan awna adahan wis ka powkemnihwa, adahan wis ka umah uyaki hiyeg, adahan wis ka amevwi, adahan wis ka miyahaw, adahan wis ka keh ariknawnema mbayka akiw. Madikte inakni gikumadukan in kuwis ay abet inin gikumadukan: “Batek gikakkis piyakivwi hiyeg hawata ku samah pis batek akak pivit.”

¹⁰ Ku wixwiy batekak pawtak, nikwe wixwiy ka keh akebi ini mbayka. Ayge nikwe ku wixwiy batek gikakkis uyakivwiy hiyeg, amun ini nikwe wixwiy kuwis ihpene madikte Uhokri gikumadukan.

Kawihminawnay akak Jesus gihiyekemni kabutenene

¹¹ Amawka wixwiy pi mpiksawte adahan wixwiy keh kabayka pawtak. Kuwis ahawkanavrik danuh adahan uhiyekemniwiy wadis adahan wixwiy miniw ariw uhiyekemniwiy ku pariye kane kabay. Henewatbaki in. Mmanawa kennesa ahawkanavrik adahan wixwiy danuh ta git Uhokri. Ahawkanavrik pi kennesate ariw ku samah wixwiy kavusaw kamaxwa givitit pitatye.

¹² Kuwis ke wotbe hiyukamin hiyevewkevyemet. Wowskawniwiy abet ini amisnavye ay amadga inin in me pisenwemet. Minikwak wixwiy ke wotbe uhiyekemniwiy ay abet amisnavyenen. Kurime ig Kiyavwiye Jesus kuwis uguhe uhiyekemniwiy. Ku samah kabutniki ka amava amisnavye nibetit, uyay ka amava patahwaki abetit uhiyekemniwiy akiw. Uyay wew akak uhiyekemniwiy kabutenene kivun akak kibeyne hiyakemniki. Ininewa umaptentenwiy giwkis uvetunyavuwiy.

¹³ Uyay wew akak kibeyne hiyakemniki akak uhiyekemniwiy kabutenene ke puwivwakbe. Ka yi muwaka daxtasaw akak arewhaki, ine akak uwkihwaki, ine akak mahayakemniki, ine akak maraki, ine akak iniyakka ine akak atihpaka.

¹⁴ Kawihnabay Ukivarawiy Jesus Cristo gihiyekemni ta abetit yihiyekemni. Ka yi muwaka iki yitew akiw adahan yis kehne yihiyekemni amadgaya inin abetki.